15
Ka Uranda ni Mosis woy ni Miriam
1 No nigmang-uranda si Mosis woy ka mgo otow to Israil to soini no uranda duon to Magboboot:
“Og-uranda a duon to Magboboot su litos no ogsadyoon sikandin.
Inpandogsang din ka kuddo woy ka nig-untud to sikan dio to dagat.
2 Ka Magboboot ian ka dadyagang ku woy ka og-urandahon ku.
Nohimu sikandin no kalipuwasan ku.
Sikandin ka Igbudyag ku woy ogsadyoon ku sikandin.
Sikandin ka Igbudyag to amoy ku woy ogparakoon ku sikandin.
3 Bagani ka Magboboot; pighingaranan sikandin no Magboboot.
4 Inpandogsang din ka mgo unturanan ni Parao woy ka kasundauhan din dio to dagat.
Naonod on ka in-aam no mgo igbudyag to mgo sundau ni Parao dio to Dagat no Malaab.
5 Nabunbunan sikandan to maraom no mgo woig;
nig-anlod sikandan iing to batu no nighondio to diraom.
6 Ogkasadyo ka kabogbogan to kawanan no boad nu Magboboot.
Ka kawanan no boad nu, Magboboot, ian ka niglupot to usig.
7 Pinabadyo to dakol no kabogbogan nu, intugdo nud ka mgo nig-atu koikow.
Pino-uang nu ka kabou nu no niglogdog woy nasilaban sikandan iing to dagami.
8 Pinabadyo to hiup to irong nu, nalimud ka mgo woig.
Nigsasindog ka woig no mabolbol no nig-unawa to aad.
Nigkotok ka mgo maraom no woig dio to taliwaro to dagat.
9 Nigbabantak ka usig to pogkagi rin to “Oggaponon ku sikandan woy ogsaponon ku sikandan. Ogbaadbaaron ku ka mgo og-agawon ku; woy ogkaantoy a to mgo ogkapurut ku. Oghuabut a to kampilan ku woy ogpanghimatadyan kud sikandan.”
10 Di pighiup nu ka goinawa nu, woy pigbunbunan sikandan to dagat.
Nighondio sikandan to diraom unawa’t palibatu duon to mabogbog no mgo woig.
11 Hontow duon to mgo pigtuuhan to mgo otow no unawa koikow Magboboot?
Hontow ka unawa koikow mabogat-bogat no in-oog, no ogkohinhinaatan to kabogbogan no ogpokohimu to mgo ogkabol-boongan?
12 Pigkawoy nu ka kawanan no boad nu, woy pig-aboong sikandan to tano.
13 Pinabadyo to dakol no goinawa nu no kono ogkatampod, ogtuonon nu ka pig-ulian no koot-otawan nu.
Pinabadyo to kabogbogan nu, og-aapon nu sikandan pohondio to in-oog nu no ugpaan.
14 Ogdinog ka duma no mgo koot-otawan, woy ogpangol-koon sikandan, ogkahallok lagboy ka mgo otow to Filistia.
15 Ogpangombu-kombuan ka mgo datu to Idom, woy ogpangol-koon ka mgo igbudyag to Moab, woy ogmamanlaguy ka mgo otow to Canaan, 16 su ogkakahallok woy ogko-ook-ook sikandan.
Pinabadyo to kabogbogan to bakaawan nu, Magboboot, og-onong-onong sikandan unawa to batu taman to ogkaligaran on sikandan to koot-otawan nu, Magboboot, ian ka koot-otawan no pigboli nu.
17 Og-aapon nu sikandan woy igpos-ok nu sikandan duon to bubungan to tugun-tugun nu, ian Magboboot ka longod no pighimu nu woy no ingkannugun odyow no og-ugpaan nu.
18 Koikow ka ogboot, Magboboot, taman to katamanan.”
19 To nighondio ka mgo kuddo woy mgo unturanan woy mgo otow ni Parao dio to dagat, inpalibong to Magboboot ka mgo woig odyow no ogkabunbunan sikandan, di nanghipanow ka mgo otow to Israil taliwaro to dagat duon to mammara no tano.
20 Si Miriam ian ka atoboi ni Aaron woy taagtagna sikandin. No nigpurut si Miriam to paragingonon din no tamburin, woy nigmansundul ka tibon mgo boi kandin no songo nigsadyow no nig-aap to mgo tamburin.
21 Nig-uranda si Miriam kandan to: “Uranda kow duon to Magboboot su litos no ogsadyoon sikandin. Inpandogsang din ka kuddo woy ka nig-untud to sikan dio to dagat.”a
Ka mgo Woig to Mara woy Elim
22 No takas to sikan, pig-aap ni Mosis ka koot-otawan to Israil ligkat to Malaab no Dagat pohondio to han-hanawan to Sur. Sood to tatou no allow nighip-hipanow sikandan duon to han-hanawan no waro woig no nakita ran.
23 To poglopow ran to Mara, waro sikandan nokoinom to woig no duon su mapoit. (Sikan ian ka kaogsaran to Mara; mapoit.) 24 No nig-aaras ka mgo otow duon ki Mosis no kagi “Nokoy naan ka og-inomon ta?”
25 No nig-umow si Mosis to Magboboot, woy nigpakita ka Magboboot kandin to sagboka no kadyu. Intugdo ni Mosis ka kadyu duon to woig, woy nigmoomis ka woig. No nigbogoy ka Magboboot kandan to udlin, woy pig-ol-oogan din sikandan dio. 26 Kagi rin to “Ko ogdorodyow kow to pogpamminog to lagong to Magboboot no Igbudyag now, woy ko oghimu kow ko nokoy ka litos to kandin no pogpitow, ko ogpannalinga kow to tibon mgo sugu din woy ogbabali kow to tibon mgo udlin din, kono ku ogpa-aapan sikaniu to mgo dau no inpa-aap ku to mgo otow to Ehiptu, su sikoddi ian ka Magboboot no ogdorodyow kaniu to mgo dau now.”
27 No nigparagas sikandan pohondio to Ilim, woy duon sampuu woy daruwa no mgo sobsob dio, woy songo duon kapituan no mgo palmira,bwoy namos-ok sikandan to mgo tukbung dan dio to ilis to woig.