16
Manna woy mgo Pugu
1 Ligkat to Ilim, to igkasampuu woy lalima no allow to igkarangob on no buwan takas to nigligkat sikandan to Ehiptu, nighipanow ka tibon koot-otawan to Israil pohondio to han-hanawan to Sin duon to taliwaro to Ilim woy to Sinai. 2 Dio to han-hanawan nig-aaras ka tibon koot-otawan duon ki Mosis woy ki Aaron. 3 Kagi to mgo otow to Israil to “Madmarodyow poron ko nammatoy koy to logpad to Magboboot dio to Ehiptu! Hoo su to dio koy, niglinglingutan noy ka mgo kuron no naponu to sapu, woy nabuung koy to pogkoon, di pig-aap koy now kai to han-hanawan odyow no ogkoubus koy no songo koot-otawan no ogkammatoy to gutas.”
4 No nigkagi ka Magboboot ki Mosis to “Ogpouranan ku sikaniu to pan ligkat to langit. Ogmanlibuwas ka mgo otow allow-allow woy oglimuron dan ka litos to sikan no allow. Soini ka oghimuon ku to pog-ol-oog kandan odyow to pogpitow ko ogbabali sikandan to mgo udlin ku. 5 To igkohon-om no allow, oglimuron dan ka koonon dan no daruwa no akob to ogpamuruton dan to duma no mgo allow.”
6 No nigkagi si Mosis woy si Aaron duon to mgo otow to Israil to “Kuntoon no pogkatangkob ogkataga kow no ka Magboboot ian ka nig-aap kaniu ligkat to Ehiptu, 7 woy to masoom ogpakakita kow to kabogbogan to Magboboot, su nakarinog sikandin kaniu no nig-aaras kandin. Konon sikanami ka pig-aarasan now su mgo suguanon koy rin do.”
8 Kagi pa ni Mosis to “Ogkataga kow no ka Magboboot ian ka nigbulig kaniu ko ogkabogadyan kow rin to sapu to pogkatangkob woy ko ogkabuung kow to pan to masoom, hoo su nigdinog sikandin to pog-aaras now kandin. Hontow koy man? Konon sikanami ka pig-aarasan now ko konon ka Magboboot.”
9 No nigkagi si Mosis ki Aaron to “Nangoni nu ka tibon koot-otawan to Israil to ‘Dani kow to Magboboot su nigdinog sikandin to pog-aaras now.’”
10 To pogkagi ni Aaron duon to tibon koot-otawan to Israil, nigpitow sikandan pohondio to han-hanawan, woy nakita ran ka kabantug to Magboboot duon to gapun. 11 Nigkagi ka Magboboot ki Mosis to, 12 “Narinog ku ka pog-aaras to mgo otow to Israil. Nangoni nu sikandan no ‘to pogsaop to allow, ogpakakoon kow to sapu, woy to masoom ogkabuung kow to pogkoon to pan. No sikan ian ogkataga kow no sikoddi ian ka Magboboot no Igbudyag now.’”
13 To sikan no allow to pogkatangkob niglopow ka mgo pugu no nigtangkap to pig-ugpaan to mgo otow, woy to pogkapawo duon domhug no nakalingut to pig-ugpaan dan. 14 To pogboklas on to domhug, duon nagaat dio to tano to han-hanawan no inat mgo nankotok no natok. 15 To pogkakita to mgo otow to Israil to sikan, nigmanangnangonoy sikandan to “Nokoy sikan?” hoo su waro sikandan mataga ko nokoy buwa sikan. Nigkagi si Mosis kandan to “sikan ian ka pan no inbogoy to Magboboot no ogkoonon now. 16 Soini ka insugu to Magboboot: ‘Kara otow ogpamurut ko pila ka litos kandin. Pamurut kow to songo gantangato kara otow no nig-ugpo to tukbung now.’”
