44
Pig-ol-oogan Ni Jose Ka Mgo Suod Din
1 Kuntoon nigsugu si Jose to saliganan no suguonon din no kagi; “Hiponua now ka mgo saku to soini no mgo otow, taman to ogkagoon dan, woy iuli now ka saapi dan dio to mgo bo-bo to mgo saku ran. 2 No isabuk nu ka boung ku no plata dio to bo-bo to saku to kimud, duma to saapi din no inboli rin to bogas.” No nigbabali ka suguonon to innangon ni Jose.
3 To pogsilo to allow, pigpohipanow ni Jose ka mgo suod din duma to mgo asnu ran. 4 To waro pad sikandan nokohipanow to mariu to lunsud, nignangon si Jose to suguonon din to “Gapona nu sikan no mgo otow, woy ko ogkasaponan nud on sikandan, nangoni nu sikandan to “Manio to pigsulian now to maroot ka marodyow? 5 Manio to pigtakow now ka boung to igbudyag ku, no inomanan din woy oggamitonon din to pogtitimao? Maroot ka pighimu now.””
6 To nasaponan to suguonon sikandan, nignangon sikandin to inpakagi ni Jose, 7 di nigtabak ka mgo suod ni Jose to, “Manio to nignangon ka to sikan, anggam? Kono koy ogpokohimu to iing duon! 8 Nataga ka no pig-uli noy ka saapi puun to Canaan no nakita noy dio to mgo saku noy to nokohun-a. No manio no ogtakow koy to plata woy bulawan puun to baoy to igbudyag nu? 9 Ko ogkakitaan nu ka boung kai to agad hondoi kanami, himatadyi now sikan no otow, woy ka ruma kanami ogkohimu no mgo uripon now.”
10 Kagi to suguonon ni Jose to “No. Sikan ka oghimuon ta. Ko hontow ka nigpurut to boung ogkohimu no uripon ku, woy ogpoko-uli ka ruma kaniu to waro igkosawoy.”
11 Nig-agpas sikandan niglogsad to mgo saku ran puun to mgo asnu ran, woy pigpuasan dan. 12 Nigpamitow ka suguonon, ligkat to panganoy pohondio to kimud, woy dio rin makitoi ka boung to saku ni Binyamin. 13 No pigpanghigbit dan ka mgo kinabo dan tongod to masakit no goinawa ran. In-untud dan ka mgo saku ran to mgo asnu, woy niglibong sikandan to lunsud.
14 Duon dod si Jose to baoy to poglopow ni Juda duma to mgo suod din, woy nangunduk sikandan taman to tano no nigpakoid-u.
15 Nigkagi si Jose kandan to “Nokoy soini no pighimu now? Naan now buwa no kono ogkatou to ogtimao ka otow no unawa kanak?”
16 Nigtabak si Juda to “Nokoy ka igkanangon noy anggam? Nokoy ka igkakagi noy? Monuon noy to pogpapitow no waro koy nakasao to soini? Inpakita to Magboboot ka mgo sao noy no mgo suguonon nu. Ogkohimu koy no mgo uripon nu; sikanami ian woy ka otow no dio makitoi ka boung.”
17 Di nigtabak si Jose to “Dokow! Kono a ogpokohimu to iing duon. Ka otow ro no dio makitoi ka boung ian ka ogkohimu no uripon ku. Ogpoko-uli ka mgo duma kaniu to lunggunan to amoy now no waro igkasawoy.”
18 No nigdani si Juda ki Jose no nignangon “Pauguti a nu, anggam to pogkagi to maintok agad no suguonon a nu. Doka ogkabou to soini no suguonon nu, agad no unawa ka ki Parao to kabogbogan. 19 Nig-inso ka, anggam to mgo suguonon nu to “Duon amoy now woy suod now buwa?” 20 Woy nigtabak koy koikow to, “Duon amoy noy no budyag on, woy duon anak din no lukos no nootow kandin to budyag on sikandin. Namatoy on ka suod din, woy sikandin do ka nagaat no manokal no anak to inoy rin, woy dakol ka goinawa to amoy rin kandin.” 21 No nignangon ka to mgo suguonon nu to “Aapa now sikandin kai to koddi odyow no ogkitoon ku sikandin.” 22 Woy nignangon koy koikow anggam to “Kono ogpaka-ongkod ka bato to amoy rin, su ko ogkoongkoran ka amoy, ogkamatoy sikandin.” 23 Di nignangon ka kanami no mgo suguonon nu to “Ko kono now og-aapon ka kimud now, kono kow ogpakahutuk ogpakakita kanak.” 24 To pog-uli noy dio to amoy noy no suguonon nu, pignangonan noy sikandin to innangon nu kanami anggam. 25 No niglopow no nignangon ka amoy noy kanami to “Libong kow odyow to pogboli to maintok pad no bogas.” 26 Di nigtabak koy to “Kono koy ogpokohondio. Woy on ko ogduma ka kimud noy. Kono koy ogpakatangko to sikan no otow ko kono ogpakaruma kanami ka kinaharian noy.” 27 No nignangon ka suguonon nu no amoy noy kanami to “Nataga kow no daruwa ro ka anak no lukos to sikan no asawa ku. 28 Nigpamariu ka sagboka kanak, woy nignangon a to “noigbit-higbit ian sikandin,” woy waro a makahutuk makakita kandin. 29 Ko og-aapon now soini sagboka puun kanak, woy ko duon ogkabadyaan din no maroot, to soini no kabudyagi ku ogkamatoy a tongod to masakit no goinawa ku.” 30-31 No kuntoon, ko kono ogduma ka bato kanak ko og-uli a to amoy ku no suguonon nu, no ogpakakita sikandin no waro nigduma ka bato no indakoli lagboy to goinawa rin, ogpakanangon koy no ogkamatoy sikandin tongod to masakit so goinawa rin. 32 Nangulibot a to amoy ku tongod to bato, no nignangon a to “Ko kono ku ogka-aap sikandin no’g-uli koikow, koddi ka ogkasonditan taman to manokal a pad!” 33 No kuntoon anggam, sikanak poron ka ogkagaat kai no og-uriponon a nu liwan to bato, woy og-uli ka bato duma to mgo suod din. 34 Monuon ku to pog-uli dio to amoy ku ko waro ka bato duma kanak? Doka! Doka a nu papitowa to kasakit to goinawa no oglopow to amoy ku.”