12
Ka Pogligad to Magboboot
1 Nigkagi ka Magboboot ki Mosis woy ki Aaron dio to Ehiptu to 2 “Soini no buwan ogkohimu no an-anadyan no buwan to kaniu, ian ka ogdoromdomon now no an-anadyan no buwan to tuid now. 3 Nangoni now ka tibon koot-otawan to Israil no to igkasampuu no allow to soini no buwan, ogpurut ka kara lukos to sagboka no nati no karniru tongod to lunggunan din. Sagboka no karniru to kara lunggunan ian. 4 Ko mointok ka lunggunan no kono ogpoko-ubus sikandan to tibo to nati no karniru, og-agpot sikandan dio to songo baoy, takas to nigdoromdom ko pila ka mgo otow. Ogdoromdomon now ko monu karakol no karniru ka ogkoubus now sumao ko pila ka ogkakoon to kara otow to lunggunan. 5 Ka og-aamon now no mgo adyam ian ka mgo lukosan no songo tuid pad ka kabudyagi ran. Waro maroot to sikan no mgo adyam woy ogpakapurut kow to agad karniru woy ko kambing. 6 Udyamua now ka sikan no mgo adyam taman to igkasampuu woy hop-at no allow to buwan, no ogdorongan ka mgo koot-otawan to Israil to poghimatoy to mgo adyam to poglinob on to allow. 7 No, ogpurut sikandan to langosa woy ogpoiran dan ka mgo sungkaug to gomawan woy dio to baabag to gomawan to mgo baoy no pigkoonan dan to mgo karniru. 8 Sikan dod no maukilom ogkoonon dan ka sapu no ogtuugon dan dio to hapuy, duma to mgo mapoit no mgo aanag woy igsoro dan to pan no waro igpatulin. 9 Dokow ogkoon to sapu no moilow pad, woy ko pigsabawan, di ogtuugon now to hapuy; iglagkos ka uu, ka mgo paa woy ka mgo tagu to lawa. 10 Dokow pohipawoi ka samo; ko duon ogkasamo, tutunga now ro. 11 Ko ogkoon kow, lokisa now ka kinabo now woy hoona now, akobianow ka mgo paa now, woy songo tutukod kow.bAgpas kow to pogkoon. Ogkohingaranan soini no Pogligad to Magboboot.
12 “To sikan dod no maukilom, ogpanloudyon ku ka mgo ugpaan to tibon Ehiptu, woy ogpanghimatadyan ku ka kara panganoy iglagkos ka mgo otow woy mgo adyam woy ogbobootan ku ka tibon mgo tinuuhan no mgo inotowotow to Ehiptu. Sikoddi ian ka Magboboot. 13 Ka langosa ian ka indanan now to mgo baoy now; woy ko ogkitoon ku ka langosa ogligaran ku sikaniu. Waro ogdatong no igkaguak no logpad kaniu ko oglogparan ku ka Ehiptu.
14 “Ogdoromdomon now ka soini no allow; to ogdatong no mgo kapunganan taman to katamanan, oghutukon now ka soini no igparoromdom no pogkoonan to Magboboot. 15 To papitu no allow ogkoon kow to pan no waro igpatulin. To an-anadyan no allow, og-awoon now ka igpatulin no duon to mgo baoy now. Hoo su ko agad hontow ka ogkoon to pan no duon igpatulin sood to papitu no allow to pogkoonan now, dokow on ogdoromdoma sikandin no kapunganan ni Israil. 16 To an-anadyan no allow, ogmanlimud-limud kow odyow to pogsadyo koddi, woy to igkapitu no allow oghutuk kow. To sikan no mgo allow, dokow ogtarabau ko konon ka poghilutu to ogkoonon now ro. Sikan do taman ka tarabau now.
17 “Himua now ka pogkoonan to Pan no Waro Igpatulin kara tuid su sikan ian ka allow no pig-aap ku ka tibon mgo puntuk kaniu ligkat to Ehiptu. Himua now to soini no allow taman to katamanan. 18 Ian to an-anadyan no buwan to tuid ogkoon kow to pan no waro igpatulin ligkat to pogkatangkob to igko-14 no allow taman to pogkatangkob to igko-21 no allow. 19 Sood to sikan no papitu no allow, waro poron igpatulin no ogkakita dio to mgo baoy now. Woy agad hontow no ogkoon to agad nokoy no duon igpatulin dogila now sikandin to koot-otawan to Israil, agad ko dagpu no otow sikandin woy ko lumad. 20 Dokow ogkoon to koononon no duon igpatulin. Agad hondoi kow og-ugpo, ogkoon kow ro to pan no waro igpatulin.”
21 No inpo-umow ni Mosis ka tibon mgo igbudyag to Israil, woy pignangonan din sikandan to “Agpas kow to poghondio woy aama now ka mgo adyam now to mgo lunggunan now, woy himatadyi now ka nati no karniru to Pogligad. 22 Purut kow to mgo sugpang to hisupucwoy ihalit now to langosa no duon to lipung woy poiri now ka baabag woy ka daruwa no sungkaug to gomawan to langosa. Waro sagboka kaniu no oglibuwas to gomawan to baoy rin taman to ogkapawo. 23 Ko ogpanloudyon to Magboboot ka tano odyow to poghimatoy to mgo otow to Ehiptu, ogkitoon din ka langosa duon to baabag woy to mgo sungkaug to gomawan, woy ogligaran din ka sikan no gomawan, woy kono ogbabali sikandin no ogsood to mgo baoy now ka taaglogpad no diwata odyow to poghimatoy kaniu.
