47
Si Jose Woy Ka Bitil
1 Nighondio si Jose ki Parao no nignangon to “Niglopow on ka amoy ku woy ka mgo suod ku duma to tibon mgo adyam dan woy to tibon mgo kaaglagan dan puun to tano to Canaan, woy duon on sikandan to Gosin.”
2 Nig-aam si Jose to lalima to mgo suod din, woy pig-aap din sikandan to tangkaan ni Parao. 3 Nig-inso si Parao to mgo suod ni Jose to “Nokoy ka tarabau now?” woy nigtabak sikandan to “Sikanami no mgo suguonon nu, mgo taagbantoy koy to mgo adyam, unawa to mgo kabuybudyagan noy nokani.”
4 Songo nignangon sikandan to “Nighongkai koy su ogtagtagood koy pad to pog-ugpo su dakol lagboy ka bitil to Canaan woy warad ogpasabsaban noy to mgo adyam noy dio. No kuntoon, anggam, ogpamudyu koy no mgo suguonon nu no og-ugpo koy porom to tano to Gosin.”
5 No nigkagi si Parao ki Jose to “Niglopow naan ka amoy nu woy ka mgo suod nu, 6 woy koikow ka ogboot to tibon Ehiptu. Po-ugpaa nu sikandan to dorodyawi no tano no ian dio to Gosin. Woy ko duon nakita nu kandan no marodyow lagboy to pog-aap to mgo adyam pabantadya nu sikandin to mgo adyam ku.”
7 No inpasood ni Jose ka amoy rin no si Jacob, woy pig-aap din sikandin to tangkaan ni Parao. Takas to nigbolig si Jacob ki Parao, 8 nig-inso si Parao kandin to “Pila ka panuigon nu?”
9 Nigtabak si Jacob ki Parao to “Songo gatus woy katouan ka mgo tuid to poghip-hipanow ku to tano. Maintok do woy maugon ka mgo tuid no nabadyaan ku, woy waro nig-unawa to karasigan to mgo tuid to poghip-hipanow to mgo kabuybudyagan ku.”
10 No pigboligan ni Jacob si Parao woy nig-awo dio to tangkaan din.
11 No pigpo-ugpo ni Jose ka amoy rin woy mgo suod din to Ehiptu, woy pigbogadyan din sikandan to dorodyawi no tano no marani to Ramasis, sumao to innangon ni Parao. 12 Songo pigpambogadyan ni Jose ka amoy rin woy ka mgo suod din woy ka mgo sakup to lunggunan to amoy rin to koonon no litos to mgo anak dan.
13 Di waro koonon to tibon tano, su dakol lagboy ka bitil. Nigmaggaso ka tibo no duon to Ehiptu woy to Canaan tongod to bitil. 14 Piglimud ni Jose ka tibon saapi no duon to Ehiptu woy to Canaan no inbadyad to mgo otow to bogas no naboli ran, woy pig-aap din ka saapi dio to baoy ni Parao.
15 To noubus on ka saapi to mgo otow to Ehiptu woy Canaan, nighondio ka tibon mgo otow to Ehiptu ki Jose no nignangon “Bogadyi koy to bogas. Manio no ogbaagaron koy nu no ogkammatoy koy to tangkaan nu. Warad on saapi noy.”
16 Nigtabak si Jose kandan to “Aapa now ka mgo adyam now kai to kanak. Ogsaliuan ku ka mgo adyam now to bogas su warad on saapi now.”
17 No sikan ian pig-aap dan ki Jose ka mgo adyam dan, woy pigsaliuan din sikandan to bogas liwan to mgo kuddo, mgo karniru, mgo kambing, mgo baka woy mgo asnu ran. Woy sikan ian no to sikan no tuid pigpangabangan sikandan ni Jose pinabadyo to bogas no insaliu rin to mgo adyam dan.
18 To nigligad on ka sikan no tuid, nighondio man do ka mgo otow ki Jose no nignangon “Kono koy ogpokohoos to maogot puun koikow anggam no warad on ka saapi noy, woy koikow on ka tagtuun to mgo adyam noy, warad on igkabogoy noy kuna ko konon ka mgo lawa noy woy ka tano noy ro. 19 Doka'g pauguti no ogkammatoy koy to tangkaan nu lagkos to tano noy. Bolia koy woy ka tano noy liwan to bogas, woy ogkohimu koy no mgo uripon ni Parao, woy sikandin ka ogtagtuun to tano noy. Bogadyi koy to boni odyow no ogkagaat koy no manokal, woy odyow no kono ogkohimu no han-hanawan ka tano ta.”
20 No sikan ian pigpamboli ni Jose ka tibon tano to Ehiptu ki Parao. Inpanduad to tibon mgo otow to Ehiptu to mgo tano dan su dakol lagboy ka bitil. Si Parao on ka tagtuun to tibon tano, 21 woy pighimu ni Jose no uripon ka tibon mgo otow to tibon kau-agan to Ehiptu. 22 Ka tano naan do to mgo taagpanubad ka waro naboli ni Jose, hoo su taan no duon ogpuruton dan ladyun puun ki Parao, woy litos ka koonon dan no ligkat ki Parao. Nokoy naan no waro sikandan nigduad to tano dan.
23 Nignangon si Jose to mgo otow to “Kuntoon no naboli kud sikaniu woy ka tano now ki Parao, soini ka boni no igkoorok now. 24 Di, ko ogmangga-ani kow, ogbogoy kow to igkalima no baad ki Parao. Kaniu ka tagtuun to hop-at no baad no ogbonhion now woy ogkoonon now duma to mgo lunggunan now.”
25 Nigtabak ka mgo otow to “Napangabangan koy nu, anggam. Ogkarago ka pad poron to pogpitow kanami woy ogkohimu koy no mgo uripon ni Parao.”
26 No sikan ian nighimu si Jose to udlin no piggaat pad taman kuntoon dio to Ehiptu no si Parao ian ka tagtuun to igkalima no baad to mgo bogas to mgo pinamua. Ka tano to mgo taagpanubad naan do ka waro matagtuun ni Parao.
27 No sikan ian nig-ugpo ka mgo kapunganan ni Israil dio to Ehiptu to longod to Gosin. Nakatagtuun sikandan to tano dio woy nigmoon-ing lagboy sikandan. 28 Nig-ugpo si Jacob to Ehiptu to sampuu woy papitu no tuid, taman to songo gatus woy kohop-atan woy papitu no tuid ka panuigon din. 29 To magaan on ogkabigtawan si Israil, pig-umow rin ka anak din no si Jose no nignangon to “Ko narago ka to pogpitow kanak, pasigpiti nu ka boad nu to diraom to bubun ku no ogpangulibot ka no ogkoid-uan a nu, no kono a nu ilobong kai to Ehiptu. 30 Ko og-agpot ad on to mgo kabuybudyagan ku, aapa a nu libuwas kai to Ehiptu woy dio a nu ilobong to longod to nalobongan dan.”
Nigtabak si Jose to “Sikan ian ka oghimuon ku.”
31 Nigkagi si Jacob to “Panguliboti a nu.”
No nigpangulibot si Jose kandin, woy nigsadyo si Israil to Magboboot dio to pighibatan din.