41
Ka Tagoinop Ni Parao
1 To nigligad on ka daruwa ian no tuid, nakatagoinop si Parao no nighasindog sikandin dio to tikoba to Nilu no woig, 2 woy nakakita sikandin to papitu no baka no niggakap puun to woig. Maambog woy marodyow no mgo baka sikan woy nanabsab sikandan to tibogow no duon to tikoba. 3 Takas to sikan, duon pad papitu no baka no niggakap. Maggaso woy maroot pitawon ka sikan no mgo baka, woy songo nighasindog sikandan dio to ilis to woig no Nilu. 4 No kuntoon pigkoon to maggaso woy maroot no mgo baka ka papitu no mallambog woy marodyow no mgo baka. No nakagimuat si Parao.
5 Nighutuk nighirogo si Parao, woy nakatagoinop sikandin to soini no igkorangob no tagoinop, no nakakita sikandin to papitu no maambog woy marodyow no pusu to agooy no nigtubu to sagboka ro no lobut. 6 Woy takas to sikan duon nigtunas no papitu no pusu to agooy no maggaso no naanos to moinit no kaamag puun to ogsilaan. 7 Pig-aboong to maggaso no mgo pusu ka papitu no mallambog no pusu. No nakagimuat si Parao; tagoinop do naan ka nakita rin.
8 To masoom to pogkapawo, nasasow si Parao, woy pig-umow rin ka mgo bailan woy ka mgo otow no dakol to katagaanan no duon to Ehiptu. Pignangonan sikandan ni Parao to mgo tagoinop din, di waro agad sagboka kandan no nokohokad to sikan. 9 No nignangon ka taagbogoy to boung ki Parao to “Kuntoon a ro nakadoromdom to mgo sao ku. 10 Duon allow nokani no nabou si Parao to mgo suguonon din, woy pigpakalabusu a rin duma to taaghilutu to pan dio to baoy to igbudyag to mgo taagbantoy no mgo sundau. 11 To dio koy, nakatagoinop koy daruwa to sagboka ro no kaukiloman, woy duon kaogsaran to mgo tagoinop noy. 12 No duon Hibriu no baubato dio, no suguonon to igbudyag to mgo taagbantoy no sundau. Pignangonan noy sikandin to mgo tagoinop noy, woy pighokad din ka kara sagboka no tagoinop noy. 13 Woy natood ian ka hokad no innangon din kanami; Inlibong a to taan no hulingonon ku, woy pigbitoy ka rangob no otow.”
14 No pigpo-umow ni Parao si Jose, woy nadagdagow na-aap si Jose puun to kalabusuan. To pigkagisan on ka sumpo din woy to nokoilis on sikandin pig-aap sikandin dio to tangkaan ni Parao. 15 Nignangon si Parao ki Jose to, “Nakatagoinop a woy waro otow no nakahokad to tagoinop ku. Di nakarinog a no ko ogdinog ka to tagoinop ogpokohokad ka to kaogsaran to sikan.”
16 Nigtabak si Jose ki Parao to “Kono a ogpokohokad to tagoinop, di ka Magboboot ian ka ogbogoy to hokad no inkoiniat ni Parao.”
17 No nignangon si Parao ki Jose to “Dio to tagoinop ku, nighasindog a dio to tikoba to Nilu no woig, 18 woy niglopow no duon papitu no baka no niggakap puun to woig. Mallambog woy marodyow pitawon ka mgo baka, woy nanabsab sikandan to mgo tibogow no duon. 19 Takas to sikan duon papitu pad no mgo baka no niggakap. Maggaso, woy maroot lagboy pitawon no mgo baka, waro ian nakita ku kai to Ehiptu no iing duon no maroot pitawon no mgo baka. 20 Pigpangoon to mgo maroot no mgo baka ka papitu no mallambog no mgo baka no nokohun-a niggakap. 21 Di agad to noubus dan on nakoon, kono tad ogko-ilaan no nigkoon sikandan, su iing dod no maroot pitawon sikandan. No nakagimuat ad.”
22 Kagi pad ni Parao to “Dio to mgo tagoinop ku, songo nakakita a to papitu no maddodyow no mgo pusu to agooy no nigtubu to sagboka ro no lobut. 23 Takas to sikan, duon papitu pad no pusu no nigtunas no maggaso woy naanos to moinit no kaamag no puun to ogsilaan. 24 Pig-aboong to maggaso no mgo pusu ka papitu no maddodyow no mgo pusu. Nignangon a to soini tibo dio to mgo bailan, di waro sikandan nakahokad to sikan.”
