35
Mgo Udlin to Allow to Poghimooy
1 Piglimud ni Mosis ka tibon koot-otawan to Israil woy pignangonan din sikandan to “Soini ka mgo insugu to Magboboot no oghimuon now:
2 Sood to hon-om no allow ogtarabau kow, di ka igkapitu no allow ian ka in-oog no allow now no allow to poghimooy duon to Magboboot. Agad hontow no ogtarabau to sikan no allow ogkohimatadyan. 3 Dokow ogtotomog to hapuy to agad hondoi no baoy now to allow to poghimooy.”
Mgo Igtaruwoy odyow to Poghimu to Tukbung
4 Nigkagi si Mosis dio to tibon koot-otawan to Israil to “Soini ka insugu to Magboboot:
5 Ogpurut kow ligkat to duon to kaniu ko nokoy ka igtaruwoy now to Magboboot. Agad hontow no ogkoiniat, og-aap sikandin dio to Magboboot to igtaruwoy no bulawan ko plata woy ko brunsi; 6 to mgo sinulid no moilom, moitom-itom woy malaab woy marodyow no manggad no linu; woy ko bulbul to kambing; 7 og-aap kow to mgo laplap to kambing no pig-ood to malaab, woy mgo laplap to mgo bakaato dagat; aap kow pad to kadyu no akasya; 8 aapa now ka lana no olibu no igparokot to ilawan; mgo aanag no iglamisok to lana no ig-oog woy to palina; 9 aap kow pad to mgo mahalon no mgo batu no igpo-ilin-ilin to mgo kinabo to taagpanubad no hingaranan no ipod woy ka atang to sosoobon.
10 “Agad hontow kaniu no duon katagaanan to poghimu, dani kow odyow to poghimu to tibo no insugu to Magboboot: 11 iglagkos ka tukbung woy ka tol-ob din, mgo ligpit, mgo tukias, mgo suwoy woy sabukanan to suwoy; 12 ka sooranan to kasabutan woy mgo loungan no kadyu rin woy ka soob din woy ka manggad no ig-oot to sikan; 13 oghimuon pad ka lamisa woy ka mgo kadyu no loungan to sikan woy mgo kaaglagan din odyow no ogsabukan to pan to Tangkaan to Magboboot; 14 ka sabukanan to ilawan woy mgo ilawan woy lana no igparokot woy mgo kaaglagan to ilawan; 15 iglagkos pad ka tubaranan to palina duma to mgo loungan din woy lana no ig-oog woy moomut no palina; ka manggad no ig-oot to gomawan to tukbung; 16 ka tubaranan to mgo tutungon no igta-taruwoy duma to brunsi no sig-ang din, mgo loungan woy mgo kaaglagan; ka lipung no brunsi duma to sabukanan to sikan; 17 iglagkos pad ka mgo manggad no ig-aad to lama to tukbung duma to mgo suwoy to sikan woy mgo sabukanan to mgo suwoy, duma to manggad no ig-atang to gomawan to lama; 18 iglagkos ka mgo hikotanan to tukbung woy to aad to lama no igpamal-pal to tano duma to mgo lubid no ighikot; 19 taman to oghimuon now pad ka mgo kinabo no igsau-ub to mgo ogtarabau to in-oog no tukbung; iglagkos ka mgo kinabo ni Aaron no taagpanubad woy mgo kinabo to mgo anak din no igsau-ub dan to pogtarabau ran to pogpanubad.”
20 No, nigman-uli ka tibon koot-otawan to Israil ligkat to pogtangko dan ki Mosis, 21 woy nig-aap ka tibo no na-antog ka goinawa ran to mgo igtaruwoy to Magboboot odyow no ogkagamit to tarabau to tukbung to pogtangko, woy to mgo tarabau dio woy mgo in-oog no mgo kinabo. 22 Nig-aap ka tibo no nigkoiniat, iglagkos mgo lukos woy mgo boi to mgo bulawan no mgo kimpit, mgo arikis, mgo sising woy duma pad. Pigpanubad dan ka bulawan dan duon to Magboboot pinabadyo to pogkawoy to tangkaan din. 23 Agad hontow no duon mgo sinulid no moilom, moitom-itom woy malaab woy marodyow no manggad no linu woy ko bulbul to kambing woy ko mgo laplap to kambing no pig-ood on to malaab, woy mgo laplap to mgo baka to dagat nig-aap to sikan. 24 Ko hontow ka nigbogoy to plata woy ko brunsi nig-aap to sikan no intaruwoy ran duon to Magboboot, woy ko hontow ka duon kadyu no akasya nig-aap to sikan odyow no ogkagamit to loinloin no mgo baad to tarabau. 25 Niglulubid ka kara boi no duon katagaanan dan to sikan, woy pig-aap dan ka pighimu ran no mgo sinulid no moilom, moitom-itom woy malaab woy ko marodyow no manggad no linu. 26 Woy songo niglulubid to bulbul to kambing ka mgo boi no nigkoiniat woy no duon katagaanan to sikan. 27 Nig-aap ka mgo igbudyag to mgo mahalon no mgo batu no isabuk to ipod woy atang to sosoobon to taagpanubad. 28 Songo pig-aap dan ka mgo aanag woy lana to olibu no igparokot to ilawan woy iglamisok to ig-oog no lana woy to moomut no palina.
29 Agad hontow to tibon mgo otow to Israil no nigkoiniat to pog-aap to igbogoy duon to Magboboot nig-aap to sikan no konon pinogos odyow no oggamiton to mgo tarabau no insugu to Magboboot kandan pinabadyo ki Mosis.
Si Bisalil woy Si Oholiab
30 No nignangon si Mosis to koot-otawan to Israil to “Pitow kow, pig-aam to Magboboot si Bisalil no anak ni Uri no anak ni Hur no kapunganan ni Juda, 31 woy pighiponu din sikandin to Gimukud to Magboboot no nigbogoy to katagaanan woy katouanan to tibon kalkalasi no himuonon; 32 odyow no ogpokohimu sikandin to mgo po-ilin-ilin to bulawan, to plata woy to brunsi, 33 to pogbas-bas woy pogpakopkop to mgo batu woy to pogtarabau to kadyu woy to duma pad no mgo maddodyow no mgo tarabau to poghimu. 34 Woy pigbogadyan to Magboboot si Bisalil woy si Oholiab no anak ni Ahisamak no kapunganan ni Dan to katagaanan to pogtuon to duma. 35 Pighiponu sikandan to Magboboot to katagaanan odyow to poghimu to loinloin no mgo maddodyow no mgo tarabau, mgo pogbabantaan, mgo pogtoi to pogpo-ilin-ilin pinabadyo to mgo sinulid no moilom, moitom-itom woy malaab woy marodyow no manggad no linu woy duma pad no manggad. Ogkataga sikandan to tibo no dorodyawi no tarabau.