17
Woig ligkat to Batu
1 Nighipanow ka tibon koot-otawan to Israil ligkat to han-hanawan to Sin, woy nighip-hipanow sikandan sumao to mgo sugu to Magboboot. Namos-ok sikandan to mgo tukbung dan to Ripidim, di waro woig no ogko-inom to mgo otow. 2 No nig-atu sikandan ki Mosis no kagi ran to “Bogadyi koy to ogko-inom noy no woig.” Nigtabak si Mosis to “Manio to pig-atuan a now? Manio to pig-ol-oogan now ka Magboboot?”
3 Di tongod su nammaraan ka mgo otow dio, nig-aaras sikandan ki Mosis. Nigkagi sikandan to “Manio to pig-aap koy nu ligkat to Ehiptu odyow no ogkammatoy koy to waro woig duma to mgo anak noy woy mgo adyam noy?” 4 No nigpangiak si Mosis duon to Magboboot no kagi rin to “Ogmonuon ku ka soini no koot-otawan? Magaan a ran ogdorogpaka to batu.”
5 Nigtabak ka Magboboot ki Mosis to “Hipanow ka hun-a to mgo otow. Iparuma nu ka mgo igbudyag to Israil woy komkoma nu ka tukod nu no inlampos nu to Nilu no woig. 6 Oghasindog a dio to tangkaan nu dio to batu to Horib. Lamposi nu ka batu, woy oglibuwas ka woig no ogko-inom to mgo otow.” No sikan ian ka pighimu ni Mosis to tangkaan to mgo igbudyag to Israil. 7 Pighingaranan ni Mosis ka sikan no ugpaan to Masa woy Miriba su nig-atu ka mgo otow to Israil dio, woy su pig-ol-oogan dan ka Magboboot dio no nigkagi sikandan to “Nigduma buwa ka Magboboot kanta ko waro?”a
Mangadyow duon to mgo kapunganan ni Amalik
8 Niglopow ka mgo kapunganan ni Amalik, woy piglusuran dan ka mgo otow to Israil no dio to Ripidim. 9 Nigkagi si Mosis ki Josue to “Aam ka to mgo otow ta, woy hondio kow no ogmangadyow kow dio to mgo kapunganan ni Amalik. Asoom no allow oghasindog a to igdus to bubungan no ogkomkomon ku ka tukod to Magboboot.”
10 No sikan ian nigmangadyow si Josue to mgo kapunganan ni Amalik sumao to sugu ni Mosis, tagood nighondio si Mosis duma ki Aaron woy ki Hur dio to igdus to bubungan. 11 Ko ogkawadyon ni Mosis ka mgo boad din, og-ituos ka mgo kapunganan ni Amalik, di ko ogtuntunan din ka mgo boad din, og-ituos ka mgo otow to Israil. 12 To nabooy on ka mgo boad ni Mosis, pigpurut dan ka sagboka no batu woy pigsabuk dan odyow no ogkapinnuuan ni Mosis, woy piggon-gonan ni Aaron woy ni Hur ka mgo boad din, no sagboka kandan dio to gibang din woy ka dangob dio to kawanan, no sikan ian no waro nigwoil ka mgo boad ni Mosis taman to pogkatangkob. 13 No naroog ni Josue ka mgo sundau to mgo kapunganan ni Amalik pinabadyo to kampilan.
14 No nigkagi ka Magboboot ki Mosis to “Sulati nu soini to linuun no sulatanan odyow no ogkaroromdom, woy ligdongi nu no ogdinog si Josue to soini: og-awoon ku ka tibon koot-otawan ni Amalik to diraom to langit odyow no konad ogkaromdoman sikandan.”