31
Mgo Kinagian ni Hari Limuil
1 Mgo kinagian soini ni Hari Limuila– mgo igtuaro no in-anad to inoy rin: 2 “Anak ku, Anak to aanakan ku, Anak to ingpangulibot ku 3 doka'g daata ka dadyagang nu duon to mgo boi, woy ka kanokal nu duon to ogpakagugus to pogboboot to mgo hari.
4 Kono'n litos to mgo hari, Limuil, ko og-inom sikandan to binu, woy ko ogko-ibogan to mgo igbudyag ka ogpakalasing, 5 hoo su ko og-inom sikandan ogkalingawan dan ka innangon to kasuguan, woy kono ogkabogadyan ka mgo pigloig-loig to litos no husoy ran.
6 Ian nu bogadyi to ogpakalasing ka magaan ogkabigtawi, woy bogadyi nu to binu ka ogmasakit so goinawa. 7 Og-inom sikandan woy ogkalingawan dan ka pogkawaraan dan woy konad ogdoromdomon dan ka igmasakit to goinawa ran.
8 Kagi ka to pogkaasag to mgo otow no kono ogpakakaasag to kandan do no pog-ugpo, woy pangabangi nu ka tibo no waro ogkohimu. 9 Kagi ka woy litosa nu ka pogboboot; kaasagi nu to poghusoy ka mgo nawaraan woy mgo noirapan.”
Ka Marodyow no Asawa
10 Hontow ka ogpakapamangho to maungangon no igboi? Madmarodyow pad lagboy sikandin to mgo mahalon no mgo batu.b 11 Ogkasaligan lagboy sikandin to iglukos din, woy waro igkoilu-i to lukos. 12 Marodyow ka igbogoy to sikan no boi duon to lukos, kono'n karootan, to tibon mgo allow to ukul din. 13 Og-aam sikandin to dilanacwoy linudno ogpamakuton din to poghahabol. 14 Unawa sikandin to mgo barku no ogpanghakut to pogkoon puun to mariu. 15 Masoom pad to kono pad ogsilo ka allow og-onow sikandin; oghilutu sikandin to koonon to mgo anak din woy mgo taadeto mgo suguanon din no boi. 16 Og-aam sikandin to sagboka no kamot woy ogbolion din; ogpamua sikandin to pinamua-an to ubas pinabadyo to kandin do no saapi. 17 Ogpoomot sikandin to tibon tarabau rin, woy manokal ka mgo boad din to mgo oghulingonon din. 18 Ogbantadyan din no ogtulin ka pogduruad din, woy kono ogko-obukan ka ilawan din to maukilom. 19 Ogtitingkal sikandin pinabadyo to boad din, woy oghimuon din ka sinulid to mgo kudyamoy rin. 20 Og-ot-otawon din ka mgo nawaraan woy ogbuligan din ka mgo noilu-an. 21 To tinghagsil kono din ogkasasawan ka lunggunan din su duon pighimu rin taan no maddodyow no kinabo kandan tibo. 22 Duon marodyow no mgo uoson to hibatanan din; woy ogpakasau-ub sikandin to maddodyow no mgo manggad no pighimu rin. 23 Ogtahuron ka iglukos din duon to gomawan to lunsud ko ogpinnuu sikandin dio duma to mgo igbudyag to mgo ugpaan. 24 Oghimu ka maungangon no boi to mgo kinabo no linu woy ogduaron din pad, sikandin ka oghimu to mgo hoon no ogbaligyoon to mgo tindaahan. 25 Insau-ub din ka dadyagang woy ka kabantug; waro igkasasow rin ko ogdoromdomon din ka ogdatong no mgo allow. 26 Mougsob ka mgo kinagian din, woy litos ka mgo igtuaro no ignangon-nangon din. 27 Ogbantadyan din ka mgo tarabau to lunggunan din, woy kono ogpin-pinnuu ro sikandin. 28 Oghasindog ka mgo anak din no ogsadyo kandin; songo ogsadyoon sikandin to iglukos din no kagi: 29 “Moon-ing ka mgo boi no maungangon ka oghimuon dan, di labow ka to kandan tibo.” 30 Ogpakagawoy ka marodyow no pogpangagi-kagi, woy ogligad do ka marodyow no langlanguan, di ogkasadyo ka boi no duon kahallok duon to Magboboot. 31 Ogbogadyan porom sikandin to dassag din, woy ogkasadyo porom sikandin duon to gomawan to lunsud tongod to mgo hinimuan din.