23
Mgo Udlin to Husoy woy Koid-u
1 “Dokow ipatangkap ka konon maugot no kinagian. Woy dokow ogbulig to maroot no otow pinabadyo to pogsasindog to ubat.
2 “Dokow og-ikul do to koon-ingan ko oghimu sikandan to maroot. Ko ogkagi kow dio to poghusoy, dokow ogbunbuni ka kamaugotan pinabadyo to pogkagi ko nokoy ka ingkoiniat to koon-ingan, 3 woy dokow amanahi to pogbulig to otow to husoy rin tongod do su nawaraan sikandin.
4 “Ko ogkitoon nu ka baka woy ko asnu to usig nu no nakasabuk on, aapa nu woy i-uli dio to usig nu. 5 Ko ogkitoon nu ka asnu to otow no nig-usig koikow no napood ka asnu diraom to intiang din, dokag ligari. Buligi nu ian ka tagtuun.
6 “Dokow ogligal to pogbogoy to litos no poghusoy dio to mgo otow now no nawaraan. 7 Dokow og-agpot to pogbadyung to ubat, woy dokow oghimatadyi to husoy ka otow no waro nakasao, su kono kud ogbaagaron ka otow no oghimu to soini no sao.
8 “Dokow ogtinawo to igbogoy ligkat to otow no nigpahusoy, su ogpakabutud sikan to otow no ogpakakita poron, woy ogpakabouk to kinagian to matuarong no otow.
9 “Dokow oglo-loiga ka dagpu no otow; hoo su nataga kow ko nokoy ka oggoramon to dagpu su mgo dagpu kow nokani dio to Ehiptu.
Ka Igkapitu no Tuid woy Allow
10 “Sood to hon-om no tuid, og-oorok kow to mgo kamot now, woy ogga-ani kow, 11 di to igkapitu no tuid baagara now ka tano no kono ogdaruon woy kono now ogkamota. Ogpakapakilau dio ka mgo otow now no nawaraan woy ogmangkokoon ka mgo magintaunan ko nokoy ka ogkasamo. Sikan dod ka oghimuon now to pinamua-an now to ubas, woy to kaikadyuan now to olibu.
12 “Ogtarabau kow sood to hon-om no allow, di kono kow ogtarabau to igkapitu no allow, odyow no ogpakahimooy ka igdadaru no baka nu, woy ka asnu nu, woy ka uripon no no-otow to lunggunan nu, woy agad ka dagpu, odyow no oglibong ka dadyagang dan.
13 “Ligdongi now no oghimuon now ka tibo no innangon ku kaniu. Dokow og-umowa ka mgo ngaran to loin no tinuuhan, dokow ogkagia ka mgo ngaran dan.
Ka Tatou no Pogkoonan Kara Tuid
14 “Katatou to songo tuid oglimudlimud kow to mgo pogkoonan odyow to pogsadyo koddi. 15 An-anadyan oglimudlimud kow to pogkoonan to Pan no Waro Igpatulin. Sood to papitu no allow, ogkoon kow to pan no waro igpatulin, unawa to insugu ku kaniu. Toora now soini to innangon ku no allow to buwan to Abiba, su sikan ian ka buwan no nigligkat kow to Ehiptu.
“Waro otow ogtangko koddi no waro og-aapon din no igpanubad koddi.
16 “Igkarangob, oglimudlimud kow to pogkoonan to Pogga-ani, no og-aapon now ka an-anadyan no bogas to mgo kamot now.
“Igkatou, oglimudlimud kow to pogkoonan to Punpun to katapusan to tuid to pogpunpun now to tibo no piggaani now.
17 “Katatou ian to kara tuid ogtangko ka tibon mgo lukos to Magboboot no Igbudyag to tibo.
18 “Dokow ogdorongan to pogpanubad to langosa woy agad nokoy no duon igpatulin.
“Dokow oghipawo-i ka tabo to mgo panubad to pogsadyo.
19 “Aapa now ka dorodyawi no an-anadyan no bogas puun to tano now duon to baoy to Magboboot no Igbudyag now.
“Dokow oghilutu ka nati no kambing duon to gatas no nigligkat to kandin no inoy.b
Oghun-a ka Diwata To Magboboot
20 “Pitowa now, igpa-aap ku ka diwata ku to tangkaan now odyow to pogbantoy kaniu to daan woy odyow to pog-aap kaniu to ugpaan no inpanagana ku kaniu. 21 Pannalinga kow kandin, woy pamminoga now ka ogkagion din. Dokow og-atu kandin; kono din ogbaagaron ka sao now to pog-atu, su pig-aap din ka Ngaran ku. 22 Ko ogpamminog kow to ogkagion din, woy ko ogbabalion now ka mgo igsugu ku kaniu, ogkohimu a no usig to mgo usig now, woy og-atuan ku ka mgo otow no og-atu kaniu. 23 Oghun-a ka diwata ku kaniu, woy og-aapon kow rin pohondio to tano no pig-ugpaan to mgo kapunganan ni Amor, ni Hit, ni Piris, ni Canaan, ni Hib woy ni Yibus, woy og-awoon ku sikandan. 24 Dokow ogluhud to tangkaan to mgo tinuuhan dan, woy kono kow ogsadyo to sikan woy kono kow og-unug to hinimuan to sikan no mgo otow. Gugusa now ka mgo inotowotow ran, woy lupota now ka mgo pigluhuran dan no mgo batu. 25 Sadyo kow to Magboboot no Igbudyag now, woy ogboligan din ka ogkoonon now woy ka og-inomon now. Og-awoon ku ka mgo dau duon to kaniu, 26 woy waro boi to kaniu no ogdagwas, woy waro boi no kono ogpaka-anak. Ogmaadyaton ku ka mgo ukul now.
27 “Ogpohuno-on ku kaniu ka kahallok ku, odyow no ogliason ka mgo koot-otawan no ogtangko kaniu. Ogpapanlagudyon ku ka tibon mgo usig now. 28 Ogpohuno-on ku kaniu ka tabu-uan odyow to pogdogil to mgo kapunganan ni Hib, ni Canaan woy ni Hit to tangkaan now. 29 Di kono kud og-ubuson to pogdogil kandan to sagboka ro no tuid, su ogkohimu no han-hanawan ka duma no mgo tano, woy ogmoon-ing ka mgo mabuut no mgo magintaunan no kono now on ogkagoon to pog-atu. 30 Og-in-inuton ku to pogdogil kandan to tangkaan now, taman to ogmoon-ing kow on no ogpakalitos to pog-ugpo to tibon tano.
31 “Ogpos-okan ku ka oatan to tano now ligkat to dagat no Malaab pohondio to dagat to mgo Filistihanon, woy ligkat to han-hanawan pohondio to woig to Eupratis. Ogparaogon ku sikaniu to mgo otow no tag-inugpo to sikan no tano, woy ogdogilon now sikandan to tangkaan now. 32 Dokow oghimu to kasabutan kandan woy ko dio to mgo tinuuhan dan. 33 Dokow ogbabali no og-ugpo sikandan to tano now, su ogka-aap kow to pogpakasao koddi, su ogkalit-ag kow to pogsadyo to kandan no mgo tinuuhan.”