2
Ka Kaikadyuan To Eden
1 No, sikan ian ka niglopow no naponga ka poghimu to Magboboot to langit woy to tano woy to tibo no duon to soini. 2 To niglopow on ka igkapitu no allow naponga to Magboboot ka tibo no pighimu rin, no sikan ian nighimooy sikandin to igkapitu no allow. 3 Pigboligan to Magboboot ka igkapitu no allow woy in-oog din sikan, hoo su sikan ian ka allow no nokohimooy sikandin to napongaan on ka mgo pighimu rin. 4 Sikan ian ka nangnangonon to poghimu to Magboboot to langit woy to tano.
To poghimu to Magboboot to langit woy to tano, 5 waro pad tumutubu woy waro pad pinamua no nakatubu; hoo su waro pad ipa-aap to Magboboot ka uran dio to tano, woy su waro pad otow no ogkakamot to tano, 6 di duon mgo sobsob no nigpawoig to tano: 7 nighimu ka Magboboot to otow ligkat to atigbun to tano woy nighiyup ka Magboboot to goinawa dio to irong to otow, no nigbunsud on niggogoinawa ka otow.
8 No, kuntoon, nigpatubu ka Magboboot to kaikadyuan dio to ogsilaan, dio to Eden, woy insabuk din dio ka otow no pighimu rin. 9 Woy nigpatubu ka Magboboot to tibo no nigkaloinloin no mgo kadyu dio to tano. Ian mgo kadyu no marodyow pitawon woy songo ogbogas to marodyow no ogkakoon. Dio to taliwaro to kaikadyuan duon ka kadyu to koudyagan woy duon ka kadyu no ogbogoy to katagaanan to maroot woy to marodyow. 10 Duon woig no nigpawoig to kaikadyuan no nigtu-aug ligkat to Eden. To dibabo to Eden, nabaad ka sikan no woig to hop-at no woig. 11 Ka ngaran to an-anadyan to sikan no mgo woig ian ka Pison. Nigtiku-tiku soini to tibo no tano to Havila no songo ligkatan to bulawan. 12 (Marodyow ka bulawan to sikan no longod. Songo duon moumut no saong woy mgo mahalon no mgo batu dio.) 13 Ka igkaruwa no woig no nigligkat to Eden ian ka Gihon. Nigtiku-tiku soini to tibon tano to Kus. 14 Ka igkatou no woig ian ka Tigris; ogkaanlas soini to ogsilaan no ilis to Assur. Woy ka igkohop-at no woig ian ka Eupratis.
15 No, pigpurut to Magboboot ka otow woy insabuk din sikandin dio to kaikadyuan to Eden odyow to pogtarabau woy odyow to pogbantoy to sikan. 16 No, pignangonan ka otow to Magboboot no kagi “Ogpakakoon ka to bogas to agad hondoi no kadyu kai to kaikadyuan 17 di doka ogkoon to bogas to kadyu no ogbogoy to katagaanan to maroot woy to marodyow, hoo su ko ogkoonon nu sikan ogkamatoy ka.”
18 Nigkagi ka Magboboot to “Konon marodyow no sagsagboka ro ka otow. Oghimuon ku ka taagbulig no litos kandin.” 19 No kuntoon, pighimu to Magboboot ligkat to tano ka tibo no mgo adyam woy mgo manuk-manuk to aw-awangan. Pig-aap to Magboboot ka tibo to soini dio to tangkaan to otow odyow no oghingaranan to otow. Agad nokoy ka ngaran no inbogoy to otow dio to mgo duon goinawa ian ka ngaran dan. 20 No, pighingaranan to otow ka tibo no mgo adyam, mgo manuk-manuk to aw-awangan woy ka mgo magintaunan, di waro makitoi ka taagbulig no litos to otow. 21 Sikan ian pigpohirogo to Magboboot ka otow, woy nalinoknok ka otow. No, tagood to nohirogo ka otow, nigpurut ka Magboboot to sagboka no gusuk to otow woy pigpakimutan to Magboboot ka pigpurutan to gusuk to sapu. 22 No, piggamit to Magboboot ka gusuk no napurut din to otow odyow to poghimu to sagboka no boi, woy pig-aap din ka boi dio to lukos. 23 Nigkagi ka lukos to “Soini ian ka bokog ligkat to bokog ku, ka sapu ligkat to sapu ku. Ogkohingaranan sikandin no boi su pigpurut sikandin ligkat to lukos”a 24 Sikan ian ka pugtian no og-ongkod ka lukos to amoy woy inoy rin woy ogkasagboka to asawa rin; ogkohimu sikandan no sagboka ro no lawa. 25 Waro pad kinabo to lukos woy to igboi, di kono pad ogkasipod.