34
Iam no mgo Batu no Napatik
1 Nigkagi ka Magboboot ki Mosis to “Basbasi nu ka daruwa no batu unawa to an-anadyan, woy ogpatikan ku sikan to mgo kinagian no duon to nokohun-a no mgo batu no piggopang nu. 2 Himpod ka odyow to pogtakorog to bubungan to Sinai asoom to masoom. Ogtangko ka koddi dio to igdus to bubungan. 3 Waro otow no ogduma koikow, woy waro otow no ogdiok to bubungan, agad ko mgo adyam no mgo karniru, kambing woy ko baka kono ogpasabsabon sikandan to linogsaran to bubungan.”
4 No nigbasbas si Mosis to daruwa no batu iing to nokohun-a no mgo batu, woy nigtakorog sikandin to bubungan to Sinai to masoom pad sumao to innangon to Magboboot kandin, woy pigkomkom din ka daruwa no batu. 5 No niglogsad ka Magboboot pinabadyo to gapun woy nighasindog dio duma ki Mosis, woy pigkagi rin ka ngaran din no Magboboot. 6 Nigligad sikandin to tangkaan ni Mosis tagood to nigkagi sikandin “Ka Magboboot ian ka Magboboot, ka mohimonawon woy moid-uon no Igbudyag, mananoy ogkabou, dakol lagboy to goinawa woy to pogkamatuarong, 7 ogdakolon din ka goinawa rin dio to linibu no mgo otow, mopo-iguon to mgo sao, mgo pog-atu woy karootan. Di kono din ogbaagaron ka mgo nakasao; oglogparan din taman to igkatou woy ko igkohop-at no kapunganan ka mgo anak to mgo amoy no nakasao.”
8 Nig-agpas nig-unduk si Mosis no niglangkob duon to tano to pogsadyo. 9 Nigkagi sikandin to “Magboboot, ko narago ka koddi, ogdumaan koy nu poron. Agad ko makogal ka uu to soini no koot-otawan, ogpamudyuon ku sikoikow to pogpo-igu to mgo sao noy woy karootan noy woy himua koy nu no indakoli nu.”
10 No nigkagi ka Magboboot to “Oghimuon ku kuntoon ka kasabutan ku kaniu. To tangkaan to tibon koot-otawan nu oghimu a to mgo ogko-in-inuan no waro pad himua to agad hondoi no koot-otawan to kalibutan. Ogpakakita ka koot-otawan no niglingut koikow ko monu mokohinhinaat ka oghimuon ku to koikow. 11 Babalia now ka igsugu ku koikow kuntoon. Ogdogilon ku to tangkaan now ka mgo koot-otawan no mgo kapunganan ni Amor, ni Canaan, ni Hit, ni Piris, ni Hib woy ni Yibus. 12 Bantadyi now no kono kow oghimu to kasabutan to mgo otow no nig-ugpo to tano no oghondiaan now, su ogkohimu sikandan no lit-ag kaniu. 13 Gugusa now ka mgo tubaranan dan, woy gopanga now ka mgo tinuuhan dan no mgo batu, woy poora now ka mgo tinuuhan dan no pighingaranan no mgo suwoy ni Asira. 14 Dokow ogsadyo to loin no tinuuhan, su talikuron ian ka Magboboot su sikan ka ngaran din. 15 Bantadyi now no kono kow oghimu to kasabutan to mgo otow no nig-ugpo to tano no oghondiaan now; hoo su ko ogduaron dan ka kabantug dan pinabadyo to pogsadyo to mgo tinuuhan dan woy to pogtubad dan, oghinggaton kow ran woy ogkoon kow to mgo pigpanubaran dan. 16 Woy ko og-aam kow to mgo anak dan no mgo boi no og-asawoon to mgo anak now, woy ko ogduaron to sikan no mgo boi ka kabantug dan pinabadyo to pogsadyo to mgo tinuuhan dan og-aapon dan ka mgo anak now no lukos to sikan no hinimuan.
