39
Si Jose Woy Ka Asawa Ni Potipar
1 No kuntoon pig-aap si Jose dio to Ehiptu. Ka nigboli ki Jose puun to mgo kapunganan ni Ismail ian si Potipar no matig Ehiptu no songo hibatoon ni Parao (no datu to Ehiptu). Si Potipar ian ka igbudyag to mgo sundau to baoy ni Parao. 2 Nigduma ka Magboboot ki Jose, woy marodyow ka pog-ugpo ni Jose dio to baoy to igbudyag din no matig Ehiptu.
3 To pogkakita to igbudyag ni Jose no pigdumaan si Jose to Magboboot woy no inpatood to Magboboot ka tibo no oghimuon ni Jose, 4 narago sikandin to pogpitow rin ki Jose woy nohimu si Jose no taagbulig kandin. Nigbogoy si Potipar to katongod ki Jose odyow no si Jose ian ka igbudyag to lunggunan ni Potipar, woy si Jose ka ogbantoy to tibo.
5 Ligkat to sikan no allow no nabogadyan si Jose to katongod to lunggunan woy to mgo kaaglagan ni Potipar, nigbunsud on no nigbolig ka Magboboot to lunggunan ni Potipar no matig Ehiptu tongod ki Jose. Naboligan ian to Magboboot ka tibo no duon ki Potipar lagkos to lunggunan woy to kamot din. 6 No inbaagad on ni Potipar ki Jose ka tibo no kandin; woy warad on ogdoromdomon ni Potipar ko konon ka koonon din naan do.
Kuntoon marodyow pitawon no otow si Jose, 7 woy waro do nigmaugoy no noiniat ka asawa ni Potipar ki Jose to pogpipitow woy nignangon sikandin to “Kai kad. Oghuhulid ki!” 8 Di waro nigbabali si Jose. Nignangon sikandin to asawa ni Potipar to “Pitow ka, waro nasasowan to igbudyag ku su nigbogoy sikandin kanak to katongod to tibo no kandin no duon to lunggunan din. 9 Waro loin no dakol kai to soini no lunggunan ko konon sikanak. Waro in-oog to igbudyag ku kanak ko konon sikoikow ro su asawa ka rin. No ogmonuon ku to poghimu to maroot no iing to sikan no ogpakasao a to Magboboot?” 10 Woy agad no allow-allow nig-aaukuy ka boi ki Jose, waro nigbabali si Jose to poghulid kandin woy agad to pogdumaruma kandin.
11 Songo allow to sikan, nigsood si Jose to baoy tongod to mgo oghimuon din, woy waro duma no suguonon no duon to sood to baoy. 12 Piggon-gonan to asawa ni Potipar ka kinabo ni Jose no nignangon “Huliri a!” Di nigpanlaguy si Jose dio to libuwasan no noongkoran din ka kinabo din dio to boad to boi.
13 To pogkakita to asawa ni Potipar no noongkoran ka kinabo ni Jose duon to boad din, su nigpanlaguy si Jose, 14 pig-umow rin ka mgo suguonon to baoy woy pignangonan din sikandan to “Pitow kow. Nighongkai ka soini no Hibriu no otow odyow to pogliagliag kanta! Nigsood sikandin kai odyow to poghulid kanak, di nigngangang a. 15 To pogkarinog din no nigpangiak a, noongkoran din ka kinabo din kai to kanak, no nigpallaguy sikandin to poglibuwas to baoy.” 16 Insabuk pad to asawa ni Potipar ka kinabo ni Jose taman to nig-uli on ka asawa rin. 17 No nignangon-nangon sikandin to soini no nangnangonon ki Potipar no kagi “Nighongkai ka sikan no Hibriu no uripon nu odyow to poghimu to maroot kanak. 18 Di to pogpangiak ku, noongkoran din ka kinabo din kai to kanak woy nigpallaguy sikandin no niglibuwas to baoy.”
19 To pogkarinog to igbudyag ni Jose to kinagian to asawa rin no nignangon “Soini ka pighimu to uripon nu kanak,” nigmoinit lagboy ka goinawa rin. 20 Inparakop din si Jose woy pig-aap din dio to kalabusuan, dio ian to kalabusuan to mgo pigpangkalabusu ni Parao.
Di tagood no dio si Jose to kalabusuan, 21 nigduma ka Magboboot kandin, woy nigpakita sikandin ki Jose to karodyowan din odyow ogkarago ka taagbantoy to kalabusuan to pogpitow rin ki Jose. 22 Nigbogoy ka taagbantoy ki Jose to katongod to pogbantoy to tibon mgo pigpangkalabusu dio, woy duon to ki Jose ka baagad to tibo no oghimuon sood to kalabusuan. 23 Waro ingkasasow to taagbantoy to kalabusuan ka agad nokoy no inbogoy rin ki Jose no ogkabantadyan, su nigduma ka Magboboot ki Jose, woy natood ka tibo no pighimu rin.