14
1 No nigkagi ka Magboboot ki Mosis to, 2 “Nangoni nu ka mgo otow to Israil to pogliku no oglibong sikandan to Pi-hahirotataliwaro to Migdol woy to dagat, woy igpamos-ok dan ka mgo tukbung dan dio marani to dagat no ogtangko to Baal-sipon. 3 Ogdoromdomon ni Parao no ‘Naagak ka mgo otow to Israil no niglougloug dio no nalibutan sikandan to han-hanawan.’ 4 Woy igpamakogal ku ka goinawa ni Parao odyow no oggaponon din sikandan. Di ogkasadyo a now tongod to oghimuon ku ki Parao woy to mgo sundau rin, woy ogkataga ka mgo otow to Ehiptu no sikoddi ian ka Magboboot.” No sikan ian ka pighimu to mgo otow to Israil.
5 To nakarinog on si Parao no igbudyag to Ehiptu no nan-awo on ka mgo otow, nohutuk ka goinawa rin duma to mgo hibatoon din no kagi ran to “Nokoy soini no pighimu ta? Piglokaan ta ka mgo otow to Israil woy kuntoon konad ogtarabau sikandan kanta!”
6 No inpohimpod din ka unturanan din, woy pigparuma rin ka mgo sundau rin. 7 Pigparuma rin ka hon-om no gatus no maddodyow no mgo unturanan, woy ka duma pad no mgo unturanan, woy ka tibon mgo igbudyag no nig-aap to sikan. 8 Pigpamakogal to Magboboot ka goinawa ni Parao no igbudyag to Ehiptu odyow no oggaponon din ka mgo otow to Israil. Di nighipanow ka mgo otow to Israil to waro pogkahallok. 9 Nigsundul ka mgo matig Ehiptu (ian ka tibon mgo kuddo ni Parao, woy mgo unturanan woy mgo sundau no nig-untud to mgo kuddo woy ka duma pad no mgo sundau) woy nasaponan dan ka mgo otow to Israil dio to pigpangpos-okan dan to mgo tukbung dan marani to dagat to Pi-hahirot no nigtangko to Baal-sipon. 10 To nigmarani on si Parao, nigtonggak ka mgo otow to Israil, woy nakita ran ka mgo matig Ehiptu no niggapon kandan. Nohinhinaatan sikandan woy nigdorokul sikandan duon to Magboboot.
11 Nigkagi sikandan ki Mosis to “Naan nu buwa no waro mgo lobonganan duon to Ehiptu no sikan ian no pig-aap koy nu kai to han-hanawan odyow to pogkamatoy? Nokoy soini no pighimu nu kanami to pog-aap kanami ligkat to Ehiptu? 12 Waro ka mogdoromdom no pignangonan noy sikoikow dio to Ehiptu to ‘Dokag ulingol kanami; baagara koy nu to pogtarabau to mgo matig Ehiptu’? Marodyow pad nasi ko nigparagas koy to pogtarabau dio to Ehiptu odyow kono koy poron ogkammatoy kai to han-hanawan.”
13 Nigtabak si Mosis to mgo otow no kagi “Dokow ogkahallok. Po-onong-onong kow ro woy pipitow kow to kalipuwasan no ogligkat to Magboboot kuntoon no allow. Kono now ogkitoon oghutuk ka mgo matig Ehiptu no ogkitoon now kuntoon no allow. 14 Ka Magboboot ian ka ogpangabang kaniu; sikaniu ogpo-onong-onong kow ro atag.”