17 “Dokow oghimu to mgo inotowotow no inpatunow.
18 “Himua now ka pogkoonan to Pan no Waro Igpatulin. Sood to papitu no allow ogkoon kow to pan no waro igpatulin unawa to insugu ku kaniu. Himua now soini to litos no allow to buwan to Abiba, su sikan ian ka buwan no nigligkat kow to Ehiptu.
19 “Koddi ka tagtuun to kara panganoy to kara aanakan, iglagkos ka mgo panganoy no adyam now ko baka woy ko karniru. 20 Lokata now ka panganoy no asnu pinabadyo to karniru, di ko kono nud oglokaton, bunggu-a nu ka liog din. Lokata now ka tibon panganoy no mgo anak now no lukos. Waro otow ka ogtangko koddi no waro og-aapon din no igpanubad.
21 “Ogtarabau kow to hon-om no allow, di to igkapitu no allow oghimooy kow; agad to buwan to pog-oorok woy to buwan to pogga-ani now, oghimooy kow ian.
22 “Himua now ka Pogkoonan to mgo Simanabpinabadyo to an-anadyan no ani to trigu, woy himua now ka Pogkoonan to Punpun to katapusan to tuid. 23 Katatou ian to kara tuid, ogtangko ka tibon mgo lukos koddi no Mabogbog no Magboboot no Igbudyag to Israil.
24 “Ogdogilon ku ka mgo koot-otawan hun-a kaniu woy ogmau-agon ku ka oatanan to tano now, woy waro og-agow to tano now tagood to poghipanow now to pogtangko koddi no Magboboot now to katatou kara tuid.
25 “Dokow pogdongana to pogpanubad ka langosa to adyam woy ka agad nokoy no duon igpatulin, woy dokow hipawoi ka samo to tubad to Pogkoonan to Pogligad. 26 Aapa now ka dorodyawi no an-anadyan no abut to mgo pinamua now to baoy to Magboboot no Igbudyag now.
“Dokow oghilutua ka nati no kambing duon to gatas no nigligkat to kandin no inoy.c”
27 No nigkagi ka Magboboot ki Mosis to “Isulat nu ka sikan no mgo kinagian su pinabadyo to sikan no kinagian pighimu ku ka kasabutan ku to koikow woy to Israil.”
28 Duon si Mosis duma to Magboboot to kohop-atan no allow woy kohop-atan no kaukiloman to waro koon din woy waro inom din. Nigsusulat sikandin to mgo batu ka mgo kinagian to kasabutan no ian ka sampuu no sugu.
Ka Maadyag no Langlanguan ni Mosis
29 To pogtupang ni Mosis to bubungan to Sinai no nigkomkom to daruwa no batu to Kasabutan, waro sikandin nataga no nigmaadyag naan ka langlanguan din tongod su nigtangko sikandin to Magboboot to pog-a-aukoy.
30 To pogkakita ni Aaron woy to tibon mgo otow to Israil no nigmaadyag ka langlanguan ni Mosis, nahallok sikandan to pogdani kandin. 31 Di nig-umow si Mosis kandan; no niglibong si Aaron woy ka tibon mgo igbudyag to koot-otawan to kandin woy pigkagian din sikandan. 32 Takas to sikan nigmandani ka tibon koot-otawan to Israil ki Mosis woy pigpangnangonan din sikandan to tibon mgo sugu no innangon to Magboboot kandin duon to bubungan to Sinai. 33 To pogkaponga ni Mosis to pogkagi kandan, pigtol-oban din ka langlanguan din. 34 Di to kara nigdani si Mosis to Magboboot odyow to pogkagi kandin, pig-awo din ka tol-ob taman to poglibuwas din. To poglibuwas din, pignangonan din ka mgo otow to Israil ko nokoy ka insugu to Magboboot, 35 woy nakakita sikandan no nigmaadyag ka langlanguan din. No pigtol-oban man do ni Mosis ka langlanguan din taman to poglibong din dio to Magboboot odyow to pog-a-aukudyoy.