43
Niglibong Ka Mgo Suod Ni Jose To Ehiptu
1 No kuntoon, dakol pad ka bitil to tano. 2 No to noubus on ka bogas no na-aap dan puun to Ehiptu, nignangon ka amoy ran kandan to “Libong kow pad dio odyow to pogboli to maintok pad no bogas.”
3 Di nignangon si Juda kandin to “Nigpamalmaogot ka otow to kagi no nignangon to ‘kono kow ogpakahutuk ogpakakita kanak ko kono ogpakaruma ka hari now kaniu.’ 4 No, ko igparuma nu ka suod noy kanami, oghondio koy ian odyow to pogboli to bogas koikow. 5 Di ko kono nu igparuma sikandin kanami, kono koy oghondio, su nignangon ka otow to ‘kono kow ogpakahutuk ogpakakita kanak ko kono ogduma ka suod now kaniu.’”
6 Nig-inso si Israil kandan to “Manio to pig-aapan a now to soini no wangal, no nignangon kow to otow no duon pad hari now?”
7 Nigtabak sikandan to “Nig-inso-inso ka otow kanami tongod to lunggunan ta no kagi ‘Manokal dod ka amoy now buwa?’ woy ‘Duon dangob no suod now buwa?’ no pigtabak noy ro ka mgo inso din. Waro koy mataga no ognangon sikandin to ‘Aapa now ka hari now kai to kanak.’”
8 No nignangon pad si Juda to amoy rin no si Israil no kagi “Parumaon nu ka bato duma kanak, no og-agpas koy oghondio odyow no oggogoinawa ki pad to mgo anak ta, no kono ki ogkabigtawan to gutas. 9 Ogpangulibot a koikow tongod kandin. Ko kono ku ogka-aap sikandin uli kai to koikow no manokal, koddi ka ogtinawo to logpad tagood to manokal a pad. 10 Ko waro ki pa mataantan, kararuwa koy on nokohondio woy nokolibong poron.”
11 No nignangon si Israil no amoy ran to “Ko ogkapogos kid ian, soini ka oghimuon now; og-aap kow to dorodyawi no mgo ogpuun to tano ta no igbogoy dio to otow. Aap kow to maintok no saong woy maintok no tonob, mgo aanag, woy mgo moumut, woy mgo bogas to pistasiu woy almindras.a 12 Aap kow to daruwa no akob to saapi no pig-aap now to nokohun-a, su iuli now ian ka saapi no inlibong dio to mgo saku now, su naugpa ko nalipatan dan. 13 Aapa now ka hari now, woy libong kow dio to otow. 14 Woy ogkoid-uan kow poron to Magboboot dio to tangkaan to sikan no otow odyow no ogpo-ulion din si Simion woy si Binyamin duma kaniu. Woy ko tongod kanak, ko ogkaawaan a to mgo anak, ogkaawaan a to mgo anak ian.”
15 No pig-aap dan ka mgo igbogoy woy ka daruwa no akob no saapi duma ki Binyamin, no nig-agpas sikandan pohondio to Ehiptu, woy nigtangko sikandan ki Jose.
16 To pogkakita ni Jose ki Binyamin no duma kandan, nignangon sikandin to saliganan no suguonon to baoy rin to “Aapa nu ka soini no mgo otow dio to baoy ku. Iow ka to adyam, woy ogsusugba kow, su ogkoon sikandan duma kanak to moudtu.”
17 Nigbabali ka otow to innangon ni Jose, no pig-aap din ka mgo otow dio to baoy ni Jose. 18 No nahallok ka mgo suod ni Jose to na-aap sikandan dio to baoy rin. Nigsumansuman sikandan to ‘Pig-aap ki kai tongod to saapi no in-uli dio to mgo saku ta to nokohun-a. Naugpa ogbokasan ki, no ogkohimu ki no mgo uripon din, woy og-agowon din ka mgo asnu ta.’ 19 No nighondio sikandan to saliganan no suguonon ni Jose no nig-aaukuy kandin dio to gomawan to baoy. 20 Nignangon sikandan to “Anggam, to nokohun-a nighongkai koy odyow to pogboli to bogas. 21 Di to pogsagdok noy to maukilom, pigpuasan noy ka mgo saku noy, woy duon naan ka saapi noy to mgo saku no waro masalini ian. Soini, inlibong noy ro ka saapi. 22 Nig-aap koy to duma pad no saapi odyow to pogboli man do to bogas. Waro koy mataga ko hontow ka niglibong to saapi noy dio to mgo saku noy.”
23 Nigtabak ka suguonon to “Dokow ogkasasow. Ka Magboboot no Igbudyag to amoy now ian ka nigbogoy kaniu to saapi. Natinawo ku ka badyad now.” No inlibuwas din si Simion kandan. 24 Pig-aap sikandan to suguonon dio to baoy ni Jose, woy pigbogadyan din sikandan to woig no igluu to mgo paa ran, woy pigsungguran din ka mgo asnu ran. 25 Inpalibuwas dan panadya ka mgo igbogoy ran ki Jose su nakarinog sikandan no oglopow sikandin to moudtu odyow to pogkoon duma kandan.
26 To pog-uli ni Jose, inbogoy ran kandin ka mgo pig-aap dan, woy nang-unduk sikandan kandin taman to tano. 27 Nigkumusta si Jose kandan woy nig-inso to “Monua ka budyag no amoy now no innangon now kanak? Manokal dod buwa sikandin?”
28 Nigtabak sikandan to “Manokal dod ka suguonon nu no amoy noy, woy marodyow pad ka lawa rin.” No nang-unduk man do sikandan.
29 To pogkakita ni Jose ki Binyamin no hari rin no anak to kandin no inoy, nig-inso sikandin to “Soini buwa ka kimud now no innangon now kanak?” No kagi pad ni Jose ki Binyamin to “Ogkaboligan ka poron to Magboboot, anak ku.” 30 To pogkakita ni Jose to suod din, na-alimotow sikandin woy nig-agpas niglibuwas odyow to pogpamangho to ogsinogowan din. Nighondio sikandin to kandin do no sinabong, woy nigsinogow sikandin dio. 31 To takas nigpandop-ug sikandin, niglibuwas si Jose, woy tagood to pigponod din ka goinawa rin nigsugu sikandin to “Aapi koy to koonon.”
32 Nigkoon si Jose no nigpasagsagboka sikandin, woy nigkoon ka mgo suod din to kandan do, woy nigkoon ka mgo matig Ehiptu no mgo duma ni Jose to kandan do. Hoo su kono og-amut ogkoon ka mgo matig Ehiptu duma to mgo Hibriu no otow, su ogkarootan ka mgo matig Ehiptu to sikan. 33 Pigpapinnuu ni Jose ka mgo suod din pinabadyo to mgo panuigon dan, ligkat to panganoy pohondio to kimud, woy nigmapitpitawoy sikandan no noinuinu. 34 To pog-aap to mgo suguonon to koonon puun to lamisa ni Jose, ka taad ni Binyamin lalima no akob to mgo taad to mgo duma. No nigkokoon sikandan woy nig-inom sikandan duma ki Jose.