13
Pogsapinpin to mgo Panganoy
1 No nigkagi ka Magboboot ki Mosis to 2 “Loin-a now koddi ka kara panganoy no lukos kaniu. Sikoddi ka tagtuun to an-anadyan no oglibuwas to kara aanakan taliwaro to mgo otow to Israil, agad ko otow woy ko adyam.
3 No nigkagi si Mosis to koot-otawan to “Doromdoma now ka soini no allow, no ian ka allow no nakalibuwas kow ligkat to pogko-uripon now dio to Ehiptu, su pig-aap kow to Magboboot ligkat to sikan pinabadyo to mabogbog no boad din. Dokow ogkoon to agad nokoy no duon igpatulin. 4 Indani now no buwan to Abibakuntoon to poghipanow now. 5 Ko og-aapon kow on to Magboboot dio to tano to mgo otow to Canaan, to Hit, to Amor, to Hib woy to Yibus - ian ka tano no inpangulibot din to mgo kabuybudyagan now no puunan to gatas woy tonob no dakol - ko oglopow ka soini no buwan no Abib, ogdoromdomon now ka soini no himuon; 6 sood to papitu no allow ogkoon kow ro to pan no pighimu to waro igpatulin, woy to igkapitu no allow, oglimudlimud kow odyow to pogsadyo to Magboboot. 7 Koon kow ro to pan no waro igpatulin sood to sikan no papitu no allow; kono ogkakitaan poron ka igpatulin taliwaro to kaniu woy dokow ogbabali no duon igpatulin to mgo ugpaanan now.
8 To sikan no allow, nangoni nu ka anak nu no lukos to ‘Soini ka pighimu ku su nigdoromdom a to pighimu to Magboboot koddi to nigligkat a to Ehiptu.’ 9 Sikan no himuon now ogkohimu no unawa to tuus no duon to boad now, woy unawa to pogpadoromdom no duon to bukod now no ungud kow ogmanang-nangonoy to kinagian to Magboboot poron. Hoo su pig-aap kow to Magboboot ligkat to Ehiptu pinabadyo to mabogbog no boad din. 10 Ogbabalion now ka soini no himuon to litos no allow kara tuid.
11 “Takas to pog-aap to Magboboot kaniu dio to tano to mgo otow to Canaan, woy ko ogkabogadyan kow on to sikan unawa to inpangulibot din kaniu woy to mgo kabuybudyagan now, 12 ibogoy now to Magboboot ka kara an-anadyan no anak to kara aanakan. Ka panganoy no lukos to tibon mgo adyam now ian tagtuun ka Magboboot. 13 Ulii now ka kara panganoy no asnu pinabadyo to pogtubad to sagboka no nati no karniru, di ko kono now i-uli sikan, bunggu-a now ka liog to asnu. Ulii now ka kara panganoy no anak now no lukos.
14 “To ogdatong no mgo allow ko og-inso ka anak nu to ‘Nokoy ka kaogsaran to soini?’ tabaka nu sikandin to ‘Pig-aap koy to Magboboot ligkat to pogko-uripon dio to Ehiptu pinabadyo to mabogbog no boad din. 15 To waro mogbabali si Parao to pogpohipanow kanami su makogal ka goinawa rin, pighimatadyan to Magboboot ka kara panganoy no lukos to Ehiptu, iglagkos ka mgo otow woy mgo adyam. No sikan ian ka pugtian no igbogoy ku to Magboboot ka kara panganoy no lukos to kara aanakan, woy og-ulian ku ka kara panganoy no anak no lukos ku.’ 16 Woy og-unawa to duon tuus to boad nu woy no duon indanan to bukod nu no igpadoromdom koikow no pig-aap kow to Magboboot ligkat to Ehiptu pinabadyo to boad din no mabogbog.”
Pogtalipag to Dagat
17 To nigbabali on si Parao to pogpohipanow to mgo otow, waro sikandan aapa to Magboboot to daan no nigbadyo to tano to Filistihanon no mgo otow, agad no madmarani sikan. Hoo su nigdoromdom ka Magboboot to “Naugpa ko og-atuan sikandan dio to daan, ogkohutuk ka goinawa ran no oglibong sikandan to Ehiptu.”
18 No sikan ian pigtuon sikandan to Magboboot to daan to han-hanawan pohondio to Malaab no Dagat. Pig-aap to mgo otow to Israil ka mgo panganiban dan to nigligkat sikandan to Ehiptu.
19 Pig-aap ni Mosis ka mgo bokog ni Jose, su pigpapangulibotan ni Jose ka mgo suod din no mgo anak ni Israil no nignangon sikandin to “Ian ian ogkapangabangan kow to Magboboot, woy ko oglopow ka sikan no allow, aapa now ka mgo bokog ku puun to soini no ugpaan.”
20 To no-ongkoran dan on ka Sukot, inpamos-ok dan ka mgo tukbung dan duon to Itam to ilis to han-hanawan. 21 Kara allow, nighun-a ka Magboboot kandan pinabadyo to suwoy no gapun odyow to pogtuon kandan to daan, woy kara maukilom nig-unawa sikandin to suwoy no hapuy no ogbat-ow kandan, odyow no ogpokohipanow sikandan agad ko allow woy ko maukilom. 22 Waro nig-awo ka suwoy no gapun to allow woy waro nig-awo ka suwoy no hapuy to maukilom, di nigpalinggaat dio to tangkaan to mgo otow.