15 No nigkagi ka Magboboot ki Mosis to “Manio to pig-umow a nu ro? Nangoni nu ka mgo otow to Israil to pogparagas. 16 Puruta nu ka tukod nu woy ikawoy nu ka boad nu ampow to dagat odyow to pogbaad to woig to daruwa odyow no ogpakabadyo ka mgo otow to Israil taliwaro to dagat no ogdiok sikandan to mammara no tano. 17 Ogpamakogaon ku ka goinawa to mgo matig Ehiptu odyow no oggaponon kow ran, woy ogkasadyo a tongod ki Parao woy to mgo sundau rin woy mgo unturanan din woy mgo sundau no nig-untud to mgo kuddo. 18 Ogkataga on ka mgo matig Ehiptu no sikoddi ian ka Magboboot to allow no ogkasadyo a tongod ki Parao woy to kandin no mgo unturanan woy to mgo sundau no nig-untud to mgo kuddo.”
19 Nighalin ka diwata to Magboboot ligkat to poghipanow rin to tangkaan to mgo otow to Israil, no nighondio sikandin to koiniugan dan. Songo nighalin ka suwoy no gapun ligkat to tangkaan dan pohondio to poka ran, 20 no nigpataliwaro to mgo kasundauhan to mgo matig Ehiptu woy to mgo otow to Israil. To tibon kaukiloman nigbogoy ka gapun to dooman dio to limang woy kaadyag dio to limang, odyow kono ogpokogdani ka daruwa no koot-otawan to tibon kaukiloman. 21 No pigkawoy ni Mosis ka boad din to ampow to dagat, woy to sikan no tibon maukilom pigpo-awo to Magboboot ka dagat pinabadyo to maagbot no kaamag ligkat to ogsilaan woy no duon mammara no tano. Nabaad ka mgo woig, 22 woy nigtalipag ka mgo otow to Israil to dagat pinabadyo to mammara no tano no duon aad to woig dio to kawanan dan woy dio to gibang dan. 23 Niggapon ka mgo matig Ehiptu, lagkos to tibon mgo kuddo ni Parao, mgo unturanan woy mgo otow no nig-untud to kuddo dio to dagat no nigsundul to mgo otow to Israil. 24 To magaan ogsilo ka allow, nigpantow ka Magboboot ligkat to suwoy to hapuy woy gapun duon to kasundauhan to Ehiptu, woy pigsasow rin sikandan. 25 Pigpapanloko din ka mgo ligid to mgo unturanan dan odyow no maugon ka pogparagas dan. Nigmonang-nangonoy ka mgo otow to Ehiptu to “Ogpanlaguy ki ligkat to mgo otow to Israil! Pig-atuan to Magboboot ka Ehiptu woy pigbuligan din sikandan.”
26 No nigkagi ka Magboboot ki Mosis to “Ikawoy nu ka boad nu ampow to dagat odyow no oglibong ka mgo woig no ogkaop-lopan ka mgo otow to Ehiptu lagkos to mgo unturanan dan woy to mgo nig-untud to kuddo.”
27 Nigkawoy si Mosis to boad din ampow to dagat, woy to pogsilo to allow niglibong ka dagat to nalongoran din. Nigpanlaguy porom ka mgo matig Ehiptu di pigpanlonod sikandan to Magboboot duon to dagat. 28 Nigtu-aug ka woig no niglibong no naop-lop ka mgo unturanan woy ka mgo nig-untud to kuddo. Nanundul ka tibon mgo sundau ni Parao to mgo otow to Israil pohondio to dagat. Waro agad sagboka kandan no nalipuwas. 29 Di nigtalipag ka mgo otow to Israil to dagat pinabadyo to mammara no tano no duon aad no woig dio to kawanan dan woy dio to gibang dan. 30 To sikan no allow, pigpangabangan to Magboboot ka mgo otow to Israil ligkat to mgo boad to mgo otow to Ehiptu, woy nakita to mgo otow to Israil ka mgo lawa to nammatoy no mgo otow to Ehiptu no nanakaoy-ang dio to ilis to dagat. 31 Woy to pogkakita to mgo otow to Israil to sikan no dakol no kabogbogan to Magboboot no inpakita rin to pog-atu rin to mgo matig Ehiptu, nanahallok ka mgo otow to Magboboot, woy nigtuu sikandan kandin woy to suguanon din no si Mosis.