38
Si Juda Woy Si Tamar
1 To sikan no mgo tuid, nig-ongkod si Juda to mgo suod din, woy nighondio sikandin to pog-ugpo ki Hira no matig Adullam. 2 To nig-ugpo si Juda dio, nakakita sikandin to boi no anak ni Sua no matig Canaan. Pig-asawa ni Juda ka boi, woy nighuhulid sikandan. 3 Naboros ka asawa ni Juda, woy naka-anak sikandin to lukos no pighingaranan ki Ir. 4 Naboros man do ka asawa ni Juda, woy naka-anak sikandin to lukos no pighingaranan ki Onan. 5 Nighutuk man do naboros ka asawa ni Juda woy naka-anak to lukos no pighingaranan ki Sila. Dio sikandan nig-ugpo to Kisib to pogkootow ni Sila.
6 Nig-aam si Juda to og-asawoon ni Ir no panganoy rin. Ka ngaran to pig-aam din no asawa ian si Tamar. 7 Di maroot ka mgo pighimu ni Ir no panganoy ni Juda dio to tangkaan to Magboboot; no sikan ian pighimatadyan si Ir to Magboboot.
8 No nignangon si Juda ki Onan to “Huliri nu ka asawa to kakoy nu no ogbabalion nu ka hulingonon to ipag no ogpaanakon nu sikandin to kapunganan to kakoy nu.” 9 Di nataga si Onan no kono ogdoromdomon no kandin ka anak ni Tamar; nokoy naan to poghulid din to ipag din, pigbus-ug din ka boni din dio to tano, odyow no kono ogpaka-anak si Tamar to kapunganan to kakoy ni Onan. 10 Maroot ka pighimu rin dio to pogpitow to Magboboot; no sikan ian songo pighimatadyan si Onan to Magboboot.
11 No nignangon si Juda to amboy rin no si Tamar to “Ugpo ka iing to bau dio to baoy to amoy nu taman to pogdakol on ni Sila no anak ku.” Hoo, su nigsumansuman si Juda to “Naugpa ogkamatoy si Sila unawa to mgo kakoy rin.” Sikan ian nig-ugpo si Tamar dio to baoy to amoy rin.
12 To pogkaugoy namatoy ka asawa ni Juda no anak ni Sua. To konad amana ogmasakit ka goinawa ni Juda, nighondio sikandin to Timna odyow to poglouy to mgo nigpanampod to bulbul to mgo karniru rin.a Nigduma ka usi din no si Hira no matig Adullam. 13 Nakarinog si Tamar to “Oghondio ka anugang nu to Timna odyow to pogpanampod to mgo bulbul to mgo karniru rin.”
14 Sikan ian nigpanluung sikandin to kinabo din no tuus to bau, woy nigsau-ub sikandin to dangob no kinabo no duon ig-atang to langlanguan, woy nigpinnuu sikandin to gomawan to lunsud to Inaim no duon to daan pohondio to Timna. Hoo, su nakakita sikandin no agad no dakol on si Sila, waro pad sikandin impaasawa kandin.
15 To pogkakita ni Juda kandin, naan ni Juda no agkadyon no boi sikandin, hoo su pig-atangan din ka langlanguan din. 16 Waro nataga si Juda no amboy rin naan ka boi, no sikan ian nighondio sikandin ki Tamar dio to ilis to daan woy nignangon sikandin to “Dumoi a nu no huliri a nu kun.”
Nigtabak si Tamar to “Nokoy ka igkabogoy nu kanak ko oghulid a koikow?”
17 Nigtabak si Juda to “Ogpa-aapan ku sikoikow to nati no kambing puun to mgo adyam ku.”
Nig-inso si Tamar to “Nokoy ka igpamaogot nu no ibogoy nu kanak taman to ogkatinawo ku ka kambing?”
18 Nig-inso si Juda to “Nokoy ka inkoiniat nu no igpamaogot ku?”
Nigtabak si Tamar to “Ka tutuusoy nu duma to hikot din, woy ka tukod nu no duon to boad nu.” No sikan ian pigbogoy ni Juda ka inbudyu din, woy nighulid sikandin ki Tamar, woy naboros si Tamar.
19 To nighipanow on si Tamar, pig-awo din ka in-atang to langlanguan din woy insau-ub din man do ka mgo kinabo din no tuus to bau sikandin.
20 Nigpa-aap si Juda to nati no kambing duma to usi din no matig Adullam, odyow to poglokat din to inpamaogot din puun to boi, di waro makitoi si Tamar. 21 Nig-inso si Hira to mgo otow dio to “Hondoi ka agkadyon no boi no nigpinnuu duon to ilis to daan dio to Inaim?”
Nigtabak ka mgo otow to “Waro agkadyon no boi no nig-ugpo kai.”
22 Nig-uli si Hira dio ki Juda woy nignangon sikandin to “Waro a nakakita to boi, woy nokoy pad, nignangon ka mgo otow dio no waro kun agkadyon no boi no nig-ugpo dio.”
23 Nigtabak si Juda to “Baagaron tad sikandin to pogtagtuun to inbogoy ku, odyow no kono ki ogngingisian. Pig-ol-oogan ku ian to pogtood to innangon ku no nigpa-aap a to soini no nati no kambing, di waro nu makitoi sikandin.”
24 To nigligad on ka mgo tatou no buwan, nakarinog si Juda to “Nakasao ka amboy nu no si Tamar no nigpa-aagkoy sikandin no naboros on sikandin.” Nignangon si Juda to “Palibuwasa now sikandin to lunsud woy ogsilaban ta sikandin!”
25 Di to poglibuwas ni Tamar, nigtugun sikandin to otow pohondio to anugang din no kagi “Naboros a pinabadyo to otow no ian ka tagtuun to soini. Pitow ka ko noilaan nu ka soini no tutuusoy duma to hikot din, woy soini no tukod.” 26 Noilaan ni Juda ka mgo kaaglagan din woy nignangon sikandin to “Matuarong pad sikandin kanak, su waro ku ipangasawa kandin ka anak ku no si Sila.”
Waro nighutuk nighulid si Juda ki Tamar.
27 To pog-anak ni Tamar, sosoping no lukos ka igkaboros din. 28 To poghadyori rin, nigpalibuwas ka sagboka no bato to boad din, woy pighikotan to taag-udyamu ka boad to malaab no sinulid no nignangon “Soini ka nokohun-a no niglopow no ian ka kakoy.” 29 Di pighusud man do to bato ka boad din, woy ka suod din ian ka nighun-a niglibuwas. Nignangon si Tamar to “Soini naan ka poglosut nu!” No pighingaranan sikandin ki Piris no to kanta pad “poglosut.”
30 Nigmouri niglosut ka suod din no duon malaab no sinulid to kamomou rin, woy pighingaranan sikandin ki Sira no to kanta pad “malaab.”