10
Ka Iglogpad no mgo Taangas
1 No nigkagi ka Magboboot ki Mosis to “Hondio kow ki Parao, su pigpamakogal ku ka goinawa rin woy ka goinawa to mgo hibatoon din odyow no ogkohimu ku ka soini no mgo ogko-in-inuan no mgo indanan to taliwaro kandan 2 woy odyow no ogkanangonan now ka mgo anak now woy mgo apu now ko monu kabuut ka pog-atu ku to mgo otow to Ehiptu, woy ko nokoy ka mgo ogko-in-inuan no pighimu taliwaro kandan, woy odyow no ogkataga kow no sikanak ian ka Magboboot.”
3 No sikan ian nighondio si Mosis woy si Aaron ki Parao woy pignangonan dan sikandin to “Soini ka kinagian to Magboboot no Igbudyag to mgo Hibriu ‘Monu kaugoy no ogligalon nu ka pogpasaad-saad to tangkaan ku? Pohipanawa nu ka koot-otawan ku odyow no ogpakasadyo sikandan koddi. 4 Ko ogligal ka to pogpohipanow kandan, ogpa-aap a to mgo taangas to pandatuan nu asoom no allow. 5 Ogtangkap sikandan taman to konad ogkakitaan ka tano. Og-ubuson dan to pogkoon ka maintok no nagaat koikow takas to uran no ice, iglagkos ka tibon mgo kadyu no nigtulin to mgo kamot now. 6 Ogpakaponu sikandan to mgo baoy nu woy to mgo baoy to mgo hibatoon nu woy to tibon mgo otow to Ehiptu. Waro iing duon no nakita to mgo amoy now woy mgo kabuybudyagan now ligkat to binunsuran to pog-ugpo dan to soini no tano taman kuntoon.’” No, nig-iniug si Mosis woy pig-ongkoran din si Parao.
7 Nignangon ka mgo hibatoon ni Parao kandin to “Monu kaugoy pad no ogkalit-agan ki to sikan no otow? Pohipanawa nud on ka mgo otow odyow no ogpakasadyo sikandan to Magboboot no Igbudyag dan. Waro nu pad buwa gorama no naguak on ka tibon Ehiptu?”
8 No inpa-angoy hutuk si Mosis woy si Aaron dio to tangkaan ni Parao. Kagi ni Parao to “Hondio kow. Sadyo kow to Magboboot no Igbudyag now. Di hontow ian ka ogduma?”
9 Nigtabak si Mosis to “Oghondio koy duma to mgo budyag woy mgo bato pad, to mgo anak noy no mgo lukos woy boi, woy duma to mgo adyam noy, su oghimu koy to pogkoonan tongod to Magboboot.”
10 Nigkagi si Parao to “Ogkabuligan kow to Magboboot ko ogparumaon ku kaniu ka mgo boi woy mgo bato! Kono igkohoos no maroot naan ka nabantaan now. 11 Aw kow duon! Ka mgo lukos do ka ogpakahipanow woy sikandan ka ogpakasadyo to Magboboot su sikan ka pigpamudyu now koddi.” No pigdogil dan si Mosis woy si Aaron to tangkaan ni Parao.
12 No nigkagi ka Magboboot ki Mosis to “Ikawoy nu ka boad nu ampow to Ehiptu odyow no ogkalibuung ka mgo taangas duon to tano woy og-ubuson dan to pogkoon ka tibo no nigtubu to mgo kamot no nasamo pad to uran no ice.”
13 No sikan ian pigkawoy ni Mosis ka tukod din ampow to Ehiptu, woy nigpakaamag ka Magboboot to kaamag puun to ogsilaan dio to tano to tibon allow woy tibon maukilom. To pogkapawo, na-aap to kaamag ka mgo taangas; 14 nigmantangkap sikandan to tibon Ehiptu, woy nig-ugpo to tibon tano no marasig sikandan. Waro allow nokani no duon iing to sikan no karasigan to taangas, woy waro allow no ogdatong no ogkohutuk sikan. 15 Nigtangkap sikandan to tibon tano taman to moitom pitawon ka tibo. Noubus dan to pogkoon ka tibo no nagaat takas to uran no ice - ian ka tibo no nigtubu to mgo kamot woy ka tibon mgo bogas to kadyu. Waro moilow no nagaat to kadyu woy pinamua to tibon pandatuan to Ehiptu.
16 Nig-agpas inpo-umow ni Parao si Mosis woy si Aaron, woy kagi rin to “Nakasao a to Magboboot no Igbudyag now, woy to kaniu. 17 No pasaylua a now hutuk, woy panubari now ka Magboboot no Igbudyag now odyow no og-awoon din ka soini no koirapan no ogpakahimatoy.”
18 Nigligkat si Mosis ki Parao, woy pigpanubaran din ka Magboboot. 19 Inpalibong to Magboboot ka kaamag no no maagbot no kaamag no nigpuun to ogsaopan, no nanladyap ka mgo taangas woy na-aap sikandan pohondio to Dagat no Malaab. Waro sagboka no taangas no nagaat to tano to Ehiptu. 20 Di inpamakogal man do to Magboboot ka goinawa ni Parao, woy waro din pohipanawa ka mgo otow to Israil.
Ka Iglogpad no Dooman
21 No nigkagi ka Magboboot ki Mosis to “Ikawoy nu ka boad nu pohondio to langit odyow no ogdooman ka tibon Ehiptu; dooman no ogkagoram.”
22 No pigkawoy ni Mosis ka boad din pohondio to langit, woy niglopow ka dooman to tibon Ehiptu sood to tatou no allow. 23 Waro nigmakitkito-oy ka mgo otow, woy waro mokohip-hipanow sood to tatou no allow. Di duon kaadyag to mgo otow to Israil to mgo pig-ugpaan dan.
24 No inpo-umow ni Parao si Mosis no kagi rin, “Hondio kow, woy ogsadyoon now ka Magboboot. Agad ka mgo boi woy mgo anak now ogpakaruma kaniu; di igaat now ro ka mgo adyam now.”
25 Di nigtabak si Mosis to “Awos no duon igpanubad noy no tutungonon dio to Magboboot no Igbudyag noy. 26 Awos no ogparumaon noy ka mgo adyam noy. Waro sagboka no ogkoongkoran noy su oggamiton noy ka duma to pogsadyo noy to Magboboot. Woy koy on ogkataga ko nokoy ka oggamiton noy to pogsadyo to Magboboot ko dio koy on.”
27 Di waro mogbabali si Parao to pogpohipanow kandan su pigpamakogal to Magboboot ka goinawa rin. 28 Nignangon si Parao ki Mosis to “Awo ka kai to tangkaan ku! Ligdongi nu no kono ka oghutuk ogtangko koddi! Ka allow no ogpakakita ka to langlanguan ku ian ka allow to kamatadyon nu.”
29 Nigtabak si Mosis “No, iing to innangon nu, kono a oghutuk ogtangko koikow.”