40
Ka Taagbogoy To Boung Woy Ka Taaghilutu To Pan
1 To nigligad on ka pila no allow, duon allow no nakasao ka taagbogoy to boungawoy ka taaghilutu to pan dio to igbudyag dan no ian ka datu to Ehiptu. 2 Nabou ian si Parao dio to sikan no daruwa no hibatoon din no ian ka taagbogoy to boung woy ka taaghilutu to pan, 3 woy pigpakalabusu rin sikandan dio to baoy to igbudyag to mgo sundau no ogbantoy ki Parao, dio ian to kalabusu no pigkalabusuan ki Jose. 4 Inbogoy to taagbantoy to kalabusuan ka katongod ki Jose to pogbantoy kandan daruwa, woy si Jose ian ka nigbantoy kandan.
To nakalabusu sikandan to malmaugoy no allow, 5 to songo kaukiloman nakatagoinop ka sikan no daruwa no otow; ian ka taagbogoy to boung to datu to Ehiptu woy ka taaghilutu to pan din no duon to kalabusu, woy duon kaogsaran to sikan no mgo tagoinop dan. 6 To pogkapawo, nigsood si Jose dio to sinabong dan, woy nakakita sikandin no nigpatotonong sikandan daruwa. 7 No nig-inso si Jose to mgo hibatoon ni Parao no nakalabusu duma kandin to baoy to igbudyag din no kagi “Manio no inat mabogat ka mgo uu now kuntoon no allow?”
8 Nigtabak sikandan to “Nakatagoinop koy daruwa, di waro otow kai no ogpokohokad to sikan no mgo tagoinop noy.”
No nignangon si Jose kandan to “Kono buwa ka Magboboot ka ogpokohokad to mgo tagoinop? Nangoni a now to mgo tagoinop now.”
9 No nignangon ka taagbogoy to boung to tagoinop din ki Jose. Nigkagi sikandin to “Dio to tagoinop ku, nakakita a to lobut to ubasbdio to tangkaan ku, 10 woy tatou ka sugpang to sikan no lobut. To pogtunas to sikan, nigbulak on, woy noinug on ka mgo pungu to bogas din no ubas. 11 Duon ka boung ni Parao to boad ku, woy nigpupu a to mgo ubas woy pigpogo ku ka woig dan dio to boung, woy inbogoy ku ka boung ki Parao.”
12 Nignangon si Jose to “Soini ka kaogsaran to tagoinop nu. Ka tatou no sugpang ogpasabut to tatou no allow. 13 To igkatatou no allow kuntoon ogpatonggakon ni Parao ka uu nu, no iglibong koikow ka taan no hulingonon nu, no ogbogoy ka ro to boung dio to ki Parao, unawa to pighimu nu nokani. 14 Di ogbudyuon ku sikoikow to pogdoromdom kanak ko marodyow on ka pog-ugpo nu. Nangoni nu si Parao tongod kanak odyow no ogpakalibuwas a to soini no kalabusuan. 15 Hoo, su na-agow a puun to ugpaan to mgo Hibriu, woy agad kai, waro pighimu ku no litos no ogpakakalabusu kanak iing to soini.”
16 To pogkakita to taaghilutu to pan no marodyow ka hokad no inbogoy ni Jose, nignangon sikandin ki Jose to “Songo nakatagoinop a no duon tatou no bangkil to pan no in-utuk ku. 17 Dio to bangkil no naka-ampow, duon nigkaloinloin no mgo nautu no igbogoy ki Parao, di pigpangoon to mgo manuk-manuk ka mgo nautu puun to bangkil no in-utuk ku.”
18 Nigtabak si Jose to “Soini ka hokad. Ka tatou no bangkil ogpasabut to tatou no allow. 19 To igkatatou no allow kuntoon igpatampod ni Parao ka uu nu, woy igpabitoy ka lawa nu dio to kadyu, woy ogkoonon ka sapu nu to mgo manuk-manuk.”
20 Kuntoon niglopow ka igkatatou no allow no allow to pogkootow naan ni Parao, woy nighimu sikandin to pagkoonan tongod to mgo hibatoon din. Pigpatonggak din ka mgo uu to taagbogoy to boung woy to taaghilutu to pan, dio to tangkaan to mgo hibatoon din 21 no inpalibong din ka taagbogoy to boung dio to taan no hulingonon din odyow no ogbogoy man do to boung dio to boad ni Parao, 22 woy inpabitoy rin ka taaghilutu to pan, iing to innangon ni Jose kandan dio to poghokad din to mgo tagoinop dan.
23 Di waro naroromdom si Jose to taagbogoy to boung. Nalingawan din atag.