49
Pigboligan Ni Jacob Ka Mgo Anak Din
1 No inpo-umow ni Jacob ka tibon mgo anak din no lukos, no kagi rin kandan to “Linguti a now odyow no ogpakanangon a kaniu to ogkoumaan now to ogdatong no mgo allow. 2 Limudlimud kow woy pamminog kow no mgo anak ni Jacob; pannalinga kow no mgo anak ni Israil.
3 “Riubin, koikow ka panganoy ku, ka kabogbogan ku, ka an-anadyan no indanan to dadyagang ku, woy koikow ka dakol-dakol no ogkangaranan, koikow ka dakol-dakol to kabogbogan, 4 unawa ka to mabolbol no woig, di kono kad on ogkohimu no dakol-dakol to duma, su nighibat ka to hibatanan to amoy nu, woy pigligsoman nu ka ikam ku.
5 Pataahari si Simion woy si Livi no mabuut to pog-aap to kampilan. 6 Kono a og-agpot to husoy ran, kono a og-amut to poglimudlimud dan su pighimatadyan dan ka mgo otow pinabadyo to moinit no goinawa ran, woy to waro pugtian pigpamalian dan ka mgo baka no nigpoingku-ingku on. 7 Ogkatungadyawan ka kabou dan no mabuut, woy ka moinit no goinawa ran no waro koid-u! Ogkasaworan ku sikandan to mgo kapunganan ni Jacob, woy ogpogsulsuwadyon ku sikandan to mgo kapunganan ni Israil.
8 Juda, ogkasadyo ka to mgo suod nu. Ogkaloklokon nu ka liog to mgo usig nu, woy og-undukan ka to mgo anak to amoy nu. 9 Unawa ka to anak to liona, Juda, no og-uli ka puun to nigdawi ka. Unawa to lion no ogpopoku woy oghibat, woy unawa to boian no lion; hontow ka oglangub to pogpukow kandin? 10 Kono ogkalokaan ni Juda ka tukod to pogkahari, woy kono og-awo ka tukod to igbudyag puun to taliwaro to mgo paa rin taman to oglopow ka tagtuun to sikan, woy ogbabali ka mgo koot-otawan kandin. 11 Ighikot din ka asnu rin dio to lobut to ubasb, woy ighikot din ka nati no kuddo din to in-aam no sugpang. Ogkisungan din ka mgo kinabo din to binu, woy ka mgo manggad din to langosa to mgo ubas. 12 Moitom-itom pad to binu ka mgo mata rin, woy maputi pad to gatas ka mgo ngipon din.
13 Og-ugpo si Sibulun to ilis to dagat, woy ogkohimu sikan no marodyow no duungan to mgo dagdakol no bautu. Ogtaman to Sidon ka oatan to tano din.
14 Si Isakar unawa to manokal no asnu no nighibat taliwaro to daruwa no saku no pigtiang din. 15 Ko ogkita sikandin to marodyow no himoodyan woy to marodyow no tano, ogtiang sikandin to tiangonon, woy ogbabali sikandin no ogpogoson sikandin to pogtarabau.
16 Oghusoy si Dan to mgo otow rin dio to taliwaro to mgo koot-otawan to Israil. 17 Ogkounawa si Dan to uod to ilis to daan, to mammiloy dio to badyaanan, no ogdogkal to paa to kuddo odyow no ogko-uug ka nig-untud to soini.
18 Pangabangi a nu Magboboot!
19 Ogkagopasan si Gad to mgo ogmangadyow, di og-atu sikandin, woy oggaponon din sikandan.
20 Maddodyow ka mgo koonon ni Asir. Ogbogoy sikandin to mgo dorodyawi no koonon no litos to hari.
21 Ogko-unawa si Naptali to boian no usa no pigsabukan no og-anak to marodyow lagboy no mgo nati.
22 Unawa si Jose to mabogas no lobut to ubas si Jose no pigpamua marani to sobsob no ka mgo sugpang din ogpakapanoik to aabat. 23 Pig-atuan sikandin to mgo taagpamano pinabadyo to kabou dan, nigpapano sikandan kandin tongod to maroot no goinawa ran. 24 Di waro nigwoil-woil ka busug ni Jose, nagaat no manokal ka mgo boad din, su pigbuligan sikandin to boad to Mabogbog no igbudyag ni Jacob, pigbuligan sikandin to Taagbantoy, to Batu ni Israil. 25 Pigbuligan ka, Jose, to taagbulig koikow no ian ka Magboboot to amoy nu. Pigbuligan ka to Mabogbog to Tibo no ian ka taagbolig koikow pinabadyo to langit dio to ampow woy pinabadyo to woig dio to diraom, ka taagbolig koikow pinabadyo to susu woy to aanakan. 26 Mabogbog pad to mgo pogbolig to taan no mgo bubungan ka mgo pogbolig to amoy nu! Mabogbog pad to karatuan to mgo taan no kabubunganan ian. Ogpalinggaat poron ka soini no mgo pogbolig ku dio to uu ni Jose, dio to bukod din su igbudyag sikandin to mgo suod din.
27 Mabuut no magintaunan no asu si Binyamin; to masoom ogkoon sikandin to pigdawi rin, woy to maapun ogba-baaron din ka pig-agow rin.”
28 Sikandan ian ka sampuu woy daruwa no koot-otawan ni Israil, woy sikan ian ka innangon to amoy ran kandan to pogbolig din kandan. Ko nokoy ka litos no igbolig to kara sagboka kandan, sikan ian ka inkagi ni Israil.
29 Takas to sikan, nigtugun-tugun si Jacob dio to mgo anak din no kagi “Magaan ad on ogpaka-agpot to mgo kabuybudyagan ku. Ilobong a now duma to mgo amoy ku dio to pilang no duon to tano ni Ipron no otow to Hit, 30 to pilang ian to tano to Makpila marani to Mamri to Canaan no pigboli ni Abraham no lobonganan puun ki Ipron no otow to Hit lagkos to tano din. 31 Inlobong dio si Abraham woy ka asawa rin no si Sara, songo inlobong dio si Isaak duma to asawa rin no si Ribika, woy songo inlobong ku dio si Lia. 32 Pigboli ka tano lagkos to pilang no duon puun to mgo otow to Hit.”
33 Takas nigpanugun-tugun si Jacob to soini dio to mgo anak din, nighibat man do sikandin woy nabigtow on ka goinawa rin no naka-agpot sikandin to mgo kabuybudyagan din.