32
Ka Bulawan no Nati no Baka
1 To pogpitow to mgo otow no maugoy lagboy si Mosis no waro mogtupang puun dio to bubungan, piglingutan dan si Aaron woy nignangon sikandan to “No, himui koy to mgo tinuuhan no oghun-a kanta. Si Mosis ian ka nig-aap kanta ligkat to Ehiptu, di hondoid on buwa sikandin?”
2 Nigtabak si Aaron kandan to “Panlokaa now ka mgo bulawan no mgo arikis no pigpang-arikis to mgo asawa now woy mgo anak now no mgo lukos woy boi, woy aapa now sikan kai to koddi.”
3 No sikan ian pigloko to tibon mgo otow ka mgo arikis dan woy pig-aap dan ki Aaron. 4 Pigpurut ni Aaron ka inbogoy ran kandin, woy pigtunow rin no nighimu sikandin to ogtuuhan dan no unawa to nati no baka, no indorodyow rin pad pinabadyo to tigib. No nigkagi sikandan to “Pitow kow no mgo otow to Israil, soini ka mgo tinuuhan now no nig-aap kaniu ligkat to Ehiptu.”
5 To pogpitow ni Aaron to soini, nighimu sikandin to tubaranan dio to tangkaan to nati no baka woy nignangon sikandin to “Asoom no allow oghimu ki to pogkoonan duon to Magboboot.”
6 No sikan ian to pogkapawo, nigsoom nig-onow ka mgo otow, no nigtubad pinabadyo to pogtutung to mgo adyam, woy nigbogoy to mgo igtubad to pogkasagboka. Takas to sikan nigpinnuu sikandan to pogkoon woy to pog-inom, woy nig-onow odyow to poghilhilabotoy.
7 No nigkagi ka Magboboot ki Mosis to “Agpas ka oglogsad, su nigsuwoy on pohondio to karootan ka koot-otawan nu no pig-aap nu ligkat to Ehiptu. 8 Magaan sikandan nigsuwoy to mgo sugu ku kandan, woy nighimu sikandan to ogtuuhan dan no unawa to nati no baka. Nig-unduk sikandan to tangkaan to sikan woy pigtubaran dan woy nignangon sikandan to ‘Pitow kow no mgo otow to Israil, soini ka mgo tinuuhan now no nig-aap kaniu ligkat to Ehiptu.’
9 No nigkagi pad ka Magboboot to “Nakita ku ka soini no koot-otawan no makogal ka uu ran. 10 Baagara a nu kuntoon su moinit ka goinawa ku kandan woy odyow no og-awoon ku sikandan, woy oghimuon ku sikoikow no sagboka no mabogbog no koot-otawan.”
11 Di nigpakoid-u si Mosis to Magboboot no Igbudyag din no nigkagi sikandin to “Magboboot, manio to ogmoinit ka goinawa nu to koot-otawan nu no pig-aap nu ligkat to Ehiptu pinabadyo to mabogbog no boad nu? 12 Manio to ognangon ka mgo otow to Ehiptu to ‘Maroot naan ka goinawa rin kandan no pig-aap din sikandan to kabubunganan odyow to pog-awo kandan ligkat to ampow to tano.’ Iniugi nu ka kabou nu, woy dokag paragasa ka poglogpad to soini no koot-otawan nu. 13 Doromdoma nu ka mgo suguanon nu no si Abraham, si Isaak woy si Israil no pigpangulibotan nu pinabadyo to ngaran nu no nigkagi ka kandan to ‘Oghimuon ku ka mgo kapunganan nu no unawa to koon-ingan to mgo bituon to langit woy ogbogadyan ku sikandan to tano no inpangulibot ku kandan, woy sikandan ka ogtagtuun to sikan taman to katamanan.’”
14 No sikan ian waro nigparagas ka Magboboot to poglogpad to koot-otawan din iing to pigbabantaan din. 15 Nigliku si Mosis woy nigtupang sikandin to bubungan no pigkomkom din ka daruwa no batu to Kasabutan. Pigsulatan ka sikan no mgo batu to tangkaan woy to koiniugan. 16 Ka Magboboot ian ka nighimu to sikan no mgo batu, woy sikandin ka nigpatik dio to batu pinabadyo to pogpanlugit. 17 To pogdinog ni Josue to daging to pogbabansagonoy to mgo otow, pigkagian din si Mosis to “Duon daging to inat nigmamang-mangadyawoy to pig-ugpaan to mgo otow.”
