42
Nighondio Ka Mgo Suod Ni Jose To Ehiptu
1 To nakarinog si Jacob nu duon bogas to Ehiptu, nignangon sikandin dio to mgo anak din no lukos to “Manio to nigmapitpitawoy kow ro?” 2 Kagi rin pad to “Nakarinog a no duon bogas to Ehiptu. Hondio kow woy boli kow to bogas ta, odyow no kono ki ogkabigtawan to gutas.”
3 No nighondio ka sampuu no suod ni Jose to Ehiptu odyow to pogboli to bogas. 4 Di waro parumaa ni Jacob si Binyamin, no hari ni Jose, su nahallok sikandin no duon ogko-umaan ni Binyamin no maroot. 5 Sikan ian nigduma ka mgo anak ni Israil to sikan no mgo otow no nanghondio odyow to pogboli to bogas; hoo su songo dakol ka bitil dio to tano to Canaan.
6 No kuntoon si Jose ian ka igbudyag to Ehiptu no taagsaliu to bogas dio to mgo koot-otawan. No to poglopow to mgo suod ni Jose, nig-unduk sikandan kandin taman to tano. 7 To pogkakita ni Jose kandan noilaan din sikandan, di nigpatuu sikandin no waro sikandin noko-ila kandan, woy mabuut ka mgo kinagian din kandan. Nig-inso si Jose to “Matig hondoi kow?”
Nigtabak sikandan to “Nigpuun koy to tano to Canaan odyow to pogboli to bogas.”
8 Agad no noko-ila si Jose to mgo suod din, waro sikandan noko-ila kandin. 9 No nigdoromdom si Jose to mgo tagoinop din nokani tongod kandan. Pignangonan din sikandan to “Mgo taagsiib kow! Nighongkai kow odyow to pogpamangho ko hondoi ka magaan ogkalusuran no mgo longod to ugpaan noy.”
10 Nigtabak sikandan to “Konon maogot sikan, Anggam. Nighongkai koy ro odyow to pogboli to bogas no mgo suguonon koy nu ro. 11 Mgo anak koy tibo to sagboka ro no otow. Mgo maddodyow koy no mgo otow, no kono koy no mgo taagsiib.”
12 Nigtabak si Jose to “Ubat now! Nighongkai kow odyow to pogpitow ko hondoi ka magaan ogkalusuran no longod to tano noy.”
13 Di nigtabak ka mgo suod ni Jose to “Ka soini no mgo suguonon nu mgo sampuu woy daruwa no suod nokani, no olin mgo anak to sagboka ro no otow no nig-ugpo dio to tano to Canaan. Ka kimud noy duon dod duma to amoy noy, woy warad on ka sagboka.”
14 Nignangon si Jose to “Iing to innangon ku: mgo taagsiib kow! 15 Soini ka daan no ogkaol-oogan kow; maogot ian ka soini no kagi ku unawa to maogot no manokal dod si Parao; kono kow ogpoko-uli ko kono oghongkai ka kimud no suod now. 16 Ogpa-aap kow to sagboka kaniu odyow to pog-angoy to hari now. Ogkagaat ka mgo duma kaniu to kalabusu odyow no ogkatagaan ku ko maogot ka mgo kinagian now. Di ko konon maogot iing to manokal dod si Parao mgo taagsiib kow ian!”
17 Woy inpalokoban sikandan tibo ni Jose dio to kalabusu sood to tatou no allow.
18 To igkatatou no allow, nignangon si Jose kandan to “Ko ogbabali kow to ignangon ku kono kow ogkammatoy, hoo su duon kahallok ku to Magboboot. 19 Ko mgo otow kow no konon ubaton, gaata now ka sagboka ro kaniu to kalabusuan tagood no ka mgo duma kaniu og-uli no og-aap to bogas dio to mgo lunggunan now no ogkabigtawan on to gutas. 20 Di og-aapon now ian ka kimud now no suod kai to kanak, odyow to pogpamaogot to mgo kinagian now woy odyow no kono kow ogkohimatadyan.” Woy sikan ian ka pighimu ran.
