33
1 No nigkagi ka Magboboot ki Mosis to “Ongkori now ka soini no ugpaan, sikoikow duma to mgo otow no pig-aap nu ligkat to Ehiptu, woy oghondio kow to tano no inpangulibot ku ki Abraham, ki Isaak woy ki Jacob no nigkagi a to ‘Igbogoy ku sikan to mgo tipouri now.’ 2 Ogpohuno-on ku ka diwata ku kaniu no og-awoon din ka mgo kapunganan ni Canaan, ni Amor, ni Hit, ni Piris, ni Hib woy ni Yibus. 3 Takorog kow to tano no pigpuunan to gatas woy tonob no dakol. Di kono a ogduma kaniu, su makogal ka uu now woy naugpa ko oghimatadyan ku sikaniu dio to daan.”
4 To pogkarinog to mgo otow to soini no mgo kinagian no masakit, nigbunsud sikandan to pogpandaawit, woy waro otow nigsau-ub to mgo pohubunga. 5 Hoo su nigkagi on ka Magboboot ki Mosis to “Nangoni nu ka mgo otow to Israil to ‘Makogal ka mgo uu now. Ko ogduma a kaniu agad to sagboka ro no pogpoo-poo, naugpa ko ogpanghimatadyan ku sikaniu. No kuntoon awaa now ka mgo pohubung now woy ogdoromdomon ku ko nokoy ka oghimuon ku kaniu.’”
6 No sikan ian pigpang-awo to mgo otow to Israil ka mgo pohubung dan dio to longod to bubungan to Horibb.
Ka Tukbung to Pogtangko
7 No kuntoon ladyun ogpos-ok si Mosis to sagboka no tukbung dio to libuwasan to pig-ugpaan to mgo otow dio to madmariu woy pighingaranan din no “Tukbung to Pogtangko.” Ko duon otow no duon ig-inso din to Magboboot, oghondio ka otow to Tukbung to Pogtangko dio to libuwasan to pig-ugpaan to mgo otow. 8 To kara oghondio si Mosis to sikan no tukbung, ogmansasindog ka tibon mgo otow no nigpo-onong-onong to longod to gomawan to mgo tukbung dan no nigpitow ki Mosis taman to nigsood sikandin to tukbung. 9 To pogsood ni Mosis to tukbung, niglogsad ka suwoy no gapun woy nigpalinggaat sikan dio to gomawan tagood to nig-a-aukuy ka Magboboot ki Mosis. 10 Ko ogkita ka mgo otow to suwoy no gapun no ogsasindog to gomawan to tukbung, nigsasindog sikandan to pogsadyo, kara otow duon to gomawan to kandin do no tukbung. 11 Nig-a-aukuy ka Magboboot ki Mosis no nigtangko unawa to sagboka no otow no og-aukuy to duma rin. Takas to pogtangko ni Mosis to Magboboot nig-uli sikandin to pig-ugpaan to mgo otow, di nigpalinggaat si Josue no anak ni Nun dio to tukbung. Si Josue ian ka baubato pad no taagbulig ni Mosis.
Si Mosis woy ka Kabantug to Magboboot
12 Nigkagi si Mosis to Magboboot to “Nignangon ka koddi to ‘Aapa nu soini no koot-otawan’, di waro ka mognangon ko hontow ka ogparumaon nu kanak. Nignangon ka to ‘Nokoila a to ngaran nu woy narago a koikow.’ 13 Ko narago ka koddi, tuona a nu to mgo udlin nu odyow no ogko-ilaan ku sikoikow woy no ogparagas no ogkarago ka koddi. Doromdoma nu no soini no mgo otow ian ka koot-otawan nu.”
14 Nigtabak ka Magboboot to “Koddi ka ogduma koikow, woy ogpohimoodyon ku sikoikow.”
15 No nigkagi si Mosis to Magboboot to “Ko kono ka ogduma kanami, kono koy nu ogpohipanawa. 16 Monuon pogkataga to mgo otow no narago ka koddi woy to koot-otawan nu ko kono ka ogduma kanami? Nokoy pad ka indanan no sikoddi woy ka koot-otawan nu waro nig-unawa to tibon duma no koot-otawan to ampow to tano?”
17 No nigtabak ka Magboboot ki Mosis to “Oghimuon ku ka inbudyu nu ian su narago a koikow woy noilaan ku ka ngaran nu.”
18 No nigkagi si Mosis to “Kuntoon papitowa a nu to kabantug nu.”
19 No nigkagi ka Magboboot to “Ipakita ku koikow ka tibon karodyowan ku no ogligad to tangkaan nu, woy ogkagion ku ka ngaran ku no Magboboot to tangkaan nu. Ogkoid-uan ku ko hontow ka ogkoid-uan ku, woy ogkohimonow a to ogkohimonowan ku no otow. 20 Di, kono ka ogpakakita to langlanguan ku, su waro otow no ogpakakita to langlanguan ku no ogpalinggaat no manokal.”
21 No nigkagi pad ka Magboboot to “Duon longod to marani ku, woy ogpakasasindog ka to sagboka no batu dio. 22 Ko ogligad ka kabantug ku, igsabuk ku sikoikow to goat to batu, woy ogtol-oban ku sikoikow to boad ku taman to nakaligad ad on. 23 No og-awoon ku ka boad ku no ogpakakita ka to poka ku; di kono ogkakitaan ian ka langlanguan ku.”