25 No nignangon si Jose ki Parao to “Sagboka ro ka hokad to mgo tagoinop ni Parao. Nigpoitaga ka Magboboot ki Parao to oghimuon din. 26 Ka papitu no mallambog no baka ogpasabut to papitu no tuid, woy ka papitu no mallambog no pusu to agooy ogpasabut to papitu no tuid; hoo su sagboka ro ian ka mgo tagoinop nu. 27 Ka papitu no maggaso woy maroot no mgo baka no nigmouri niggakap ogpasabut to papitu no tuid, woy songo papitu no tuid ian ka papitu no maroot no pusu to agooy no noinitan to kaamag puun to ogsilaan; papitu no tuid ian no bitil. 28 Iing to innangon ku ki Parao, nigpakita ka Magboboot ki Parao to oghimuon din. 29 Duon ogdatong no papitu no tuid to makoonon no dakol ka ogkapunpun to tibon pandatuan to Ehiptu, 30 di takas to sikan ogdatong no duon papitu no tuid no bitil. Ogkalingawan ka makoonon to Ehiptu tongod to karootan to bitil to tano. 31 Ogkalingawan ian ka dakol no matubung tongod to potpotukan no gutas no ogmouri. 32 Inbogoy to Magboboot ka soini no tagoinop ki Parao to daruwa no langlanguan su nasantop on ka goinawa rin to poghimu to soini, woy kono ogtaantan ka Magboboot to poghimu to soini. 33 Woy kuntoon ogpamangho poron si Parao to otow no dakol to katagaanan no ogkabogadyan to katongod kai to pandatuan to Ehiptu. 34 Og-aam pad si Parao poron to mgo otow no ogbantoy to tano no ogpurut sikandan to igkalima no baad to ginaanian to mgo kamot to tibon Ehiptu tagood to sikan no papitu no tuid to makoonon. 35 Oglimuron dan ka sikan no lupogas dio to mgo laapong to mgo lunsud diraom to pogboot ni Parao. 36 Sikan no lupogas ogkagaat dio to mgo laapong to mgo lunsud taman to ogkakoon to mgo otow to papitu no tuid no bitil odyow no kono ogkatampod ka pandatuan to Ehiptu tongod to bitil.”
37 No inat marodyow ka pigbabantaan ni Jose ki Parao woy to mgo hibatoon din. 38 Nig-inso si Parao kandan no kagi “Kono ki buwa ogpakakita to otow no unawa to soini no otow no duon ka gimukud to Magboboot kandin?”
39 No nignangon si Parao ki Jose to “Tongod su inpakita to Magboboot ka soini tibo dio to koikow, waro otow no unawa koikow to katagaanan. 40 Igbogoy ku koikow ka katongod to baoy ku, woy ogbabali ka tibon mgo otow ku to mgo sugu nu kandan. Og-unawa ki ro to kabogbogan di dio do to pogkahari ogdakol-dakol a koikow.”
41 No nignangon pad si Parao ki Jose to “Kuntoon igbogoy ku koikow ka katongod to tibon pandatuan to Ehiptu.” 42 No pigluung ni Parao ka sising no igtutuus puun to komol din, woy insau-ub din dio to komol ni Jose. Pigpakinabo ni Parao si Jose to kinabo no dorodyawi no manggad, woy insau-ub din ka baliog no bulawan dio to liog ni Jose. 43 Inpo-untud ni Parao si Jose to igkorangob no unturanan din, woy duon mgo otow no nigbabansagon to tangkaan no kagi “Dapig kow!” No sikan ian no nohimu si Jose no igbudyag to tibon tano to Ehiptu.
44 No nignangon pad si Parao ki Jose to “Koddi ka Parao, di ko kono ka ogsugu, waro otow to tibon Ehiptu no ogpokohimu to agad nokoy.”
45 Pighingaranan ni Parao si Jose ki Sapinat-Paniaa, woy impaasawa rin ki Jose si Asinat no anak no boi ni Potipira no taagpanubad to On. Pigpanlouy ni Jose ka tibon pandatuan to Ehiptu. 46 Katouan on ka panuigon ni Jose to pogbunsud din to tarabau rin dio ki Parao no datu to Ehiptu. Nigligkat si Jose to tangkaan ni Parao, no nighip-hipanow sikandin to tibon Ehiptu. 47 Sood to papitu no tuid to makoonon, dakol lagboy ka naga-ani to tano. 48 Piglimud ni Jose ka lupogas no naga-ani to papitu no tuid tagood to makoonon pad ka Ehiptu, woy pigpunpun din dio to mgo lunsud. To kara lunsud pigpunpun din ka lupogas puun to marani no mgo kamot. 49 Pagpagamadyan ka lupogas no nalimud ni Jose unawa to badyokbok no duon to ilis to dagat. Tongod to karakoan to lupogas, nighagtong nigsusulat si Jose to karakoan su konad ogkasool.
50 To waro pad niglopow ka mgo tuid to bitil, daruwa on ka anak no lukos ni Jose pinabadyo ki Asinat no anak ni Potipira no taagpanubad to On. 51 Pighingaranan ni Jose ka panganoy rin ki Manasibno nignangon sikandin to “Pigpalingawan a to Magboboot to mgo allow no nabaybadyaran a woy pigpalingow a rin to lunggunan to amoy ku.”
52 Pighingaranan din ka igkarangob no anak din ki Ipraimcno kagi “Pinabogas a to Magboboot kai to ugpaan no ingkoirapi ku.”
53 Nigligad on ka papitu no tuid to makoonon dio to Ehiptu, 54 woy nigbunsud ka papitu no tuid no bitil, iing to innangon ni Jose. Duon bitil to tibon mgo pandatuan, di dio to Ehiptu duon pad koonon.
55 To nigbunsud on ka mgo otow to Ehiptu to poggoram to bitil, nigbudyu sikandan ki Parao odyow no ogkabogadyan sikandan to bogas. Nignangon si Parao to tibon mgo matig Ehiptu to “Hondio kow ki Jose, woy babalia now ka mgo igkakagi rin.”
56 To nakatangkap on ka bitil to tibon tano, pigpuasan ni Jose ka mgo laapong woy inpanaliu rin ka bogas dio to mgo matig Ehiptu, su bitil lagboy ian ka tibon mgo ugpaan to Ehiptu. 57 Nanghondio to Ehiptu ka tibon mgo koot-otawan odyow to pogboli to bogas dio ki Jose su bitil lagboy ian ka tibon kalibutan.