18
Piglouy ni Jitro si Mosis
1 No kuntoon, nigdinog si Jitro no taagpanubad to Midian no anugang ni Mosis moitongod to tibo no pighimu to Magboboot ki Mosis woy to koot-otawan din, woy ko pigmonu to pog-aap to Magboboot ka koot-otawan to Israil ligkat to Ehiptu. 2 Inpohun-a ni Mosis ka asawa rin no si Sipora pohondio to ki Jitro no anugang ni Mosis, woy pig-otow-otow ni Jitro ka anak din. 3 Songo nigduma ki Sipora ka daruwa no anak dan no lukos. Ka sagboka no anak ni Mosis pighingaranan ki Girsomasu nignangon si Mosis to “Nohimu a no dagpu to loin no ugpaan”; 4 ka dangob no anak din pighingaranan ki Eliisirbsu nignangon si Mosis to “Ka Magboboot no Igbudyag to amoy ku ian ka nigbulig koddi no pigpangabangan a rin ligkat to kampilan ni Parao.”
5 Nighipanow si Jitro no anugang ni Mosis duma to mgo anak woy asawa ni Mosis no nigtomu ki Mosis to han-hanawan dio to napos-okan din to tukbung din marani to bubungan to Magboboot. 6 Hoo su nigtugun on si Jitro kandin to “Oghondio a’t koikow; sikoddi no si Jitro no anugang nu, duma to asawa nu woy mgo anak nu no daruwa.” 7 No sikan ian niglibuwas si Mosis odyow to pogtomu to anugang din, woy nig-unduk si Mosis woy pigharokan din si Jitro. Nangumusta sikandan woy nigsood sikandan to tukbung ni Mosis. 8 Pignangonan ni Mosis ka anugang din to tibo no pighimu to Magboboot ki Parao woy mgo otow to Ehiptu tongod to koid-u rin to koot-otawan to Israil, woy moitongod to mgo badyadbadyad no niglopow kandan dio to daan, woy ko pigmonu pogpangabang to Magboboot kandan. 9 Narago lagboy si Jitro to pogpamminog din to tibon marodyow no hinimuan to Magboboot to pogpangabang din to koot-otawan to Israil ligkat to boad to mgo matig Ehiptu. 10 Kagi rin to “Sadyoon ka Magboboot no nigpangabang kaniu ligkat to boad to mgo otow to Ehiptu woy ni Parao woy no nighawi to koot-otawan ligkat to boad to mgo matig Ehiptu. 11 Nataga ad kuntoon no ka Magboboot naan ian ka mabogbog pad to tibon duma no tinuuhan, su sikan ian ka pighimu rin to mgo otow no nigsamili to mgo otow to Israil.”
12 No nigpurut si Jitro no anugang ni Mosis to mgo adyam woy pigtutung din no inpanubad duon to Magboboot. Niglopow si Aaron duma to tibon mgo igbudyag to Israil woy nigkoon sikandan to pan duma to anugang ni Mosis dio to tangkaan to Magboboot.
13 To pogkapawo, nigpinnuu si Mosis odyow to poghusoy to mgo nasasowan to mgo otow, woy niglinglingutan sikandin to mgo otow ligkat to masoom pohondio to pogkatangkob to allow. 14 To pogkakita to anugang ni Mosis to tibo no pighimu rin dio to mgo otow, nig-inso sikandin to “Nokoy soini no oghimuon nu dio to mgo otow? Manio no sikoikow ro sagboka ka nighusoy to mgo otow tagood no nigpo-onong-onong do soini no mgo otow no niglingut koikow ligkat to masoom pohondio to pogkatangkob to allow?”
15 Nigtabak si Mosis to “Hoo su ogmanlopow ka mgo otow kai’t koddi odyow to pog-inso ko nokoy ka pogboot to Magboboot. 16 Ko duon oghusadyon dan, og-aapon dan kai to koddi woy sikoddi ian ka oghusoy to daruwa no nigpoog-ogotoy, woy ognangonan ku sikandan to mgo udlin woy mgo balaod to Magboboot.”
17 Nigtabak ka anugang ni Mosis kandin to “Konon marodyow soini no pighimu nu. 18 Ogkabooy ka duma to soini no mgo otow no ungud oglopow koikow. Mabogat to koikow soini no tarabau; kono ogkagoon to sagboka nu ro no otow. 19 Pamminogi a nu pa woy ognangonan ka to marodyow woy ogbuligan ka poron to Magboboot. Sikoikow ian ka ogtangko to Magboboot tongod to soini no mgo otow, woy koikow ka og-aap to mgo husadyonon dan kandin. 20 Anara nu sikandan to mgo udlin woy mgo sugu, woy tuona nu sikandan ko ogmomonu sikandan to pog-ugpo, woy ko nokoy ka mgo oghimuon dan no litos. 21 Di, aam ka to mgo otow mougsob; mgo otow ian no ogkahallok to Magboboot, mgo otow no ogkasaligan no kono ian ogpanluku woy tinurua nu sikandan no ogkohimu sikandan no mgo igbudyag to linibu, ginatus, tagkalimmaan woy tagsampuu no mgo otow. 22 Sikandan ka oghimuon nu no mgo taaghusoy to mgo otow, woy ka mgo moirap naan do no mgo husadyonon ka og-aapon dan kai to koikow; sikandan ka oghusoy to ma-agkap no mgo ingkasasow. No sikan ian ogma-agkap ka ogtiangonon nu su duon mgo duma no ogbulig koikow. 23 Ko ogsugu ka Magboboot koikow woy oghimuon nu soini, ogkagoon nu ka tarabau nu, woy ogman-uli soini no mgo otow no ogkarago sikandan.”
24 Nigpannalinga si Mosis to innangon to anugang din, woy pighimu rin ka tibo no ingkakagi rin. 25 Nig-aam sikandin to mgo otow no mougsob ligkat to koot-otawan to Israil, woy pigtinuru din sikandan no nohimu sikandan no mgo igbudyag to mgo otow. Duon nigboot to songo libu, duon taggatus, duon tagkalimmaan woy duon tagsampuu. 26 Sikandan ka no mgo taaghusoy to mgo otow to tibon mgo allow. Nig-aap sikandan to mgo mabogat no husadyonon dio ki Mosis, di sikandan ka nighusoy to mgo ma-agkap.
27 No pigpohipanow ni Mosis ka anugang din, woy nig-uli si Jitro to kandin no pig-ugpaan.