37
Ka Mgo Tagoinop Ni Jose
1 Nig-ugpo si Jacob to tano no pig-ugpaan to amoy rin, ian ka tano to Canaan, 2 woy soini ian ka nangnangonon tongod ki Jacob.
To sampuu woy papitu on ka panuigon ni Jose, nigbantoy sikandin to mgo adyam duma to mgo suod din no mgo anak ni Silpa woy ni Bilha no mgo asawa to amoy rin. Pignang-nangonan ni Jose si Jacob no amoy rin tongod to maroot no pighimu to mgo kakoy rin.
3 No kuntoon dakol-dakol ka goinawa ni Israil ki Jose to goinawa rin dio to duma no mgo anak din, hoo su nootow si Jose to budyag-budyag on sikandin. Sikan ian pigpohimuan ni Jacob si Jose to kinabo no pigdorodyowan lagboy. 4 To pogkakita to mgo kakoy rin no si Jose ian ka indakoli to goinawa to amoy ran, pig-usig dan si Jose, woy waro marodyow no igkakagi ran kandin.
5 Nakatagoinop si Jose, woy to pognangon din to tagoinop din to mgo kakoy rin, natimuan ka igmaroot so goinawa ran kandin. 6 Nignangon si Jose to “Pamminog kow to soini no tagoinop ku: 7 Nigbabagkos ki to mgo ginaab no trigu dio to kamot, no inogo nigkawoy ka kanak no binagkos no nighasindog, tagood niglingut ka kaniu no mgo binagkos to kanak no nang-unduk sikandan.”
8 Nignangon ka mgo kakoy rin ki Jose to “Nigbantaan ka to pogboot kanami buwa? Koikow ka ogkohimu no igbudyag noy buwa?” Woy natimuan ka pog-usig dan ki Jose tongod to tagoinop din woy mgo kagi rin.
9 Nighutuk nigtagoinop si Jose woy pignangonan din ka mgo kakoy rin to tagoinop din. Kagi rin “Pamminog kow! Nakatagoinop a man do woy to soini no tagoinop ku ka allow woy ka buwan woy ka sampuu woy sagboka no bituon ian ka nang-unduk kanak.” 10 To pognangon din to tagoinop din dio to amoy rin duma to mgo kakoy rin, pigsaparan si Jose to amoy rin no kagi “Nokoy soini no tagoinop nu? Naan nu buwa no ogduma ka inoy nu woy kanak to mgo suod nu no og-unduk koy taman to tano dio to tangkaan nu?” 11 Noima ka mgo suod din ki Jose, di nigdoromdom si Jacob tongod to soini tibo.
12 Kuntoon, nanghondio ka mgo suod ni Jose to Sikim odyow to pogpasabsab to mgo adyam to amoy ran, 13 woy nignangon si Israil ki Jose to “Nataga ka no dio ka mgo suod nu marani to Sikim no nigpasabsab to mgo adyam. Loudya nu sikandan.”
Nigtabak si Jose to “No.”
14 Kagi pad ni Jacob to “Pitowa nu ko marodyow ka kougpo to mgo suod nu duma to mgo adyam, woy nangoni a nu ko og-uli ka.” No inpohipanow ni Israil si Jose puun to aug to Hibron. To poglopow ni Jose to Sikim, 15 duon otow no nakaambag ki Jose no niglougloug to mgo pasabsabanan, woy nig-inso sikandin ki Jose to “Nokoy ka ogpamanghoon nu?”
16 Nigtabak si Jose to “Pigpamitow ku ka mgo suod ku. Ogpakanangon ka buwa kanak ko hondoi sikandan nigpasabsab to mgo adyam dan?”
