26
To tibon kapitulu 26 to Exodu, nigkagi ka Magboboot moitongod to tukbung no oghimuon dan no duon daruwa no sinabong. Ka sagboka no sinabong pighingaranan no In-oog no longod, woy ka mgo taagpanubad do ka ogpakasood to sikan. Ka dangob no sinabong pighingaranan no In-oog Lagboy no longod, woy ka igbudyag to mgo taagpanubad do ka ogpakasood dio, woy duon isabuk dan ka sooranan no sabukanan to Kasabutan.
To Exodu 27:1-8 nigparagas ka Magboboot to pognangon moitongod to tubaranan no oghimuon dan no ian ka tutunganan dan to mgo adyam no igpanubad dan duon to Magboboot. Takas to sikan, to Exodu 27:9-19 nignangon ka Magboboot tongod to aad no oghimuon dan no igpalibut to tukbung woy to tubaranan (no dio to libuwasan to tukbung). Woy to katapusan to kapitulu 27 nignangon ka Magboboot moitongod to lana no igparokot to mgo ilawan.
Takas to sikan no mgo oghimuon dan, to Exodu 28 nignangon ka Magboboot tongod to mgo taagpanubad woy ko nokoy ka ogsau-ubon dan. Duon ka pighingaranan no Ipod no ig-atang to sosoobon to taagpanubad, woy og-akoban sikan to dangob no manggad to longod to sosoobon no duon sampuu woy daruwa no loin-loin no mgo mahalon no batu no igpadoromdom to sampuu woy daruwa no lunggunan to mgo otow to Israil. Songo duon sabinit no moilom woy duon kuubow no igsau-ub ni Aaron woy to duma no mgo taagpanubad.
Dio to kapitulu 29 nignangon ka Magboboot ko monuon dan to pogpanubad odyow to pog-oog to mgo taagpanubad to tarabau ran duon to Magboboot. Ogbus-ugan dan to lana ka uu to taagpanubad. Duon baka no igtubad dan no ogsampoong ka mgo taagpanubad to mgo boad dan dio to uu to baka no ogpasabut no igbogoy ran ka sao dan duon to baka. No og-iawon dan ka baka, woy ka langosa rin igpoid dio to tubaranan. Ogtutungon dan ka atoy woy pamislion dio to tubaranan, di ka lawa ogtutungon dio to libuwasan to pig-ugpaan dan. Songo duon kambing no og-iawon dan no ogtutungon dio to tubaranan no moomut no tubad dio to Magboboot. Duon pad igkarangob no kambing no og-iawon dan no igpoid dan ka langosa duon to mgo lawa woy mgo kinabo to mgo taagpanubad.
Songo nigkagi ka Magboboot moitongod to allow-allow no pogtubad to koot-otawan to Israil. Kara allow ogtubad sikandan to sagboka no nati no karniru to masoom woy sagboka no nati no karniru to maapun duma to pan woy to inomon.
To Exodu 30:1-10 nignangon ka Magboboot tongod to tubaranan to palina. Kara masoom woy kara maapun ogtutung ka igbudyag to mgo taagpanubad to palina duon. Si Aaron ian ka an-anadyan no igbudyag to mgo taagpanubad.
To Exodu 30:11-16 nignangon no duon allow no ogsool sikandan to mgo otow, woy to sikan no allow, kara lukos no nakaligad on to 20 no tuid ka kabudyagi rin, ogbogoy sikandin to saapi no tubad odyow no kono oghimatadyan to Magboboot tongod to sao din.
To Exodu 30:17-21 nigkagi no songo oghimu sikandan to lipung no brunsi no luu-anan dan to mgo boad woy paa to mgo taagpanubad ko ogdani sikandan to Magboboot.
To Exodu 30:22-33 nignangon pad ka Magboboot ko nokoy ka iglamisok dan to lana no igbus-ug to pogpo-oog to mgo taagpanubad woy no igbus-ug dan to tibon mgo kaaglagan no i-oog to tarabau to Magboboot.
To katapusan, to Exodu 30:34-38 nignangon ka Magboboot ko nokoy ka iglamisok dan to poghimu to palina no igtutung dan to tangkaan to Magboboot.