29
1 Ko ogpalinggaat no makogal ka uu to otow agad ko pigsaparan sikandin to kapila, inogo on no ogkagugus ka pog-ugpo din no konad ogkoulian.
2 Ogkukuus ka mgo otow ko matubung ka pog-ugpo to mgo matuarong, di og-auhoy ka mgo otow ko ogkohimu no mgo igbudyag ka mgo dorooti no otow.
3 Ogkarago ka amoy to otow no duon dakol no goinawa to kougsoban, di ogdaraaton ka saapi din to otow no ogdumaruma to mgo agkadyon no boi.
4 Ogmadigon ka nasud ko mahusoy ka pog-aap to hari, di ogkaguak ka nasud ko hagamhagamon ka hari to mgo saapi no ogpakapasuwoy to husoy.
5 Iing to ogtoon to lit-ag to mgo paa rin ka otow no og-uug-uug to songobaoy rin.
6 Ogkalit-agan ka otow no maroot pinabadyo to kandin do no mgo sao, di ogpaka-uuranda woy ogkukuus ka otow no matuarong.
7 Duon goinawa to mgo matuarong no otow no ogkabogadyan ka mgo nawaraan to litos no husoy, di inbaagad do sikan to mgo dorooti no otow.
8 Ian binunsuran to kasamuk to lunsud ka mgo taagsuy-at, di ogpohibow to moinit no goinawa ka mgo mougsob no otow.
9 Ko ogtangko ka mougsob no otow to angol-angol no otow duon to husadyanan, ogbabansagon woy ogsuy-at ka angol-angol no otow woy ogpalinggaat ka kasamuk.
10 Ogdomotan to mgo taagmangadyow ka otow no waro igkasawoy, di ogkapangabangan sikandin to mgo matuarong.
11 Ogpouwangon to angol-angol no otow ka tibo no ingkaangoti rin, di ogponoron to mougsob no otow ka dilo din.
12 Ogkohimu no maroot ka tibon mgo duon katondanan ko ogpamminog ka igbudyag dan to mgo ubat.
13 Nig-uunawa ro ka nawaraan no otow woy ka otow no nigloig-loig to duma rin su nigpuun to Magboboot ka kaadyag to mgo mata ran.
14 Ko litos ka poghusoy to sagboka no hari to mgo otow no nawaraan, ogpalinggaat no madigon ka pogboboot din no waro katamanan.
15 Ogmougsob ka bato ko ogbarasan sikandin ko ogpakasao, di ko ogbaagaron ka bato to poghimu to noiniatan din, ogkasiporan ka inoy rin.
16 Ogdakol ka sao ko ogtulin ka mgo dorooti no otow, di ogpakakita ka mgo matuarong to pogkapood dan.
17 Ko ogsaparan nu ka anak nu, ogkabogadyan ka rin to ka-awangan; igkarago ian ka igbogoy rin to goinawa nu.
18 Waro kohusoy to koot-otowan ko waro inpapitow dio to kohuna-an, di ogkaboligan ka otow no ogtood to kasuguan.
19 Kono ogkasaparan ka suguanon pinabadyo do to pogkagi; agad ko ogkasabutan din, kono din ogpamminogon.
20 Dakol-dakol ka ogko-im-imanan to angol-angol no otow woy to otow no ogkagi no waro din panadya doromdoma.
21 Ko ogpaag-agaran nu ka tibo no ogkoiniatan to suguanon nu puun to baubato pad sikandin, to kaugadyan ogbaybadyaran ka rin.
22 Ian binunsuran to kasamuk ka otow no ungud ogkabou, woy moon-ing ka mgo sao to otow no magaan ogmoinit so goinawa rin.
23 Ogkadoisok ka otow no ogparakol-dakol, di ogkabantug ka otow no ogpasaad-saad.
24 Og-usigon din ka kandin do no pog-ugpo ka otow no ogbulig to takawon; agad ko ogpapanguliboton sikandin to pogkagi to litos, kono ogpakalangub sikandin to pognangon.
25 Ogkalit-ag ka otow no ogkahallok do to mgo otow, di ogkakaasagan ka otow no ogsalig duon to Magboboot.
26 Moon-ing ka ogpabulig to igbudyag, di ka Magboboot do ian ka ogpakabogoy to litos no husoy.
27 Ogdomotan to mgo matuarong ka mgo ogsuwoy-suwoy; songo og-usigon to mgo dorooti no otow ka mgo matul-id.