48
Pigboligan Si Ipraim Woy Si Manasi
1 No, duon allow no pignangonan si Jose to “Nigdarau on ka amoy nu.” No sikan ian pig-aap ni Jose ki Jacob ka daruwa no anak din no lukos no si Manasi woy si Ipraim. 2 To pogkarinog ni Jacob to niglopow on si Jose no anak din, nignokal-nokal sikandin no nigpinnuu dio to pighibatan din. 3 Nignangon si Jacob ki Jose to “Nigpakita kanak ka Magboboot no Mabogbog to Tibo nokani dio to Lus to tano to Canaan, woy pigboligan a rin dio 4 no kagi rin ‘Ogpamarasigon ku sikoikow, odyow no ogmoon-ing kow. Oghimuon ku sikaniu no songo puntuk to mgo koot-otawan, woy ibogoy ku koikow ka soini no tano no sikoikow woy ka mgo kapunganan nu ka ogtagtuun to soini taman to katamanan.’”
5 Kagi pa ni Jacob to “Kuntoon, ogdoromdomon ta no unawat’ mgo anak ku ka daruwa no anak nu no lukos no nootow koikow kai to Ehiptu to waro a pad niglopow. Mgo anak ku si Ipraim woy si Manasi iing to mgo anak ku si Riubin woy si Simion. 6 Ka duma no mgo anak nu no mouri kandan ogdoromdomon ta no koikow no mgo anak sikandan, woy ogpakatagtuun do sikandan to tano pinabadyo to mgo kakoy ran. 7 Hoo su to pog-uli ku nokani puun to Paddan, nigmasakit lagboy ka goinawa ku su namatoy si Rakil dio to Canaan to dio ki pad to daan marani to Iprata. No piglobong kud sikandin dio to ilis to daan pohondio to Iprata (no songo oghingaranan no Bitlihim).”
8 To pogkakita ni Israil to mgo anak ni Jose nig-inso sikandin to “Hontow mgo otowa soini?”
9 Nigtabak si Jose to amoy rin to “Sikandan ka mgo anak no inbogoy to Magboboot kanak kai.”
Nignangon si Israil to “Parania nu sikandan kanak, odyow no ogkaboligan ku sikandan.”
10 No kuntoon konad amani ogpakakita si Israil, su piglaburan on ka mgo mata rin su budyag on sikandin. No sikan ian pig-aap ni Jose ka mgo anak din to marani to amoy rin, woy pigpangharokan woy pigpangkopkopan sikandan ni Israil. 11 Nignangon si Israil ki Jose to “Waro a mog-iman-iman no ogpakakita a oghutuk to langlanguan nu, di kuntoon songo nigpakita ka Magboboot kanak to mgo anak nu!”
12 No pig-awo ni Jose sikandan puun to mgo buol ni Israil, woy nig-unduk si Jose taman to tano. 13 Pig-aap sikandan daruwa ni Jose, no duon si Ipraim to kawanan din no dio to gibang ni Israil, woy duon si Manasi to gibang ni Jose no longod to kawanan ni Israil, no inparani sikandan kandin. 14 Di pigsampoong ni Israil ka kawanan no boad din dio to uu ni Ipraim, agad no hari si Ipraim, woy pinoglambid ka mgo boad din, pigsampoong din ka gibang no boad din dio to uu ni Manasi, amag no panganoy si Manasi. 15 No pigboligan si Jose ni Israil no kagi “Ka Magboboot no igbudyag to mgo amoy ku no si Abraham woy si Isaak, woy ka Magboboot no nakabantoy kanak to tibon mgo allow to pog-udyag ku iing to karniru a rin, 16 woy ka diwata no nigpangabang kanak to tibon karootan, ian ka ogbolig to soini no mgo bato poron. Ogkohingaranan sikandan no mgo anak ku, woy mgo anak ni Abraham woy ni Isaak, woy ogmoon-ing poron ka mgo kapunganan dan kai to kalibutan.”
17 To pogkakita ni Jose no pigsampoong to amoy rin ka kawanan no boad din dio to uu ni Ipraim, waro sikandin narago, no piggon-gonan din ka boad to amoy rin odyow no oghalinon din porom dio to uu ni Manasi. 18 No nigkagi si Jose ki Jacob to “Konon litos, amo. Soini si Manasi ka panganoy. Isampoong nu ka kawanan no boad nu to uu rin.”
19 Di nigligal ka amoy no kagi “Hoo, anak ku, nataga a. Songo ogkohimu sikandin no koot-otawan no mabantug, di ogmabantug pad atag ka hari rin kandin, woy ogkohimu ka mgo kapunganan to hari no songo puntuk to mgo koot-otawan.”
20 Nigbolig si Israil kandan to sikan no allow no kagi rin “Uromo, ognangon ka mgo koot-otawan to Israil to pogbolig dan to ‘Ogkohimu kow poron to Magboboot no unawa ki Ipraim woy ki Manasi.’” No sikan ian no pigpohun-a ni Israil si Ipraim ki Manasi.