45
Nigpoila Si Jose To Mgo Suod Din
1 No konad ogpakaponod si Jose to goinawa rin dio to tangkaan to mgo suguonon din, no nigmaagbot sikandin to pogkagi to “Libuwas kow tibo kai!” No sikan ian waro duma no otow no duon to pogpoitaga ni Jose to mgo suod din ko hontow sikandin. 2 Woy maagbot lagboy ka pogsinogow rin taman to nakarinog ka mgo matig Ehiptu to sikan, woy nakarinog ka mgo otow to lunggunan ni Parao tongod to sikan.
3 Nignangon si Jose to mgo suod din to “Kanak si Jose! Manokal dod buwa ian ka amoy ku?” Di waro nakatabak ka mgo suod din kandin su nahallok sikandan to pogtangko kandin. 4 Nigkagi pad si Jose kandan to “Dani kow pa.” To marani on sikandan nignangon sikandin to “Kanak si Jose no suod now, ka insaliu now kai to Ehiptu! 5 No kuntoon, dokow ogkasasow woy dokow ogsolsol to insaliu a now kai, su ka Magboboot ian ka nigpa-aap kanak kai hun-a kaniu odyow to poglipuwas to mgo otow. 6 Daruwa on no tuid ka bitil to tano, woy to lalima pad no tuid no ogdatong, waro otow no ogdaru woy waro otow no ogga-ani. 7 Di inpa-aap a to Magboboot hun-a kaniu kai odyow to pogkannugun pad to mgo ukul now, woy to mgo kapunganan now pinabadyo to dakol no pogpangabang. 8 No sikan ian no konon sikaniu ka nigpa-aap kanak kai ko konon ka Magboboot ian. Pighimu a rin no amoy ni Parao woy igbudyag to lunggunan din, woy sikanak ka ogboot to tibon tano to Ehiptu. 9 No kuntoon agpas kow to pog-uli dio to amoy ku, no nangoni now sikandin to ‘Soini ka innangon to anak nu no si Jose; pighimu a to Magboboot no igbudyag to tibon Ehiptu. Magaan ka to poghondini kanak. Doka ogtataantan. 10 Og-ugpo ka kai to tano to Gosin no marani kanak duma to mgo anak nu, mgo apu nu woy mgo adyam nu, woy to tibo no duon to koikow. 11 Ogbantadyan ku sikaniu dio, su lalima pad no tuid ka bitil no ogdatong. Ko kono ka oghongkai, ogkabaybadyaran ka, duma to tibon lunggunan nu no ogkaadyu-adyu kow.’”
12 Kagi pad ni Jose to mgo suod din to “Ogpakakita kow, woy songo ogpakakita ka hari ku no si Binyamin, no sikanak ian ka nig-aaukuy kaniu. 13 Nangoni now ka amoy ku to tibo no kabogbogan no inbogoy kanak kai to Ehiptu, woy to tibo no nakita now. Woy aapa now sikandin kai to magaan.”
14 No pigkopkopan ni Jose si Binyamin no nigsinogow, no songo nigsinogow si Binyamin no nigkopkop ki Jose. 15 No pigpangharokan ni Jose ka tibon mgo suod din, no nigsinogow sikandin. Takas to sikan, nigma-al-aukudyoy sikandan.
16 To pogkarinog ni Parao no niglopow ka mgo suod ni Jose, narago sikandin duma to tibon mgo hibatoon din. 17 Nignangon si Parao ki Jose to “Soini ka ignangon nu to mgo suod nu kagi “Iuntud now ka mgo kaaglagan now to mgo adyam now, woy uli kow to Canaan 18 woy angadya now ka amoy now woy ka mgo lunggunan now kai to kanak. Ogbogadyan ku sikaniu to dorodyawi no ugpaan kai to Ehiptu no ogkapuusan kow to pog-ugpo to marodyow no tano.””
19 Kagi pad ni Parao to “Nangoni pad sikandan to “Aap kow to mgo sakadyan puun to Ehiptu no ogkounturan to mgo anak now woy mgo asawa now, woy angadya now ka amoy now no oglibong kow kai. 20 Baagara now ka mgo kaaglagan now su kaniu on ka ogpakatagtuun to mgo karodyowan to Ehiptu.””
21 No sikan ian ka pighimu to mgo anak ni Israil. Pigbogadyan sikandan ni Jose to mgo sakadyan sumao to sugu ni Parao, woy songo nigbogoy si Jose to mgo ogbohowon dan to poghipanow ran. 22 Pigbogadyan sikandan tibo ni Jose to mgo iam no kinabo, di pigbogadyan din si Binyamin to tatou no gatus no saapi woy lalima no kinabo. 23 No pigpa-aapan din ka amoy rin to sampuu no asnu no pig-unturan to maddodyow no kaaglagan puun to Ehiptu, woy to sampuu no boian no asnu no pig-unturan to bogas woy pan woy duma pad no ogbohowon to poghipanow to amoy rin. 24 No pigpohipanowan ni Jose ka mgo suod din. To pogligkat dan nignangon si Jose kandan to “Ko kow ogmoog-ogotoy dio to daan!”
25 No nighipanow sikandan puun to Ehiptu, woy noko-uli sikandan to amoy ran dio to Canaan. 26 Nignangon sikandan to amoy ran to “Manokal dod si Jose! Woy nokoy pad sikandin ka igbudyag to tibon Ehiptu.” Natokowan si Jacob woy waro mogtuu to innangon dan.
27 Di to pognangon dan kandin to tibo no innangon ni Jose, woy to pogkakita rin to mgo sakadyan no inpa-aap ni Jose odyow no og-unturan din pohondio to Ehiptu, nakalibong ka marodyow no goinawa ni Jacob no amoy ran. 28 Woy nignangon si Israil to “Ogtuu a! Manokal dod naan si Jose. Oghondio a odyow no ogkitoon ku pad sikandin to kono a pad ogkamatoy.”