24 “Babalia now ka soini no mgo tugun-tugun ku iing to udlin no ogpalinggaat taman to katamanan dio to kaniu woy dio to mgo kapunganan now. 25 Ko ogsood kow to tano no igbogoy to Magboboot kaniu sumao to inpangulibot din, babalia now ka soini no himuonon. 26 Woy ko og-inso ka mgo anak now to ‘Nokoy ka kaogsaran to soini no himuon ta?’ 27 no nangoni now sikandan to ‘Soini ka Pogligad no igpanubad to Magboboot, su pigligaran din ka mgo baoy to mgo otow to Israil dio to Ehiptu woy noid-uan din ka mgo lunggunan noy to pigpanghimatadyan din ka mgo matig Ehiptu.’”
No to pogkarinog to mgo otow to soini no kinagian nigmang-unduk sikandan no nigsadyo to Magboboot. 28 Nigbabali ka mgo otow to Israil to tibo no insugu to Magboboot ki Mosis woy ki Aaron.
29 To liwaro to kaukiloman, pigpanghimatadyan to Magboboot ka kara panganoy dio to Ehiptu, ligkat to panganoy ni Parao no ian ka igbudyag to Ehiptu pohondio to panganoy to nabilanggu no otow dio to kalabusuan, inlagkos ka tibon mgo panganoy no mgo adyam. 30 Nang-onow si Parao woy ka mgo hibatoon din woy ka tibon mgo matig Ehiptu liwaro to kaukiloman, woy maagbot lagboy ka pogsinogow to pandaawit dio to Ehiptu su waro lunggunan no waro namatadyi.
Ka Poglibuwas to Ehiptu
31 Taliwaro to kaukiloman pigpo-umow ni Parao si Mosis woy si Aaron, woy pignangonan din sikandan to “Onow kow! Ongkori now ka mgo koot-otawan ku, sikaniu woy ka mgo otow to Israil! Hondio kow woy sadyo kow to Magboboot unawa to inpamudyu now. 32 Aapa now ka mgo adyam now iing to innangon now, woy awo kow. Songo boligi a now.”
33 Pigbaghotan to mgo otow to Ehiptu ka mgo otow to Israil to pogpaagpas to pog-ongkod to tano dan. Kagi ran to “Ko kono kow og-agpas naugpa ko ogkoubus koy ogkammatoy!”
34 No nig-aap ka mgo otow to in-oug no harina ran no waro pad ma-amuti to patulin, woy pigtiang dan dio to mgo komotanan no pigtongos to mgo kinabo dan.
35 Nigbabali ka mgo otow to Israil to mgo insugu ni Mosis no nigpamudyu sikandan to mgo otow to Ehiptu to mgo hinimu no bulawan woy plata woy mgo kinabo. 36 Pigpamarodyow to Magboboot ka goinawa to mgo matig Ehiptu dio to mgo otow to Israil, woy pigbogadyan dan to inpamudyu dan. No sikan ian no inat pig-agawan ka mgo matig Ehiptu to mgo kaaglagan dan.
37 Nighipanow ka mgo otow to Israil ligkat to Ramisis pohondio to Sukot. Mgo 600,000 ka mgo lukos no nighipanow no waro insool ka mgo boi woy ka mgo bato. 38 Moon-ing ka mgo duma ran no konon mgo otow to Israil, woy dagdakol lagboy ka mgo puntuk to mgo adyam dan iglagkos ka mgo baka woy mgo karniru woy mgo kambing. 39 Nighilutu sikandan to pan no waro igpatulin pinabadyo to in-oug no harina no pig-aap dan ligkat to Ehiptu. Waro igpatulin to in-oug dan su pigdogil sikandan to Ehiptu, woy waro sikandan makaliwak to poghimu to mgo ogkoonon dan.
40 No kuntoon naka-ugpo ka mgo otow to Israil dio to Ehiptu sood to 430 no tuid. 41 Pogkaponga to 430 no tuid no waro matimui woy waro masalini to agad sagboka no allow, nanlibuwas ka tibon mgo puntuk to koot-otawan to Magboboot dio to Ehiptu. 42 No taman to katamanan, ogtanud-tanud ka mgo otow to Israil to sikan no maukilom kara tuid no og-iloon dan ka Magboboot su nigtanud-tanud ka Magboboot to sikan no maukilom odyow to pog-aap kandan libuwas to Ehiptu.
Mgo Udlin to Pogkoonan to Pogligad
43 Nigkagi ka Magboboot ki Mosis woy ki Aaron to “Soini ka mgo udlin to Pogkoonan to Pogligad: Waro otow to loin no koot-otawan ka ogpakakoon to sikan. 44 Ko duon uripon no pigboli now, ogpakakoon sikandin ko natuli now on sikandin, 45 di ka otow no tigbal do nig-agpot kaniu woy ka otow no nig-inallow ro kaniu kono ogpakakoon sikandan to pogkoonan.
46 “Ogkoonon now ka pogkoonan to sood to sagboka ro no baoy; dokow og-aapa ka sapu dio to libuwasan to baoy. Dokow oggopua ka agad sagboka no bokog. 47 Ogkoonon to tibon koot-otawan to Israil ka soini no pogkoonan.
48 “Ko duon otow no konon otow to Israil no nig-ugpo to taliwaro kaniu no ogkoiniat to pog-agpot to Pogkoonan to Pogligad to Magboboot, woy on ko igpatuli din ka tibon mgo lukos to lunggunan din, no ogpakakoon sikandin unawa’t lumad sikandin. Di waro lukos no waro matuli ka ogpakakoon to sikan. 49 Unawarod ka udlin agad ko dio to lumad woy ko dio to otow to loin no koot-otawan no nig-ugpo to taliwaro now.”