24
Pighogot ka Kasabutan
1 No nigkagi ka Magboboot ki Mosis to “Takorog ka pohondii to Magboboot, sikoikow woy si Aaron, si Nadab woy si Abihu woy kapituan to mgo igbudyag to Israil. Ogsadyo kow to madmariu, 2 di si Mosis do sagboka ka ogdani to Magboboot; kono ian ogdani ka duma. Woy kono ogpakatakorog ka mgo otow duma kandin.”
3 To poghondio ni Mosis woy to pognangon din to tibo no ingkakagi to Magboboot no mgo udlin, nasagboka sikandan to pogtabak to “Oghimuon noy ka tibo no ingkakagi to Magboboot.”
4 No pigsulat ni Mosis ka tibo no inkagi to Magboboot. Nigsoom-soom sikandin to pog-onow to pogkapawo, woy nighimu sikandin to tubaranan dio to linogsaran to bubungan woy nigpos-ok sikandin to sampuu woy daruwa no mgo suwoy no batu no igpadoromdom to sampuu woy daruwa no lunggunan to Israil. 5 No nigpa-aap sikandin to mgo baubato no lukos odyow to pogtutung to igpanubad woy odyow to pog-iow to mgo nati no lukosan no baka no igpanubad to pogsagboka to Magboboot. 6 Pigbaad ni Mosis to daruwa ka langosa, woy insabuk din ka sagboka no baad to mgo lipung, woy inpisikpisik din ka dangob no baad duon to panubaranan. 7 No pigpurut din ka Libru to Kasabutan woy pig-ubus din basaha dio to mgo otow. Nigtabak ka mgo otow to “Oghimuon noy ka tibo no innangon to Magboboot; ogbabali koy ian.”
8 No pigpurut ni Mosis ka langosa no duon to mgo lipung, woy inpisikpisik din dio to mgo otow no kagi rin “Soini no langosa ian ka ogpamaugot to Kasabutan no pighimu to Magboboot kaniu pinabadyo to sikan tibo no mgo udlin.”
9 Nigtakorog si Mosis duon to bubungan duma ki Aaron, ki Nadab woy ki Abihu woy to kapituan no mgo igbudyag to Israil, 10 woy nakita rin ka Magboboot no Igbudyag to Israil. Dio to longod to mgo paa rin, pigkita ran ka inat daan no to safiruano maadyag unawa to langit. 11 Di waro monua to Magboboot ka soini no mgo igbudyag to mgo otow to Israil; agad no nakita ran ka Magboboot, nangkokoon woy nang-inom pad sikandan.
12 Nigkagi ka Magboboot ki Mosis to “Takorog ka pad kai to koddi to bubungan, woy ugpo ka kai, woy ogbogadyan ku sikoikow to daruwa no manipis no batu no pigsulatan ku to mgo udlin woy mgo sugu no ig-anad kandan.”
13 No sikan ian nigtakorog si Mosis duma to taagbulig din no si Josue dio to bubungan to Magboboot. 14 Nignangon si Mosis to mgo igbudyag to “Tagari koy ro kai taman to poglibong noy kaniu. Duon si Aaron woy si Hur duma kaniu; sikandan ka oghusoy ko duon husadyonon now.”
15 Natongos ka bubungan to gapun to pogtakorog ni Mosis to sikan, 16 woy niglogsad ka kabantug to Magboboot dio to bubungan to Sinai. Sood to hon-om no allow, natongos ka bubungan to gapun, woy to igkapitu no allow, nig-umow ka Magboboot ki Mosis ligkat to taliwaro to gapun. 17 To pogpitow to mgo otow to Israil, inat nig-unawa to niglogdog no hapuy ka kabantug to Magboboot duon to ampow to bubungan. 18 No nigsood si Mosis to gapun to pogtakorog din to bubungan. Nig-ugpo si Mosis to ampow to bubungan to kohop-atan no allow woy kohop-atan no kaukiloman.