Genesis 4

Si Kain Woy Si Abil

¹ No kuntoon, nighulid si Adam to asawa rin no si Eba, woy naboros si Eba woy nanganak sikandin woy si Kainian ka anak din. Nignangon si Eba no kagi “Pinabadyo to pogbulig to Magboboot naka-anak a to otow” ² Nighutuk nig-anak si Eba to hari ni Kain no ian si Abil.

No kuntoon taagbantoy to mgo adyam si Abil woy nigtarabau si Kain to tano. ³ Songo allow to sikan nigtubad si Kain to mgo bogas to pinamua rin dio to Magboboot. ⁴ Di nig-aap si Abil to mgo maambog no mgo pori to mgo panganoy to mgo adyam din. Narago ka Magboboot ki Abil woy to panubad din, ⁵ di waro sikandin marago ki Kain woy to panubad din. Nokoy naan nabou lagboy si Kain woy niglaangot sikandin.

⁶ Nig-inso ka Magboboot ki Kain no kagi “Manio to nabou ka? Manio to niglaangot ka? ⁷ Ko oghimu ka to marodyow, ogkarago a koikow. Di ko kono ka oghimu to marodyow duon on ka sao marani kuna. Ogkoiniat ka sao koikow di ogdoogon nu porom sikan.” ⁸ No nighinggat si Kain to hari rin no si Abil no kagi “Oghondio ki to kamot.” Tagood no dio sikandan to kamot pigtinagpaan ni Kain ka hari rin no si Abil woy pighimatadyan din.

⁹ No nig-inso ka Magboboot ki Kain no kagi “Hondoi ka hari nu no si Abil?”

Nigtabak si Kain to “Hintanaan! Bak taagbantoy a to suod ku?” kagi.

¹⁰ Nignangon ka Magboboot to “Nokoy ka nohimu nu? pamminogi nu! Nig-umow koddi ka langosa to hari nu ligkat to tano. ¹¹ Kuntoonogtungadyawan ka woy ogkarogil ka ligkat to sikan no tano no nakasupsup to langosa to hari nu ligkat to boad nu. ¹² Ko ogkakamot ka to tano, konad ogbogoy sikan to bogas kuna. Oglougloug ka ladyun to kalibutan no waro himooy.”

¹³ Nigtabak si Kain dio to Magboboot to “Kono a ogpaka-goon to logpad nu koddi. ¹⁴ Kuntoon pigdogil a nu to soini no tano, woy ogkamariu a to tangkaan nu. Ogkohimu a no taaglougloug no waro himooy kai to tano woy oghimatadyan a agad hontow no ogpakakita koddi.”

¹⁵ Di nigkagi ka Magboboot kandin to “Konon maogot. Ko duon oghimatoy koikow Kain, ogsulian ku sikandin to papitu no akob.” No pigsabukan to Magboboot si Kain to indanan odyow ko duon ogkita kandin kono oghimatadyan sikandin. ¹⁶ Sikan ian nigpamariu si Kain ligkat to tangkaan to Magboboot, woy nig-ugpo sikandin to tano dio to Nod, dio to ogsilaan to Eden.

¹⁷ Nighulid si Kain to asawa rin, woy naboros, woy naka-anak to lukos no si Inok. Nigpos-ok si Kain to dakol no ugpaan to sikan no mgo tuid, woy insangoy rin ka dakol no ugpaan to anak din no si Inok. ¹⁸ Ka anak ni Inok ian si Irad, woy si Irad ian ka amoy ni Mihudyail, woy si Mihudyail ian ka amoy ni Mitusail woy si Mitusail ian ka amoy ni Lamik.

¹⁹ Nigduruwoy si Lamik; ka sagboka no asawa rin ian si Ada woy ka igkarangob ian si Sila. ²⁰ Nig-anak si Ada ki Yabal. Si Yabal ian ka amoy to tibo no og-ugpo to mgo tukbungwoy to mgo taagbantoy to mgo adyam. ²¹ Ka ngaran to suod din ian si Yubal. Si Yubal ian ka amoy to tibo no ogmanauroy woy ogpamuondag. ²² Songo duon anak no lukos ni Sila no ian si Tubal-Kain, no nigsasalsal to nigkaloinloin no mgo kaaglagan no tumbaga woy putow. Si Naama ian ka atoboi ni Tubal-Kain.

²³ Nignangon si Lamik to mgo asawa rin no kagi

“Ada woy Sila, pamminogi a now,

mgo asawa ni Lamik pannalinga kow to mgo kagi ku.

Nokohimatoy a to otow no nigpali koddi,

to baubato no nighisakit koddi. ²⁴ Ko ogkasulian si Kain to papitu no akob,

ogkasulian si Lamik to kapituan woy papitu no akob!”

²⁵ Nighutuk nighulid si Adam to asawa rin, woy naka-anak ka asawa to lukos. Pighingaranan ni Eba ka anak din ki Sit, no kagi “Nabogadyan a to Magboboot to sagboka pad no anak liwan ki Abil su pighimatadyan sikandin ni Kain.” ²⁶ Songo duon anak ni Sit no lukos, woy pighingaranan sikandin ki Inos.

To sikan no mgo tuid nigbunsud on ka mgo otow to pog-umow to ngaran to Magboboot.