46
Nighondio Si Jacob To Ehiptu
1 No sikan ian nighipanow on si Israil duma to tibo no kandin, woy to poglopow rin to Birsiba, nigpanubad sikandin to Magboboot no Igbudyag ni Isaak no amoy rin.
2 Nigkagi ka Magboboot ki Israil pinabadyo to tagoinop to maukilom no kagi “Jacob! Jacob!”
Nigtabak si Jacob to “Soini a.”
3 Kagi pa to Magboboot to “Kanak ka Magboboot no Igbudyag to amoy nu. Doka ogkahallok to poghondio to Ehiptu su oghimuon ku sikaniu no mabogbog no koot-otawan dio. 4 Ogdumaan ku sikoikow pohondio to Ehiptu, woy maogot no ogpalibongon ku sikaniu kai. Woy si Jose ian ka ogpapiong to mgo mata nu to pogkamatoy nu.”
5 No nig-ongkod si Jacob to Birsiba, woy pig-aap sikandin to mgo anak din duma to mgo anak dan woy mgo asawa ran, woy nang-untud sikandan to mgo sakadyan no inpa-aap ni Parao kandan. 6 Songo pig-aap dan ka tibon mgo adyam dan woy mgo kaaglagan no nalimud dan dio to Canaan, woy sikan ian nighondio si Jacob to Ehiptu duma to tibon mgo kapunganan din. 7 Pig-aap ni Jacob to Ehiptu ka mgo anak din no mgo lukos woy mgo boi, lagkos to mgo apu din no mgo lukos woy mgo boi. Ian pig-aap din ka tibon mgo kapunganan din.
8 Soini ka mgo ngaran to mgo anak no lukos ni Israil no ian si Jacob no nokohondio to Ehiptu:
Si Riubin no panganoy ni Jacob.
9 Ka mgo anak no lukos ni Riubin no ian si Hanok, si Pallu, si Hisron, woy si Karmi.
10 Ka mgo anak no lukos ni Simion no ian si Yimuil, si Yamin, si Ohad, si Yakin, si Soar woy si Saul no anak to boi no matig Canaan.
11 Ka mgo anak no lukos ni Livi no ian si Girson, si Kohat woy si Mirari.
12 Ka mgo anak no lukos ni Juda no ian si Ir, si Onan, si Sila, si Piris woy si Sira, (di namatoy on si Ir woy si Onan dio to Canaan).
Ka mgo anak no lukos ni Piris no ian si Hisron woy si Hamul.
13 Ka mgo anak no lukos ni Isakar no ian si Tola, si Pua, si Yasub woy si Simron.
14 Ka mgo anak no lukos ni Sibulun no ian si Sirid, si Ilon woy si Yaliil.
15 Sikandan tibo ian ka mgo anak no lukos ni Jacob woy ni Lia no nootow dio to Paddan Aram, duma to anak dan no boi no ian si Dina. To tibo katouan woy tatou soini no mgo anak din.
16 Ka mgo anak no lukos ni Gad no ian si Sipon, si Haggi, si Suni, si Isbon, si Iri, si Arodi woy si Arili.
17 Ka mgo anak no lukos ni Asir no ian si Yimna, si Yisva, si Yisvi, woy si Biria. Ka atoboi ran ian si Sira. Ka mgo anak no lukos ni Biria ian si Hibir woy si Malkiil.
18 Sikandan tibo ian ka mgo anak ni Jacob woy ni Silpa. Si Silpa ian ka suguonon no inbogoy ni Laban ki Lia no anak din. Sampuu woy hon-om sikandan tibo.
19 Ka mgo anak no lukos ni Rakil no asawa ni Jacob ian si Jose woy si Binyamin.
20 Woy dio to Ehiptu, si Manasi woy si Ipraim ian ka mgo anak no lukos no nootow ki Jose pinabadyo ki Asinat no anak ni Potipira no taagpanubad to On.
21 Ka mgo anak no lukos ni Binyamin no ian si Bila, si Bikir, si Asbil, si Gira, si Naaman, si Ihi, si Ros, si Muppim, si Huppim woy si Ard.
22 Sikandan ka mgo anak no lukos ni Jacob pinabadyo ki Rakil. Sampuu woy hop-at sikandan tibo.
23 Ka anak no lukos ni Dan no ian si Husim.
24 Ka mgo anak no lukos ni Naptali no ian si Yasiil, si Guni, si Yisir woy si Sillim.
25 Sikandan ka mgo anak no lukos no nootow ki Jacob pinabadyo ki Bilha. Si Bilha ian ka suguonon no inbogoy ni Laban ki Rakil no anak din. Papitu sikandan tibo.
26 Kohon-oman woy hon-om ka tibon mgo lukos no nigduma ki Jacob pohondio to Ehiptu no mgo kapunganan din no konad igsool ka mgo amboy rin.
27 Ko ilagkos ka daruwa no anak ni Jose no nootow dio to Ehiptu, kapituan ka tibon mgo otow to lunggunan ni Jacob no nokohondio to Ehiptu.
28 No kuntoon pigpohun-a ni Jacob si Juda pohondio ki Jose odyow to pog-inso ko hondoi ka daan pohondio to Gosin. To poglopow ran to tano to Gosin, 29 nig-untud si Jose to sakadyan din pohondio to Gosin odyow to pogtomu to amoy rin no si Israil. To pogkakita ni Jose to amoy rin pigkopkopan din sikandin, woy nigsinogow to malmaugoy.
30 Nignangon si Israil ki Jose to “Baagad on ko ogkamatoy a su nakakita ad on koikow woy nataga a no waro ka pad naan namatoy.”
31 No nignangon si Jose to mgo suod din woy to lunggunan to amoy rin to “Oghondio a ki Parao woy ognangonan ku sikandin to ‘Niglopow on ka mgo suod ku woy ka lunggunan to amoy ku no nigpuun to Canaan. 32 Woy pig-aap dan ka tibon mgo adyam dan woy mgo kaaglagan dan su mgo taagbantoy to mgo adyam ian sikandan.’ 33 No ko og-umawon kow ni Parao woy og-inso sikandin to ‘Nokoy ka tarabau now?’ 34 ogtabak kow to ‘Sikanami no mgo suguonon nu, mgo taagbantoy koy to mgo adyam ligkat to maintok koy pad unawa to mgo kabuybudyagan noy.’ No sikan ian ogbabali si Parao no og-ugpo kow to tano to Gosin. Hoo su kono ogkoiniat ka mgo matig Ehiptu to mgo taagbantoy to mgo adyam.”