21 Nigmanang-nangonoy sikandan to “Soini ian ka logpad tongod to hari ta. Nakita ta ka kasakit to goinawa rin to nigpakoid-u sikandin kanta odyow no kono ta oghimatadyan sikandin, di waro ki nigpannalinga; no sikan ian ka logpad no niglopow kanta kuntoon.”
22 Nigtabak si Riubin to “Nignangon a kaniu to kono oghilabotan ka bato, di waro kow nigpannalinga kanak. Kuntoon ogbogoy ki to pakighusoy tongod to langosa rin.”
23 Waro sikandan nataga no nakasabut naan si Jose to mgo kinagian dan su ungud nigkagi si Jose pinabadyo to taaghokad. 24 Nig-iniug si Jose kandan no nigbunsud to pogsinogow, di niglingi man do sikandin no nigtangko kandan no nigkagi pad. Inpapurut din si Simion woy pigpabanggutan din dio to tangkaan to mgo suod din. 25 Nigsugu si Jose to mgo otow rin to pogpohiponu to mgo saku ran to bogas, woy inpalibong din ka saapi dan dio to mgo saku. Nigpabogoy si Jose kandan to ogbohowon dan to poghipanow ran. Takas to sikan, 26 pigpang-untud dan ka bogas dio to mgo asnu ran woy nighipanow sikandan.
27 To nighimooy sikandan to maukilom, pigpuasan to sagboka kandan ka saku rin odyow to pogpurut to igsunggud to asnu rin, woy nakita rin ka saapi din dio to bobo to saku. 28 Nignangon sikandin dio to mgo suod din “In-uli ka saapi ku kanak. Pitow kow kai ian to saku ku.” No nigmabogat ka goinawa ran, no nigmapitpitawoy sikandan no nangolkol no kagi “Nokoy soini no pighimu to Magboboot kanta?”
29 To poglopow ran dio to amoy ran no si Jacob dio to tano to Canaan, nignangon sikandan kandin to tibo no nabadyaan dan, no kagi, 30 “Mabuut ka mgo kagi to otow no igbudyag to sikan no tano no pigbadyungan koy no mgo taagsiib koy to ugpaan dan. 31 Di nigtabak koy kandin to ‘Marodyow koy no mgo otow, no kono koy no mgo taagsiib. 32 Sampuu woy daruwa koy nokani no mgo suod, mgo anak to sagboka ro no amoy. Warad on ka sagboka, woy ka kimud noy duon dod duma to amoy noy dio to Canaan.’ 33 No nignangon ka otow no igbudyag to sikan no tano to ‘soini ka oghimuon ta odyow to pog-ol-oog ko marodyow kow no mgo otow; igaat now ka sagboka kaniu kai to kanak, woy aap kow to bogas dio to mgo lunggunan now no ogkabbigtawan on to gutas. 34 Di aapa now ka kimud now kai to kanak, odyow no ogkataga a ko mgo otow kow no konon ubaton no konon mgo taagsiib. No iuli ku kaniu ka suod now woy ogpakapanaliu kow kai to soini no ugpaan.’”
35 To pogpuas dan to mgo saku ran, duon naan to kara sagboka ka saapi to sikan no otow! To pogkakita ran woy to amoy ran to sikan no mgo kamudyut, nanahallok sikandan. 36 Nignangon si Jacob dio to mgo anak din to “Pig-awaan a now to anak ku. Warad on si Jose, woy warad on si Simion, woy kuntoon og-aapon now pad man on si Binyamin. Nig-atu kanak ka tibo!”
37 Di nignangon si Riubin to amoy rin to “Ogpokohimatoy ka to daruwa ku no anak ko kono ku igkouli koikow si Binyamin. Ibogoy nu sikandin kanak, woy iuli ku sikandin koikow.”
38 Di nignangon si Jacob to “Kono ku ogparumaon ka anak ku kaniu dio. Namatoy on ka suod din, woy sikandin do sagboka ka nagaat. Naugpa ko duon ogkabadyaan din no maroot dio to daan, to soini no kabudyagi ku ogkamatoy ad tongod to masakit no goinawa ku.”