18 Nigtabak si Mosis to “Konon daging to nakadoog sikan, woy konon daging to naroog; daging to nanotod-om sikan no ogkarinog ku.” 19 To pogdani ni Mosis to pig-ugpaan to mgo otow, woy to pogkakita rin to nati no baka woy to pogsadyow to mgo otow, nabou lagboy sikandin, woy indogsang din ka daruwa no batu woy nagopang sikan dio to linogsaran to bubungan. 20 Pigpurut ni Mosis ka nati no baka no pighimu ran woy pigtutung din to hapuy; piggaling din ka bulawan woy insawod din dio to laplap to woig, woy pigpogos din ka mgo otow to Israil to pog-inom to woig. 21 Nig-inso si Mosis ki Aaron to “Nokoy ka pighimu to soini no mgo otow koykow odyow no pigtuon nu sikandan to soini no dakol no sao?”
22 Nigtabak si Aaron to “Dokag kabou, igbudyag ku. Noko-ila ka to soini no koot-otawan woy ko monu kagaan sikandan ogdoog to karootan. 23 Nignangon sikandan koddi to ‘Himui koy nu to mgo tinuuhan no oghun-a kanta. Hoo su waro ki mataga ko nokoy ka nabadyaan ni Mosis no nig-aap kanta ligkat to Ehiptu.’ 24 No pignangonan ku sikandan to ‘Ko hontow kaniu ka duon alahas no bulawan, lokaa now.’ Inbogoy ran koddi ka bulawan dan, woy indogpak ku to hapuy, woy soini no nati no baka ian ka niglibuwas!”
25 Nakita ni Mosis no waro nakaponod si Aaron to mgo otow, woy no nigpa-angol-angol sikandan woy no ogbunsud ka mgo usig dan to pogngisi kandan. 26 No nigsasindog sikandin to daan no ogsood to pig-ugpaan dan woy nig-umow sikandin to “Dani kow koddi ko mgo otow kow to Magboboot.” No nigdani ka tibon mgo kapunganan ni Livi kandin. 27 No pigkagian din sikandan to “Soini ka kinagian to Magboboot no Igbudyag to Israil kagi ‘Kara otow ogsinikot to kampilan din. Oghip-hipanow kow to tibon pig-ugpaan to mgo otow ligkat to binunsuran pohondio to koopusan woy panghimatadyi now ka mgo suod now, mgo aukuy now woy mgo songobaoy now.’”
28 Pighimu to mgo kapunganan ni Livi ka insugu ni Mosis, woy mgo tatou no libu no otow ka pigpanghimatadyan dan to sikan no allow. 29 No nigkagi si Mosis to “Kuntoon pig-oog kow to tarabau to Magboboot, su nig-atu kow to mgo anak now woy mgo suod now, woy pigboligan kow to Magboboot kuntoon no allow.”
30 To pogkapawo, nignangon si Mosis to koot-otawan, “Dakol ka sao no now. Di kuntoon ogtakorog a pohondio to Magboboot; naugpa ko ogkohimu ku no ogpokog-uli dod ka mgo sao now.”
31 No niglibong si Mosis duon to Magboboot woy kagi rin “Pagpagamadyan naan ka sao no pighimu to soini no mgo otow! Nighimu sikandan to mgo tinuuhan no bulawan. 32 Di kuntoon, ogpoigu-on nu poron ka sao dan, di ko kono ka, songo awaa nu ka ngaran ku ligkat to libru nu.”
33 Nigtabak ka Magboboot ki Mosis to “Ka otow no nakasao do ian ka og-awoon ku to libru ku. 34 No hondio ka, aapa nu ka koot-otawan pohondio to ugpaan no innangon ku woy oghun-a ka diwata ku kaniu. Di, ko oglopow ka litos no allow to poglogpad, oglogparan ku sikandan tongod to sao dan.”
35 Woy pigpa-aapan to Magboboot ka koot-otawan to mokohinhinaat no dau tongod to pighimu ran tongod to nati no inhimu ni Aaron.