17 Nigtabak ka otow to “Nighalin on sikandan. Nakarinog a kandan no nignangon to “Oghondio ki to Dotan.””
Sikan ian nighipanow si Jose no nigsundul to mgo suod din, woy nakita rin sikandan dio to marani to Dotan. 18 Di, nakakita sikandan ki Jose to mariu pad sikandin, woy nigbabantak sikandan to poghimatoy kandin. 19 Nigmanang-nangonoy sikandan to “Soinid on ka taagtagoinop! 20 Oghimatadyan ta sikandin, woy idogpak ta ka lawa rin dio to sagboka to soini no mgo lungag to tanoa, woy ognangon ki no pighimatadyan sikandin to magintaunan no mabuut. No’g pitawon ta naan ko ogkatood ka mgo tagoinop din!”
21 To pogkarinog ni Riubin to sikan, nigpoomot sikandin to pogpangabang ki Jose. Kagi rin to “Kono ta ro oghimatadyan sikandin. 22 Dokow ogpaangosaa. I-uug now ro sikandin to soini no lungag to han-hanawan, di dokow oghilaboti sikandin.” Nignangon si Riubin to soini su nigbabantaan sikandin to poghawi ki Jose woy to pog-aap kandin uli to amoy rin.
23 Sikan ian to poglopow ni Jose to mgo suod din, pigluungan dan si Jose to kinabo din - ian ka dorodyawi lagboy no kinabo no insau-ub din, 24 woy pig-uug dan si Jose dio to lungag. Waro tagu no woig to sikan no lungag; mammara ian.
25 To nigkoon on sikandan, nigtonggak sikandan no nakakita to mgo taagsaliu no mgo kapunganan ni Ismail no nigpuun to Giliad. Inpang-untud to mgo kamil dan ka mgo aanag, mgo poomut woy ka mira, no ogparoog sikandan to Ehiptu odyow to pogpanaliu to sikan. 26 Nignangon si Juda dio to mgo suod din to “Nokoy ka ogkapurut ta ko oghimatadyan ta ka suod ta no og-uubat ki tongod kandin? 27 Marodyow pad nasi ko ogsaliuan ta sikandin to soini no mgo kapunganan ni Ismail no kono ki oghilabot kandin. Hoo, su suod ta ian sikandin no langosa ta.” No nighoo on ka mgo suod ni Juda.
28 Sikan ian to poglopow to mgo taagsaliu puun to Midian, pigbatun si Jose to mgo suod din puun to lungag, woy insaliu ran sikandin to kawaan no saapi, woy pig-aap si Jose to Ehiptu.
29 To poglibong ni Riubin to lungag woy nakita rin no warad on si Jose, pighigbit din ka mgo kinabo din tongod to masakit no goinawa rin. 30 Niglibong sikandin dio to mgo suod din no nignangon “Warad on ka bato dio! Nokoy ka oghimuon ku kuntoon?” 31 No nig-iow sikandan to sagboka no kambing woy inhalit dan ka kinabo ni Jose to langosa to kambing.
32 Pig-aap dan ka dorodyawi lagboy no kinabo no inpapitow to amoy ran woy nignangon sikandan to “Nakakita koy to soini. Molmoogi nu odyow no ogkataga ka ko kinabo to anak nu.” 33 Noilaan ni Jacob ka kinabo woy nignangon sikandin to “Kinabo to anak ku ian soini! Duon mabuut no magintaunan no nigdawi kandin. Noigbit-higbit on ian si Jose.”
34 No pighigbit ni Jacob ka mgo kinabo din, woy nigsau-ub sikandin to manggad no saku woy nigpandaawit sikandin to moon-ing no mgo allow tongod to anak din. 35 Nigdani ka tibon mgo anak din no mgo lukos woy mgo boi odyow no ogko-im-imuan poron sikandin, di waro sikandin moim-imui. Kagi rin “Dokow, su ogpandaawit a tongod to anak ku taman to ogkamatoy a.” No nigsisinogow si Jacob tongod ki Jose.
36 To dangob no nangnangonon, insaliu si Jose to mgo matig Midian dio to Ehiptu dio to ki Potipar no songo hibatoon to igbudyag to Ehiptu no oghingaranan no Parao.b Si Potipar ian ka igbudyag to mgo sundau no nigbantoy ki Parao.