50
Pogkamatoy Ni Jacob Woy Ni Jose
1 Nig-agpas nigkopkop si Jose to amoy rin, woy nigsinogow tongod kandin, woy pigharokan din. 2 Nigsugu si Jose to mgo mananambal no suguonon din to pogbalsamar to lawa to amoy rin no si Israil. No sikan ian pigbalsamar dan sikandin, 3 sood to kohop-atan no allow, su sikan ian ka litos no mgo allow to pogbalsamar. Nigpandaawit ka mgo otow to Ehiptu tongod ki Jacob sood to kapituan no allow.
4 To nigligad on ka mgo allow to pogpandaawit, nignangon si Jose dio to mgo hibatoon ni Parao to soini, kagi “Ko narago kow to pogpitow kanak, kagii now si Parao tongod kanak. Nangoni now sikandin to 5 ‘Pigpapangulibot a to amoy ku no kagi rin “Magaan ad ogkamatoy. Ilobong a nu to lobonganan no pigkalian ku dio to tano to Canaan.” No kuntoon pauguti a nu to poghondio odyow to poglobong to amoy ku, woy oglibong a ro kai.’”
6 Nignangon si Parao to “Hondio ka. Ilobong nu ka amoy nu sumao to inpangulibot nu kandin.”
7 No nighondio si Jose odyow to poglobong to amoy rin. Nigduma kandin ka tibon mgo hibatoon ni Parao; ian ka mgo dakol-dakol no mgo taagtambag kandin, woy ka tibon mgo dakol-dakol to Ehiptu. 8 Songo nigduma ka tibon mgo otow to lunggunan ni Jose woy to mgo lunggunan to mgo suod din woy to lunggunan to amoy rin. Ka mgo anak dan naan do ka nagaat odyow to pogbantoy to mgo adyam dan dio to Gosin. 9 Songo duon mgo sundau no nig-untud to mgo sakadyan woy ka duma no nig-untud to mgo kuddo no nigduma ki Jose. Moon-ing ian ka otow no nighondio.
10 To poglopow ran to giokanan to trigu dio to Atad, marani to Jordan no woig, nigpandaawit sikandan to maagbot, woy nigpandaawit si Jose dio sood to papitu no allow tongod to amoy rin. 11 To pogkarinog to mgo otow to Canaan no nig-ugpo dio, woy to pogkakita ran to mgo nigpandaawit to longod to giokanan to Atad, nigmanang-nangonoy sikandan to “Nigdamag ka mgo matig Ehiptu dio.” Nokoy naan no pighingaranan ka sikan no longod no marani to Jordan no Abil Misraim no to kanta pad ‘damag to mgo matig Ehiptu.’
12 No sikan ian nigbabali ka mgo anak ni Jacob to inpanugun-tugun din kandan; 13 Pig-aap dan ka lawa rin dio to tano to Canaan, woy piglobong dan sikandin dio to pilang to Makpila marani to Mamri, no pigboli ni Abraham no lobonganan puun ki Ipron no otow to Hit lagkos to tano. 14 Takas to poglobong din to amoy rin, niglibong si Jose dio to Ehiptu, duma to mgo suod din woy to tibo no nigduma kandin to poglobong to amoy rin.
15 No kuntoon to pogkakita to mgo suod ni Jose no namatoy on ka amoy ran, nigmanang-nangonoy sikandan to “Nokoy bua ko maroot pad ka goinawa ni Jose kanta, woy kuntoon ogsulian ki rin to maroot no pighimu ta kandin?” 16 No nigpa-aap sikandan to soini no nangnangonon ki Jose no kagi, ‘Soini ka tugun-tugun to amoy nu to waro pad sikandin namatoy: 17 Soini ka igkanangon now ki Jose, kagi, ogbudyuon ku sikoikow no oglingawan nu ro ka mgo sao to soini no mgo suod nu, woy kono nu poron ogdoromdomon ka mgo maroot no pighimu ran koikow.’ No kuntoon ogbudyuon noy sikoikow no oglingawan nud ka mgo sao noy no mgo suguonon to Magboboot no igbudyag to amoy nu.” To pogkatinawo ni Jose to mgo nangnangonon to mgo suod din, nigsinogow sikandin.
18 Nighondio ka mgo suod din kandin, woy nig-unduk sikandan no niglangkob to tano to tangkaan ni Jose. Nignangon sikandan to “Mgo uripon koy nu.” 19 Di nigkagi si Jose kandan to “Dokow ogkahallok. Bak sikanak ka Magboboot? 20 Nigbantaan kow to poghimu to maroot kanak, di nigbantaan ka Magboboot to marodyow, odyow no ogkohimu ka nohimu kuntoon, ian no napangabangan ka moon-ing no mgo otow. 21 No, ko kow ogkahallok. Ogbogoy a kaniu woy to mgo anak now to ogkoonon now.” Woy pig-im-imuan ni Jose sikandan woy moumol ka mgo kagi rin kandan.
22 Nigparagas nig-ugpo si Jose to Ehiptu, duma to tibon lunggunan to amoy rin. Noudyag sikandin to songo gatus woy sampuu no tuid, 23 woy nakakita sikandin to igkatatou no kapunganan to mgo anak ni Ipraim, woy songo piggiba ni Jose ka mgo anak ni Makir no anak ni Manasi to pogkootow ran.
24 No nigkagi si Jose dio to mgo suod din to “Magaan ad ogkamatoy, di ogtuu a no ogkapangabangan kow to Magboboot, woy ogka-aap kow rin puun to soini no tano pohondio to tano no inpangulibot din ki Abraham, ki Isaak woy ki Jacob.”
25 No pigpapangulibot ni Jose ka mgo kapunganan ni Israil no kagi “Ian ian ogkapangabangan kow to Magboboot, woy ko oglopow on ka sikan no allow, aapa now ka mgo bokog ku puun to soini no ugpaan.”
26 No namatoy si Jose to panuigon to songo gatus woy sampuu. Pigbalsamar dan sikandin, woy takas to sikan insabuk dan ka lawa rin to lungun dio to Ehiptu.