40
Pogpos-ok to Tukbung
1 No nigkagi ka Magboboot ki Mosis to 2 “Ipos-ok nu ka Tukbung to Pogtangko to an-anadyan no allow to an-anadyan no buwan to tuid. 3 Itagu nu ka sooranan to Kasabutan dio woy ooti nu to manggad. 4 Isood nu ka lamisa woy ipang-untud nu ka mgo kaaglagan din. Aapa nu pad ka sabukanan to ilawan dio to sood, woy ipansabuk nu ka mgo ilawan din. 5 Isabuk nu ka bulawan no tubaranan to palina dio to tangkaan to sabukanan to Kasabutan woy isampoy nu ka manggad dio to gomawan to tukbung. 6 Isabuk nu ka tubaranan no tutunganan to mgo igta-taruwoy dio to tangkaan to gomawan to Tukbung to Pogtangko; 7 woy isabuk nu pad ka luu-anan no lipung taliwaro to Tukbung to Pogtangko woy to tubaranan woy bus-ugi nu to woig. 8 Ipos-ok nu ka aad no oglibut to lama woy isampoy nu ka manggad no ig-oot to gomawan to lama. 9 Purut ka to lana no ig-oog woy bus-ugi nu ka tukbung woy ka tibo to sood to sikan; ian no i-oog nu sikan woy ka mgo kaaglagan din, woy ogkohimu no in-oog lagboy sikan. 10 Songo bus-ugi nu to lana ka tubaranan to tutungon no igta-taruwoy woy ka tibon mgo kaaglagan din; ian no i-oog nu ka tubaranan woy ogkohimu no in-oog lagboy sikan. 11 Bus-ugi nu ka luu-anan woy ka sabukanan to sikan no ig-oog nu.
12 Aapa nu si Aaron woy ka mgo anak din no lukos dio to gomawan to Tukbung to Pogtangko woy luu-i nu to woig. 13 Sau-ubi nu si Aaron to mgo in-oog no mgo kinabo, woy bus-ugi nu sikandin to lana no i-oog nu sikandin odyow no ogkohimu sikandin no taagpanubad ku. 14 Aapa nu ka mgo anak din no lukos woy pakinaboi nu sikandan to mgo dorodyawi no kinabo. 15 Songo bus-ugi nu sikandan to lana unawa to pogbus-ug nu to amoy ran odyow no ogkohimu sikandan no mgo taagpanubad ku. Ko ogkabus-ugan sikandan to lana ogbunsud ka pogkataagpanubad dan no ogparagas taman to mgo tipouri ran.”
16 Pighimu ni Mosis ka tibo unawa to insugu to Magboboot kandin. 17 No sikan ian no inpos-ok on ka tukbung to an-anadyan no allow to an-anadyan no buwan to igkarangob no tuid takas to poglibuwas dan to Ehiptu. 18 To pogpos-ok ni Mosis to tukbung, pig-ay-adyaran din ka mgo pos-okanan to mgo suwoy woy intagu din ka mgo suwoy dio to mgo lungag to sikan woy insabuk din ka mgo tukias duon. 19 Insampoy rin ka manggad to tukbung ampow to mgo tukias woy pigtol-oban din pad to tol-ob unawa to innangon to Magboboot. 20 Pigpurut ni Mosis ka Kasabutan woy intagu din to sooranan, nigluglug sikandin to mgo kadyu no igloungan to sooranan woy pigsooban din to igsoob to pogpokog-uli. 21 Insood din to tukbung ka sooranan woy insanggat din ka ig-oot no manggad no in-oot din ka sooranan to Kasabutan sumao to innangon to Magboboot. 22 Insabuk ni Mosis ka lamisa dio to sood to Tukbung to Pogtangko to kawanan ko ogpitow ki ligkat to gomawan dio to libuwasan to in-oot no longod 23 woy pigsabukan din sikan to pan to tangkaan to Magboboot sumao to innangon to Magboboot kandin. 24 Insabuk din ka sabukanan to ilawan to sood to Tukbung to Pogtangko to tangkaan to lamisa dio to gibang to tukbung 25 woy insabuk din ka mgo ilawan to tangkaan to Magboboot sumao to innangon to Magboboot kandin. 26 Insabuk ni Mosis ka bulawan no tubaranan dio to sood to Tukbung to Pogtangko to tangkaan to manggad no ig-oot 27 woy nigtutung sikandin to moomut no palina dio sumao to innangon to Magboboot kandin. 28 No insanggat din ka manggad no ig-oot dio to gomawan to tukbung. 29 Insabuk din ka tubaranan no tutunganan to mgo igta-taruwoy marani to gomawan to Tukbung to Pogtangko, woy intaruwoy rin to Magboboot ka mgo adyam woy mgo bogas no ogtutungon dio sumao to insugu to Magboboot. 30 Insabuk din ka lipung to taliwaro to Tukbung to Pogtangko woy to tubaranan woy pigbus-ugan din to woig no igluu, 31 woy piggamit sikan ni Mosis woy ni Aaron woy mgo anak din no lukos no igluu to boad woy mgo paa ran. 32 Nigluu sikandan kara ogsood sikandan to Tukbung to Pogtangko woy ko ogdani sikandan to tubaranan, sumao to insugu to Magboboot ki Mosis. 33 Nigpos-ok si Mosis to aad no niglibut to tukbung woy to tubaranan, woy insanggat din ka manggad to gomawan to lama. No sikan ian no naponga ni Mosis ka tarabau.
Ka Kabantug to Magboboot
34 No niglogsad ka suwoy no gapun dio to Tukbung to Pogtangko, woy naponu ka tukbung to kabogbogan to Magboboot. 35 Waro nakasood si Mosis to Tukbung to Pogtangko to sikan su nakalogsad ka gapun woy naponu ka tukbung to kabogbogan to Magboboot.
36 To tibon mgo poghip-hipanow to mgo otow to Israil, nighipanow sikandan ko nigkawoy ka gapun ligkat to ampow to tukbung; 37 di ko waro mogkawoy ka gapun, waro sikandan moghipanow taman to allow no nigkawoy ka gapun. 38 No sikan ian no duon gapun to Magboboot ampow to tukbung ko allow, woy duon hapuy to gapun to maukilom no ogkakitaan to tibon koot-otawan to Israil to tibon poghip-hipanow ran.