19
Poglopow to Bubungan to Sinai
1 To pogligad on to tatou no buwan ligkat to pog-ongkod dan to Ehiptu, niglopow ka mgo otow to Israil dio to han-hanawan to Sinai. 2 Takas to nighipanow sikandan ligkat to Ripidim, noko-uma sikandan to han-hanawan to Sinai, woy namos-ok ka mgo otow to Israil to mgo tukbung dan dio to tangkaan to bubungan. 3 No nigtakorog si Mosis no nigdani to Magboboot, woy nig-umow ka Magboboot kandin dio to bubungan no kagi “Soini ka inangon nu to lunggunan ni Jacob ian ka igkagi nu dio to koot-otawan to Israil: 4 ‘Nakita now ian ko nokoy ka pighimu ku to Ehiptu, woy ko pigmonu ku to pog-aap kaniu kai to koddi no inat nig-untud kow to pakpak to kuligi. 5 No kuntoon ko ogpannalinga kow to tibon mgo kagi ku woy ko ogbabalion now ka kasabutan ku, ogkohimu no sikaniu ka ingkannugun ku no koot-otawan taliwaro to tibon mgo koot-otawan. Agad no koddi ka tibo to kalibutan, 6 ogkohimu kow no pandatuan to mgo taagpanubad, woy in-oog no koot-otawan.’ Sikan ian ka inangon nu to mgo otow to Israil.”
7 No niglibong si Mosis woy pig-umow rin ka tibon mgo igbudyag to koot-otawan, woy pignangonan din sikandan to tibon mgo kinagian to Magboboot no insugu kandin no ogkagion.
8 Nantabak ka tibon mgo otow to “Oghimuon noy ka tibo no innangon to Magboboot.” No niglibong si Mosis duon to Magboboot no nig-aap to tabak dan.
9 Nigkagi ka Magboboot ki Mosis to “Oglopow a koikow duon to sagboka no makopal no gapun odyow no ogdinog ka mgo otow koddi no nig-a-aukuy koikow odyow no ogsalig sikandan koikow ladyun.” No nignangon si Mosis to Magboboot ko nokoy ka innangon to mgo otow. 10 Woy nigkagi ka Magboboot ki Mosis to “Hondio ka to mgo otow woy papanaganaa nu sikandan kuntoon woy asoom no allow odyow to pogtangko koddi. Papami-pia nu sikandan to mgo sabinit dan 11 odyow no to igkatou no allow litos on ka pogpanagana ran, su to sikan no allow oglogsad ka Magboboot duon to bubungan to Sinai to tangkaan to mgo otow. 12 Indani nu ka oatan to bubungan woy nangoni nu ka mgo otow to ‘Ligdongi now no kono kow ogtakorog dio to bubungan woy agad to pogdiok dio to linogsaran to sikan. Ko hontow ka ogdiok to bubungan ogkohimatadyan ian. 13 Ogkohimatadyan sikandin pinabadyo to pogdogpak to batu woy ko pinabadyo to tunud, odyow no waro otow no ogsamsam kandin. Agad ko otow woy ko adyam kono ogkagaat no manokal.’ Woy on ogpakatakorog ka mgo otow to bubungan ko ogparagingon on ka budyung no sungay to kambing to maadyat no daging.”
14 Takas to niglogsad si Mosis ligkat to bubungan pohondio to mgo otow, pigpapanagana rin sikandan to pogtangko to Magboboot, woy pigpami-pian dan ka mgo sabinit dan. 15 No nigkagi sikandin to mgo otow to “Panagana kow tongod to igkatou no allow. Dokow ogpohul-huliroy.”
16 To masoom to igkatou no allow, duon kilat woy lugung, woy makopal ka gapun to ampow to bubungan woy duon maagbot no daging to budyung. Nangolkol ka tibon mgo otow to pig-ugpaan dan. 17 No pig-aap ni Mosis ka mgo otow ligkat to pig-ugpaan dan odyow to pogtangko to Magboboot, woy nigpo-onong-onong sikandan to linogsaran to bubungan. 18 Nabunbunan to obol ka bubungan to Sinai su niglogsad ka Magboboot dio pinabadyo to hapuy. Makopal lagboy ka obol unawa to obol to pogpu-puag, woy naunggat ka tibon bubungan, 19 woy nig-ungud nigmaagbot ka daging to budyung. No nigkagi si Mosis woy pigtabak sikandin to lagong to Magboboot. 20 Niglogsad ka Magboboot pohondio to igdus to bubungan to Sinai, woy pig-umow rin si Mosis to poghondio to ampow to bubungan. No nigtakorog si Mosis 21 woy pignangonan sikandin to Magboboot to “Logsad ka pa no nangoni nu ka mgo otow odyow no kono ogpogos sikandan to pogdani to Magboboot su moon-ing kandan ka ogkammatoy ian. 22 Agad ka mgo taagpanubad, ko ogdani sikandan to Magboboot, ogpanagana panoy sikandan odyow no kono oglogparan sikandan to Magboboot.”
23 Nigtabak si Mosis to Magboboot to “Kono ogpakatakorog ka mgo otow to bubungan su nignangon ka kanami to ‘Indani nu ka oatan to bubungan woy i-oog nu ka bubungan.’”