21
Mgo Udlin to mgo Suguanon
1 “Soini ka mgo udlin no ig-anad nu kandan:
2 “Ko ogboli ka to suguanon no Hibriu no otow, ogtarabau sikandin koikow to hon-om no tuid, di to igkapitu no tuid, ogloka-an nu sikandin no oghipanow sikandin to waro badyad koikow. 3 Ko waro duma rin to poglopow rin koikow, songo waro duma rin to pogligkat din; di ko duon asawa rin poglopow rin, songo ogduma ka boi kandin pogligkat. 4 Ko ogpaasawoon to igbudyag ka suguanon din, woy og-anak ka boi to lukos woy ko boi, ka igbudyag ian tagtuun to boi woy to mgo anak din, ka lukos no suguanon do ka ogpakaligkat.
5 “Di ko naugpa ognangon ka suguanon to ‘Dakol so goinawa ku to igbudyag ku woy to asawa woy mgo anak ku, woy kono a ogkoiniat no ogloka-an a rin,’ 6 no og-aapon sikandin to igbudyag din dio to tangkaan to Magboboot. Og-aap ka igbudyag kandin to longod to lokob woy ko sungkaug to gomawan, woy oglugian din ka talinga to suguanon to putow no iglugi. No ogkohimu no suguanon din sikandin taman to pogkamatoy rin.
7 “Ko duon lukos no ogbaligyo to anak din no boi odyow no ogkohimu no suguanon ka boi, kono ogpakalibuwas ka boi unawa to lukos no suguanon. 8 Ko kono ogkarago to boi ka igbudyag no nig-aam kandin, igpalokat din ka boi. Waro katongod din to pogbaligyo to boi dio to loin no otow; hoo su waro natood to igbudyag ka kasabutan din. 9 Ko ogpa-asawaon to igbudyag ka boi dio to sagboka no anak din no lukos, ogkohimu ka boi no unawa to anak din. 10 Ko og-asawa ka otow to sagboka pad no boi, kono oghagtong sikandin to pogpakoon woy to pogpanginabo woy to pogtuman to mgo katongod to asawa dio to nokohun-a no boi. 11 Ko oghagtong ka lukos to pogbogoy to soini tatou no mgo botang, ogpoko-ongkod ka boi to waro badyad no iglokat.
Mgo Udlin to mgo Po-il
12 “Agad hontow no oglampos to songo otow no ogkamatoy ka otow, songo oghimatadyan now sikandin. 13 Di ko waro din tuura to poghimatoy, di tuud naan do to Magboboot, ogpanlaguy ka otow to sagboka no ugpaan no igtuon ku kaniu. 14 Di ko ogbabantak ka otow no ogtuud sikandin to poghimatoy to songo otow, agad ko ogpanlaguy sikandin to panubaranan ku, puruta now sikandin woy himatadyi now.
15 “Oghimatadyan now agad hontow no og-atu to amoy woy ko inoy rin.
16 “Oghimatadyan now ka agad hontow no ogdakop to songo otow agad ko ogduaron din ka otow woy ko ogkakitaan sikandin no duon dod ka otow.
17 “Oghimatadyan now ka agad hontow no ogtungadyow to amoy woy ko inoy rin.
18 “Ko naugpa ogpoog-ogotoy ka daruwa no otow, no ogdokdokon to sagboka ka dangob to batu woy ko ogsuntukon din no kono ogkamatoy ka otow di ogkapogos to poghibat to hibatanan, 19 kono oglogparan ka otow no nigsuntuk ko ogpakahip-hipanow ka otow duma to tukod din to kono ogmaugoy; di ogbadyad sikandin to otow tongod to pila no allow no waro sikandin nakatarabau, woy songo ogbulig sikandin no ogkoulian ian ka otow.
20 “Ko oglampos ka otow to uripon din no lukos woy ko boi woy ogkamatoy ka uripon tongod to sikan, oglogparan ka otow, 21 di kono oglogparan sikandin ko og-onow ka uripon takas to sagboka woy ko daruwa no allow, hoo su sikandin ian ka tagtuun to uripon.
22 “Ko duon daruwa no lukos no ogpoog-ogotoy, no ogkabarasan ka boi no naboros woy ogka-awaan ka boi di kono ogkapo-il to dakol ka boi, ogbadyad ka otow no nakasao ko nokoy ka ogbudyuon to asawa to sikan no boi no ogbobootan to taaghusoy. 23 Di ko duon dakol no po-il, ka koudyagan ian ka igbadyad to koudyagan, 24 ka mata to mata, ka ngipon to ngipon, ka boad to boad, ka paa to paa, 25 ka tutung to tutung, ka pali to pali woy ka toob ian ka igbadyad to toob.
26 “Ko oglampos ka otow to mata to suguanon din no lukos woy ko boi, no ogkabutud ka mata, ogbogoy sikandin to kalipuwasan to suguanon liwan to mata. 27 Woy ko ogkabingawan din ka suguanon din no lukos woy ko boi, ogbogadyan din ka suguanon to kalipuwasan liwan to ngipon.
28 “Ko ogsuagon ka lukos woy ko boi to lukosan no baka woy ogkamatoy ka otow, oghimatadyan now ka baka pinabadyo to pogdogpak to mgo batu, woy kono now ogkoona ka sapu din. Di kono oglogparan ka tagtuun to baka. 29 Di, ko taan no nigpanuag ka baka to mgo otow woy pignangonan ka tagtuun to baka di waro din aara ka baka, no oghimatoy ka baka to lukos woy ko boi, dorogpaka now ka baka to batu, woy songo oghimatadyan now ka tagtuun. 30 Di ko ogbudyuan ka tagtuun to saapi, ogpakalokat sikandin to koudyagan din pinabadyo to pogbadyad ko nokoy ka ogbudyuon. 31 Sikan dod ka oghimuon now ko ogpakasuag ka baka to bato. 32 Di ko uripon do ka namatoy, ogbadyad ka tagtuun to baka to 30 no tampod to plata dio to tagtuun to uripon, woy oghimatadyan ka baka pinabadyo to pogdorogpak to batu.
33 “Ko duon otow no ogpuwas to lungag to tano, woy ko ogkalion din no kono din ogsooban, woy duon baka woy ko asnu no ogko-uug dio, 34 ogbadyad ka tagtuun to lungag tongod to adyam; ogbadyaran din ka tagtuun, woy kandin on ka namatoy no adyam.
35 “Ko duon daruwa no otow no ogsinuagay ka mgo lukosan no baka ran no ogkamatoy ka sagboka no baka, ogbaligyoon dan ka manokal no baka, woy ogbaaron dan ka saapi woy songo baaron dan ka sapu to namatoy no baka. 36 Di ko taan no ogpanuag ka sikan no baka di waro aara to tagtuun, ogbadyad ka tagtuun; adyam liwan to adyam, woy kandin on ka namatoy no baka.