17 Nigbabali ka mgo otow to Israil to insugu kandan; duon nigpamurut to dakol woy duon nigpamurut to maintok. 18 To pogsokod dan pinabadyo to gantang, waro sobra to sikan no nigpamurut to dakol, woy waro kulang to sikan no nigpamurut to maintok; hoo su kara sagboka nigpamurut ko pila ka og-awoson to lunggunan din. 19 No nigkagi si Mosis kandan to “Dokow ogpohipawoi ka samo.”
20 Di waro mogpannalinga ka duma kandan ki Mosis; pighipawoan dan ka samo, di pig-uod-uoran on woy nigmasongot on. No nabou si Mosis kandan. 21 Kara masoom nigpamurut sikandan ko pila ka litos dan, woy to pogmoinit to allow nigtunow ka nagaat to tano. 22 To igkohon-om no allow, pigpamurut dan ka daruwa no akob to duma no mgo allow. Ian pigpamurut dan ka daruwa no gantang to kara otow. No niglibuung ka mgo igbudyag to koot-otawan woy pignangonan dan si Mosis to ran. 23 Nigkagi si Mosis kandan to “Soini ka sugu to Magboboot: ‘Asoom ogkohimu no allow to poghimooy, igkapitubno allow no in-oog to Magboboot. No sikan ian tuuga now ko nokoy ka ogkoiniatan now, woy ogsugba kow ko nokoy ka ogkoiniatan now. Samaa now ka samo odyow no ogkoonon now to pogkapawo.’”
24 No pigsamo dan taman to pogkapawo unawa to innangon ni Mosis woy waro mogmasongot woy waro pig-uod-uoran. 25 Kagi ni Mosis to “Koona now kuntoon no allow ka samo, su allow no in-oog to Magboboot ka kuntoon. Kono kow ogpakakita to ogkakoon now dio to tano kuntoon no allow. 26 Ogpamurut kow sood to hon-om no allow, di to igkapitu no allow, ka Sabat, kono kow ogpakakita to sikan.”
27 Agad no pignangonan sikandan, duon mgo otow no niglibuwas to igkapitu no allow odyow to pogpamurut to koonon, di waro nakitaan dan. 28 No nigkagi ka Magboboot ki Mosis to “Monu kaugoy no ogligal kow to pogbabali to mgo sugu ku woy mgo ingkagi ku? 29 Doromdoma now no pigbogadyan kow to Magboboot to allow to poghimooy; sikan ian ka pugtian no ogbogoy sikandin kaniu to pan no litos to daruwa no allow kara igkohon-om no allow. To igkapitu no allow og-uugpo kow ro; waro otow no oghip-hipanow ian.”
30 No sikan ian no nighimooy ka mgo otow to igkapitu no allow. 31 Pighingaranan to mgo otow to Israil ka pan no ‘manna’c. Maputi ka manna woy ka nanam din unawa to kabkab no balanghoy no pig-amutan to tonob. 32 Nigkagi si Mosis to “Soini ka insugu to Magboboot, kagi: ‘Purut kow to songo gantang to manna, woy ikannugun now odyow no ogkitoon to mgo tipouri now, odyow no ogkitoon dan ka pan no inbogoy ku kaniu duon to han-hanawan to pog-aap ku kaniu ligkat to Ehiptu.’”
33 No nigkagi si Mosis ki Aaron to “Purut ka to kuron woy tagui nu to songo gantang no manna. Isabuk nu dio to tangkaan to Magboboot odyow no ikannugun now to tipouri now.”
34 Sumao to insugu to Magboboot ki Mosis, nigpurut si Aaron to manna woy insabuk din to tangkaan to Magboboot odyow no igkannugun pad. 35 Nigkoon ka mgo otow to Israil to manna sood to kohop-atan no tuid taman to niglopow sikandan to ugpaanan dan; ian nigkoon sikandan to manna taman to noko-uma sikandan to oatanan to Canaan.
36(Ogkohimu no sagboka no ipadka sampuu no omir.)