Jonas
1
Nigpanlaguy si Jonas
1 Nigdatong ka kinagian to Magboboot ki Jonas no anak ni Amitai no kagi: 2 “Hondio ka to dakol no lunsud to Ninibi woy nangoni nu ka mgo otow dio no oglogparan ku sikandan tongod to nakita ku no mgo sao dan.”
3 Di nasi atag nigpanlaguy no nigpamariu si Jonas to Magboboot, woy nigparoog sikandin to Tarsis. Nigtupang sikandin pohondio to Jopi woy duon naumaan din dio no barku no ogdoog to Tarsis. Takas no nigbadyad sikandin, nig-untud sikandin odyow to pogpamariu to Magboboot.
4 Tagood no dio sikandan to dagat, nigpa-aap ka Magboboot to dakol no kaamag. Maagbot lagboy ka nigdatong no daldaa-ot woy inat ogkaguak on ka barku. 5 Nanahallok ka tibon nigtarabau to barku woy kara sagboka kandan nig-umow to kandin no pigtuuhan. Woy intugdo dan ka mgo pig-aap dan diot dagat odyow no ogma-agkap ka barku.
Di si Jonas atag, nigloodlod diot diraom to barku, nighibat woy nalinoknok no nohirogo. 6Pighondiaan sikandin to igbudyag to barku no nignangon to, “Manio to oghidhirogo ka ro? Onow ka duon woy umowa nu ka koikow no pigtuuhan. Naugpa ogkohoid-uan ki rin odyow no kono ki ogkammatoy.”
7 No nigmanangnangonoy ka mgo nigtarabau to barku no kagi, “Ogtitimao ki odyow no ogkatagaan ta ko hontow ka pugtian to soi no ingkabaybadyari ta.” Sikan ian ka pighimu ran woy ian natimao si Jonas.
8 No nig-inso sikandan ki Jonas, “Nangoni koy nu, hontow ka pugtian to soini no ingkabaybadyari ta? Nokoy ka tarabau nu? Matig hondoi ka? Nokoy ka koot-otowan nu?”
9 Nigtabak sikandin to, “Hibriu a woy nigsadyo a to Magboboot, no Igbudyag to langit no nighimu to dagat woy to tano.”
10 Songo pignangonan sikandan ni Jonas no nigpanlaguy sikandin puun to Magboboot. Nanahallok lagboy sikandan to sikan woy nignangon to, “Otowoy! Nokoya sikan no pighimu nu?”
11 Nasi no nigmaagbot ka daldaa-ot to dagat. Sikan ian nig-inso sikandan ki Jonas to, “Ogmonuon noy sikoikow odyow no oghagtong soi daldaa-ot kanami?”
12 Nigtabak sikandin to, “Itugdo a now diot dagat odyow no oghagtong soi daldaa-ot su nataga a no sikoddi ka pugtian to poglopow kaniu to soi dakol no pogdaldaa-ot.”
13 Waro nigpannalinga ka mgo nigtarabau to barku ki Jonas, ko kono, nigpoomot sikandan to pogbogsoy to pogpalibong diot ilis to dagat. Di waro nohimu ran su nasi no nigmaagbot ka daldaa-ot.
14 Nigpannanoy sikandan to Magboboot no kagi, “Magboboot, kono koy nu porom oghimatadyi tongod to poghimatoy noy to soi otow. Kono koy nu ogsonditi to poghimatoy to otow no waro sao, hoo su pigbobootan nu man soini, Magboboot.” 15 No pighonat dan si Jonas woy intugdo dan diot dagat, woy nighagtong ka daldaa-ot. 16 To sikan, nanahallok lagboy ka mgo otow duon to Magboboot, woy nigpanubad sikandan to Magboboot woy nangulibot sikandan kandin.
17 Di, nigpa-aap ka Magboboot to dakol no isda no nig-aboong ki Jonas, woy dio si Jonas to gotok to isda sood to tatou no allow woy tatou no kausiloman.