20
Ka Sampuu no Sugu
1 Woy nigkagi ka Magboboot to soini tibon mgo udlin:
2 “Sikoddi ian ka Magboboot no Igbudyag now no nig-aap kaniu ligkat to Ehiptu, ligkat to pogko-uripon now dio.
-1-
3 “Waro loin no tinuuhan no ogga-aton nu ko konon sikoddi do.
-2-
4 “Kono ka oghimu to inotowotow no duon langlanguan to agad nokoy no duon to langit to ampow woy ko duon to tano woy ko duon to woig to diraom. 5 Kono ka og-unduk to unawa to sikan no tinuuhan woy kono ka ogsadyo to sikan; hoo su sikoddi no Magboboot no Igbudyag nu ian sagboka no Igbudyag no talikuron, no oglogparan ku ka mgo anak tongod to mgo sao to mgo amoy pohondio to igkatou woy igkohop-at no kapunganan ko og-usigon a ran, 6 di ipakita ku ka dakol no goinawa ku dio to songo libu no kapunganan to mgo otow no ogdakol to goinawa ran koddi woy no ogbabali to mgo sugu ku.
-3-
7 “Kono nu ogkagia ka ngaran to Magboboot no Igbudyag nu to konon litos no pogkagi, hoo su kono ogdoromdomon to Magboboot no matuarong ka otow no ogdoot to ngaran din.
-4-
8 “Doromdoma nu ka allow to Sabatano i-oog nu sikan to Magboboot. 9 Ogtarabau ka sood to hon-om no allow, no oghipongaon nu ka tibon mgo himuon nu to sikan, 10 di ka igkapitu no allow ian ka Sabat to Magboboot no Igbudyag nu. To sikan no allow kono ka ogtarabau, agad sikoikow woy ka anak nu no lukos woy ko boi, woy ka suguanon nu no lukos woy ko boi, woy ka mgo adyam nu, woy ka dagpu no otow no nig-ugpo sood to lama nu. 11 Hoo su pighimu to Magboboot ka langit woy ka tano, ka dagat woy ka tibo no duon to sikan to hon-om no allow, di to igkapitu no allow nighimooy sikandin. No sikan ian pigboligan to Magboboot ka allow to Sabat woy in-oog din sikan.
-5-
12 “Ilaha nu ka amoy nu woy inoy nu odyow no maadyat ka pog-ugpo nu to tano no igbogoy to Magboboot no Igbudyag nu koikow.
-6-
13 “Kono ka oghimatoy to otow.
-7-
14 “Kono ka oghulid to konon asawa nu.
-8-
15 “Kono ka ogpanakow.
-9-
16 “Kono ka ogbadyung to songo otow to kono'n maogot.
-10-
17 “Kono ka ogko-ima to baoy to songo otow. Kono ka ogko-ima to asawa to songo otow woy ko suguanon din no lukos woy ko boi, woy ko baka rin woy ko asnu rin woy ko agad nokoy no kandin.”
18 To pogkita to mgo otow to kilat woy lugung woy to pogdinog dan to budyung woy pigkita ran no nig-oobol ka bubungan, nangolkol sikandan to kahallok. Nigsagdok sikandan to mariu 19 woy pignangonan dan si Mosis to “Sikoikow ro ka ogkagi kanami woy ogpamminog koy koikow. Di dokag pakagia ka Magboboot kanami su ogkammatoy koy.”
20 Nigkagi si Mosis to mgo otow to “Dokow ogkahallok. Nighondii ka Magboboot odyow to pog-ol-oog kaniu, odyow no kono kow oghimu to sao tongod to kahallok now to Magboboot.”
21 Nigpo-onong-onong do ka mgo otow to madmariu tagood to nigdani si Mosis to makopal no dooman no duon ka Magboboot.
Mgo udlin to mgo Tubaranan
22 No nigkagi ka Magboboot ki Mosis to “Nangoni nu ka koot-otawan to Israil to soini: ‘Nakita now ian no pigkagian ku sikaniu ligkat to langit: 23 Dokow oghimu to mgo inotowotow no songo ogtuuhan now duma koddi; dokow oghimu to mgo inotowotow no bulawan woy ko plata.
24 “‘Himui a now to tubaranan pinabadyo to tano woy dio now tubari ka mgo panubad now no tutungon woy mgo panubad to pogkasagboka no mgo karniru, mgo kambing, woy mgo baka. Ko agad hondoi no longod no igpaila ku to ngaran ku, ogdani a kaniu woy ogboligan ku sikaniu. 25 Ko oghimuan a now to tubaranan pinabadyo to batu, dokow oggamit to pigbasbasan no mgo batu, su ogkohimu no maligsom to pogpitow ku ko ogtarabauon now to putow. 26 Woy dokow ogpanoik pohondio to tubaranan ku pinabadyo to hagoran su naugpa ko ogkakitaan ka lawa nu duon to diraom.’