22
Mgo Kaaglagan to Songo Otow
1 Ko duon otow no ogtakow to baka woy ko karniru no oghimatadyan din woy ko ogbaligyoon din, ogliwanan din to lalima no baka ka baka, woy ko hop-at no karniru ka karniru.
2 “Ko ogkoumaan ka takawon no niglusud to baoy, woy ogbarasan sikandin no ogkamatoy, ka otow no nigbantoy to baoy rin waro nakasao; 3 di ko oglopow ka takawon to ma-allow on, nakasao ka nigbaras to pogpatuligis to langosa.
“Ogbadyad ian ka takawon to pigtakow rin, di ko waro igkabadyad din, ogkaruad sikandin unawa to uripon odyow to pogbadyad to intakow rin.
4 “Ko ogtakow sikandin to adyam no ogkakitaan ka adyam no manokal dod dio to kandin; agad ko baka woy ko asnu woy ko karniru; ogbadyad sikandin to daruwa no akob to pigtakow.
5 “Ko duon otow no ogpasabsab to mgo adyam din dio to kamot woy ko pinamua-an din to ubas, woy ogloug ka mgo adyam no ogkoon sikandan dio to kamot to songo otow, ogliwanan to tagtuun to adyam ka pigkoon ligkat to dorodyawi no abut to kandin no kamot woy ko pinamua-an to ubas.
6 “Ko duon otow no ogsisilab no ogparagas ka hapuy pohondio to malogdog no dugion no ogparagas pad pohondio to trigu woy ko nokoy pad no pinamua to kamot to songo otow, ogbadyad ka otow no nigparokot to hapuy ko pila ka karakoan to nasilaban.
7 “Ko duon otow no ogbogoy to saapi woy ko kaaglagan din dio to songo otow odyow no ogkabantadyan, no oglopow no ogkatakow sikan ligkat to baoy to otow, ko ogkakitaan ka takawon, ogbadyad ka takawon to daruwa no akob to pigtakow rin. 8 Di ko kono ogkakitaan ka takawon, ogtangko ka tagtuun to baoy to mgo taaghusoy odyow to pogpitow ko sikandin buwa ka nigtakow to mgo kaaglagan no pigbantadyan din.
9 “Kuntoon ko duon baka woy ko asnu, ko karniru ko kinabo woy ko agad nokoy no naagak woy angkuwan duon ogkitoon to tagtuun dio to loin no ognangon sikandin to ‘Koddi sikan.’ No oghondio ka daruwa dio to tangkaan to mgo taaghusoy. Ko hontow ka nakasao sumao to husoy ian ka ogbadyad to daruwa no akob dio to nasao-an.
10 “Ko duon otow no ogpabantoy to asnu rin woy ko baka, ko karniru woy ko agad nokoy no adyam din dio to songo otow, no ogkamatoy woy ko ogkapalian ka adyam, woy ko ogkapurut to waro nigbantoy, 11 ogkahusoy ka nasasowan dan pinabadyo to pogpapangulibot dio to tangkaan to Magboboot no ogpamaogot ka niggon-gon to adyam no waro din hilaboti ka adyam. No ko sikan ian, konad ogpaka-aaras ka tagtuun, woy waro badyad no igbogoy to nigbantoy. 12 Di ko pigtakow ka adyam, ogliwanan to nigbantoy dio to tagtuun. 13 Ko pighigbit-higbit ka adyam to mabuut no magintaunan, og-aapon to nigbantoy ka nagaat no samo no igpakita to tagtuun, woy kono sikandin ogbadyad to adyam no pighigbit-higbit.
14 “Ko ogsamboy ka sagboka no otow to adyam ligkat to songo otow, woy ogkamatoy woy ko ogka-palian ka adyam no waro ka tagtuun to adyam dio, ogliwanan to nigsamboy ka adyam. 15 Di ko duon ka tagtuun to adyam, kono ogbadyad ka nigsamboy. Ko pigbadyaran ka pigsambadyan to adyam, ka ingkabadyad dio to tagtuun ian ka ogdoromdomon no igliwan to adyam.
Ka Marodyow no Batasan
16 Ko duon lukos no og-a-aukuy to boi no waro pad magon-goni woy waro pad nakapamalay odyow no oghulid ka boi kandin, ogbadyad ka lukos to badyad to pogpangasawa, woy ogkohimu no asawa rin ka boi. 17 Di ko kono ian ogbabali ka amoy to boi no og-asawoon to lukos ka anak din, ogbadyad dod ka lukos to litos no badyad to pogpangasawa to daaga. 18 “Dokow ogbabali no ogpalinggaat no manokal ka boi no taa-gamuton.
19 “Himatadyi now ka otow no oghilabot to adyam unawa't poghilabot to asawa rin.
20 “Oghimatadyan now ka otow no ogpanubad dio to tinuuhan no konon ka Magboboot.
21 “Dokow og-ul-uangi ka dagpu no otow, woy dokow oglo-loiga sikandin, hoo su mgo dagpu kow nokani to Ehiptu.
22 “Dokow oglo-loiga ka bau woy ka ilu no bato. 23 Ko oglo-loigon now sikandan, woy og-umow sikandan koddi, ogdinogon ku ian ka pogpangiak dan. 24 Ogmoinit ka goinawa ku, woy oghimatadyan ku sikaniu pinabadyo to kampilan; ogkohimu no mgo bau ka mgo asawa now, woy ogkohimu no mgo ilu ka mgo anak now.
25 “Ko ogpasamboy ka to saapi dio to agad hontow to koot-otawan ku no noirapan, dokow og-unug to pighimu to mgo taagpasamboy to saapi; dokow ogpatimui ka saapi.
26 “Ko ogpuruton nu ka sabinit to songo otow no igpamaugot to pangulibot din, i-uli nu kandin to kono pad ogsaop ka allow, 27 su sikan do ka igkombong din to lawa rin to poghibat. Nokoy pad naan ka igkombong din? Ko og-umawon a rin, ogpamminogon ku sikandin su magaan a ogkohimonow.
28 “Dokow ogbadyung to Magboboot to maroot, woy dokow ogtungadyawi ka igbudyag to koot-otawan now.
29 “Dokow ikannugun ka igbogoy now poron koddi ligkat to ogga-anion now woy mgo inomon now.
“Bogadyi a now to kara panganoy no anak now no lukos. 30 Songo bogadyi a now to panganoy to tibon mgo adyam now. Ipagaat now ka nati dio to inoy rin sood to papitu no allow, di to igkawau no allow ibogoy now on koddi.
31 “In-oog ku no koot-otawan sikaniu. No sikan ian no kono kow ogkoon to sapu to adyam no pighigbit-higbit to mabuut no magintaunan; itugdo now ro ka sapu dio to mgo asu.