3
Nakasao Ka Otow
1 No kuntoon, dio to tibo no mgo magintaunan no pighimu to Magboboot, ka uod ian ka dorodyawi no ogpanggawoy. Nig-inso ka uod dio to boi no kagi “Maogot buwa no nigkagi ka Magboboot no ‘kono kow ogpakakoon to mgo bogas to mgo kadyu kai to kaikadyuan’?” 2 Nigtabak ka boi dio to uod no kagi “Ogpakakoon koy to mgo bogas to kadyu kai to kaikadyuan, 3 di nigkagi ka Magboboot to ‘kono kow ogpakakoon to bogas to kadyu no duon dio to taliwaro to kaikadyuan, woy dokow ogsamsam to soini, hoo su ogkamatoy kow ian.’” 4 Nigkagi ka uod dio to boi to “Kono kow ogkamatoy” 5 kagi rin “Hoo su nataga ka Magboboot no ko ogkoonon now sikan ogka-puwasan ka mgo mata now woy ogkounawa kow to Magboboot no ogkataga kow ko nokoy ka maroot woy ko nokoy ka marodyow.” 6 To nakakita ka boi no marodyow no ogkoonon ka bogas to sikan no kadyu, woy marodyow pitawon woy songo ogkakoiniatan odyow to pogtimul to katagaanan, nigpurut sikandin to sikan woy pigkoon din. Songo pigbogadyan din ka iglukos din no duon duma kandin woy nigkoon ka lukos to sikan. 7 Waro do malingon-ngon no napuasan ka mgo mata ran woy nataga on sikandan no waro naan kinabo dan. Nigsasaugsug sikandan to mgo doun to kadyu no igira odyow no oghimuon no ig-atang to lawa ran. 8 No, to moumil on ka allow, nakarinog ka lukos woy ka asawa rin to Magboboot no niglougloug to kaikadyuan woy nighoos sikandan dio to kaikadyuan. 9 Di pig-umow to Magboboot ka otow no kagi “Hondoi ka?” 10 Nigtabak ka lukos to “Narinog ku sikoikow to kaikadyuan, woy nahallok a su waro kinabo ku, no nighoos a.” 11 Woy nig-inso ka Magboboot to “Hontow ka nignangon koikow no waro kinabo nu? Nigkoon ka buwa to bogas to kadyu no kono ku igpakoon koikow?” 12 Nigtabak ka lukos to “Ka boi no insabuk nu kai duma koddi ian ka nigbogoy koddi to bogas to sikan no kadyu, sikan ian no nakakoon a.” 13 No, nigkagi ka Magboboot dio to boi to “Nokoy soini no pighimu nu?” Nigtabak ka boi to “Nagawadyan a to uod, woy nakakoon a.” 14 No pignangonan to Magboboot ka uod to “Tongod su soini ian ka pighimu nu, ogkatungadyawan ka labow to tibon mgo adyam woy mgo magintaunan. Ogdul-ug ka to tano pinabadyo to gotok nu, woy atigbun do ka ogkoonon nu to tibo no mgo allow to ukul nu. 15 Woy ogpo-us-usigoy kow to boi, woy ogpo-us-usigoy ka kapunganan din woy ka kapunganan nu - oglupoton din ka uu nu woy ogsakmagon nu ka pau rin.”
16 Dio to boi nigkagi ka Magboboot to “Ogtimuan ku ka igkabaybadyari nu to pogpanganak nu; woy ka ro ogpaka-anak ko oggoramon nu ka masakit. Ogko-ibogan nu ro ka asawa nu woy sikandin ka ogboot koikow.”
17 Dio ki Adamanigkagi ka Magboboot to “Tongod su nigpamminog ka to asawa nu, woy nakakoon ka to bogas to kadyu no innangon ku koikow no ‘kono ka ogkoon to sikan’, ogtungadyawan ku ka tano tongod koikow. Tagood to duon pad goinawa nu, kono ka ogpakakoon to ogligkat to tano ko konon pinabadyo to dakol no koirapan nu ro. 18 Oglopow no duon dugion woy sampinit dio woy ogkoon ka to mgo pinamua to tano. 19 Woy ka ro ogpakakoon to koonon nu ko pinabadyo to limusong nu taman to poglibong nu to tano; hoo su ligkat to sikan nohimu ka. Atigbun ka ro woy oglibong ka ro to atigbun.”
20 Pighingaranan ni Adam ka asawa rin ki Ebabsu ogkohimu sikandin no inoy to tibo no mgo manokal. 21 Nighimu ka Magboboot to mgo kinabo no laplap litos ki Adam woy to asawa rin, woy nanginabo sikandan. 22 No nigkagi ka Magboboot to “Nohimu ka otow no unawa kanta no nataga on ko nokoy ka maroot woy ko nokoy ka marodyow. No kuntoon kono poron ogpakapurut sikandin no ogkoon to bogas to kadyu to koudyagan su kono poron ogkoudyag sikandin taman to katamanan.” 23 Sikan ian pigdogil to Magboboot ka otow ligkat to kaikadyuan to Eden odyow no ogkakamot sikandin to tano no pigpuunan din. 24 Takas to pogdogil to Magboboot to otow, pigsabukan din to diwata woy kampilan no niglogdog no naligot woy nigkiblat-kiblat dio to ogsilaan to kaikadyuan to Eden odyow no ogko-ootan ka daan no ogdoog to kadyu to koudyagan.