11
Ka Logpad dio to mgo Panganoy
1 No kuntoon nigkagi ka Magboboot ki Mosis to “Ogpa-aap a to sagboka pad no logpad dio to ki Parao woy dio to Ehiptu. Takas to sikan, ogbabali si Parao to poghipanow now ligkat kai, woy to sikan no allow, ogdogilon din sikaniu tibo ian. 2 Nangoni nu ka mgo otow to Israil no tibo sikandan no mgo lukos woy mgo boi ogpamudyu poron duon to mgo songo baoy ran odyow no ogkabogadyan sikandan to mgo hinimu no plata woy bulawan.”
3 (Pigpamarodyow to Magboboot ka goinawa to mgo otow to Ehiptu dio to mgo otow to Israil. Agad pad ko si Mosis, songo marodyow ka goinawa to mgo hibatoon ni Parao woy to mgo otow to Ehiptu kandin.)
4 No sikan ian nigkagi si Mosis ki Parao to “Soini ka kinagian to Magboboot: ‘To liwaro to kaukiloman, ogpanloudyon ku ka tibon Ehiptu. 5 Ogpanghimatadyan ku ka kara panganoy no lukos to tibon Ehiptu, ligkat to panganoy no anak no lukos ni Parao no nigpinnuu to pinnuuan to igbudyag, pohondio to panganoy no anak no lukos to uripon no boi no niggagaling to harina. Songo iglagkos ka tibon mgo panganoy to mgo adyam. 6 Maagbot ka pandaawit no ogkarinog to tibon Ehiptu - maagbot pad to narinog agad kon-u, woy no ogkarinog agad kon-u no allow no ogdatong. 7 Di dio to mgo otow to Israil, waro agad asu no ogtoy-ow dio to otow woy ko adyam.’ No sikan ian no ogkataga ka no kono'n unawa ka pogpitow to Magboboot to Israil woy to Ehiptu. 8 Ogdani koddi ka soini tibon mgo hibatoon nu no ogpang-unduk sikandan no ognangon ‘Hipanow ka duma to tibon mgo otow no nigsundul koikow!’ No takas to sikan oghipanow a.” No to moinit pad so goinawa rin nig-ongkod si Mosis ki Parao.
9 Nignangon on ka Magboboot ki Mosis to “Kono ogpamminog si Parao koikow, odyow no ogmarasigon ku ka mgo oghimuon ku no ogko-in-inuan to Ehiptu.” 10 Pighimu ni Mosis woy ni Aaron ka tibo to soi no mgo ogko-in-inuan to tangkaan ni Parao, di pigpamakogal to Magboboot ka goinawa ni Parao, woy waro pad sikandin nigpohipanow to koot-otawan to Israil ligkat to pandatuan din.