31
Si Bisalil woy si Oholiab
1 No nigkagi ka Magboboot ki Mosis to, 2 “Pitow ka, pig-aam ku si Bisalil no anak ni Uri, no anak ni Hur no kapunganan ni Juda. 3 Pighiponu ku sikandin to Gimukud to Magboboot woy to katagaanan woy to katouan to loin-loin no mgo oghimuon 4 odyow no ogkatou sikandin to pogpo-ilin-ilin to poghimu pinabadyo to bulawan, to plata woy to brunsi. 5 Songo ogkatou sikandin to pogtarabau to mgo mahalon no batu, woy to poggamit to kadyu woy to tibo no mgo loinloin no tarabau to poghimu. 6 Nokoy pad, no songo pig-aam ku si Oholiab no anak ni Ahisamak no kapunganan ni Dan odyow to pogbulig ki Bisalil. Songo pigbogadyan ku to katagaanan ka mgo taaghimu odyow no ogpokohimu sikandan to tibo no insugu ku koikow; 7 ian ka tukbung to pogtomu, ka sooranan no sabukanan to kasabutan duma to soob to sikan no tuus to pogpokog-uli, woy ka tibon duma no mgo kaaglagan to tukbung. 8 Ogpakahimu pad sikandan to lamisa woy mgo kaaglagan to sikan, to bulawan no unturanan to ilaw woy to mgo kaaglagan to sikan, woy to tutunganan to palina. 9 Ogkatou sikandan to poghimu to tubaranan to mgo ogtutungon no tubad duma to mgo kaaglagan to sikan, woy to lipung duma to unturanan to sikan 10 woy to mgo manggad no mgo sabinit, iglagkos ka mgo in-oog no mgo kinabo ni Aaron no taagpanubad, woy mgo kinabo to mgo anak din no ogsau-ubon dan to pogtarabau to pogtubad. 11 Songo ogkatou sikandan to poghimu to lana no igbus-ug, woy palina no moomut no ogtutungon to In-oog no Longod. Oghimuon dan ka tibo sumao to innangon ku koikow.”
Ka Allow to Poghimooy
12 No nigkagi pad ka Magboboot ki Mosis to, 13 “Nangoni nu ka mgo otow to Israil to, ‘Babalia now ka mgo Allow to Poghimooy. Ogkohimu sikan no tuus kaniu woy koddi taman to tipouri now, odyow no ogkataga kow no sikoddi ian ka Magboboot no nig-oog kaniu. 14 Babalia now ka allow to poghimooy su in-oog ku kaniu. Agad hontow no kono ogbabali to sikan, oghimatadyan now sikandin; ian ko hontow ka ogtarabau to sikan no allow, konad ogpaka-agpot to koot-otawan din. 15 Ogtarabau kow sood to hon-om no allow, di ka igkapitu no allow ian ka allow to poghimooy no in-oog to Magboboot. Agad hontow no ogtarabau to sikan no allow oghimatadyan ian. 16 Ogbabalion to mgo otow to Israil ka allow to poghimooy, unawa to kasabutan no ogtumanon to tibon mgo tipouri taman to katamanan. 17 Ogkohimu no tuus sikan taliwaro koddi woy to mgo otow to Israil taman to katamanan, su pighimu to Magboboot ka langit woy ka tano sood to hon-om no allow, woy to igkapitu no allow nighagtong sikandin to pogtarabau woy nighimooy sikandin.’”
18 Takas to nigkagi ka Magboboot ki Mosis dio to bubungan to Sinai, inbogoy rin ki Mosis ka daruwa no batu to Kasabutan; mgo batu sikan no pigsulatan to tinuru to Magboboot.