2 Samuel
1
Nigpandaawit si David Tongod to Kamatadyon ni Saul
1 Takas to namatoy on si Saul, nig-uli si David ligkat to nakadoog sikandin to mgo kapunganan ni Amalik, woy nig-ugpo sikandin to Siklag to daruwa no allow. 2 To igkatou no allow, duon otow no niglopow puun to pig-ugpaan ni Saul. Noigbit-higbit ka mgo kinabo din, woy duon abu to uu rin, indanan no duon igmasakit to goinawa rin. To poglopow rin ki David, niglangkob sikandin duon to tano odyow to pog-ila ki David. 3 Nig-inso si David kandin to “Hondoi ka puun?” Woy nigtabak ka otow to “Nigpanlaguy a puun to pig-ugpaan to mgo sundau to Israil.” 4 Nigkagi si David to “Nangoni a nu, nokoy ka niglopow?” Nigtabak ka otow to “Nigpanlaguy ka mgo otow to Israil puun to mangadyowan. Moon-ing kandan ka nammatoy. Songo namatoy si Saul woy ka anak din no si Yunatan.” 5 No nig-inso si David to baubato no nig-aap to soini no nangnangonon kandin to “Manio to nataga ka no namatoy si Saul woy si Yunatan no anak din?” 6 Nigtabak ka baubato to “Niglopow no dio a to bubungan to Gilboa, woy duon si Saul no nigsandig duon to intukdang no kommag din, no magaan ogkasaponan sikandin to mgo sundau no nig-untud to mgo unturanan dan. 7 Niglingi si Saul, woy nakita a rin woy pig-umow a rin. Nigtabak a to ‘Nokoy ka igkabulig ku koikow?’ 8 Nig-inso si Saul kanak to ‘Hontow ka?’ woy nigtabak a no ‘Kapunganan a ni Amalik.’ 9 No pignangonan a rin to ‘Dii kad woy himatadyi a nu! Hoo su ogkabigtawan ad on, di waro a pad mabigtawi.’ 10 No sikan ian no nigdani a kandin woy pighimatadyan ku sikandin, su nataga a no magaan on sikandin ogkapood woy konad ogkoudyag sikandin. Pigpurut ku ka tangkuu to uu rin, woy ka bakoow to bakaawan din, woy pig-aap ku kai to igbudyag ku.”
11 To pogkarinog dan to sikan, pigpanhigbit ni David woy to mgo otow rin ka mgo kinabo dan. 12 Nigpandaawit woy nigdorokul sikandan woy waro sikandan nigkoon taman to katangkob tongod ki Saul woy to anak din no si Yunatan woy tongod to mgo sundau to Magboboot woy to tibon koot-otawan to Israil, tongod su pigpanghimatadyan sikandan pinabadyo to pogmangadyow. 13 Nig-inso si David duon to baubato no naka-aap to nangnangonon kandin to “Matig hondoi ka?” Nigtabak sikandin to “Anak a to sagboka no dagpu no kapunganan a ni Amalik.” 14 Nig-inso pad si David to “Manio to waro ka nahallok to poghimatoy to otow no pig-oog to Magboboot?” 15 No nig-umow si David duon to sagboka no otow rin to “Agpas ka, himatadyi nu sikandin!” Woy pigtigbas din, woy namatoy ka baubato. 16 Hoo su nignangon si David duon to baubato to “Koikow ro ka ogkasonditan to kamatadyon nu, su nig-abin ka no ‘Koddi ka nighimatoy to otow no pig-oog to Magboboot.’”
17 No nigtod-om si David to soini no tod-om tongod ki Saul woy to anak din no si Yunatan. 18 Woy nigsugu si David no ig-anad to mgo otow to Juda ka soini no tod-om to mgo maligamon no nasulat duon to libru ni Yasar.a
19 Israil, nanakaoy-ang no nammatoy ka ingkabantug nu duon to mgo bubungan nu.
Manio to nanapood ka mgo mabantug?
20 Dokow inangon-nangon sikan duon to Gat,
Dokow ipoitaga sikan duon to mgo daan to Askilon,
Odyow no kono ogkarago ka mgo daaga to mgo Filistihanon,
Odyow no kono ogkukuus ka mgo anak no boi to mgo otow no waro matuli.
21 Warad on porom uran woy domhug duon to mgo bubungan to Gilboa,
Woy warad mgo abut no igkotubad no ogpuun to mgo kamot duon.
Hoo su dio naligsoman ka kaasag to mabantug,
ian ka kaasag ni Saul no konad ogkapoiran to lana.
22 Agad ko nalingutan sikandan to mgo nammatoy on, woy moon-ing ka mgo mabbuut no bagani ka nig-atu kandan, waro nig-ituos si Yunatan to pog-aap to busug din, woy waro nighagtong ka kampilan ni Saul taman to nabuung on.
23 To manokal pad sikandan, marodyow si Saul woy si Yunatan, woy narodyowan ka mgo otow kandan woy to kamatadyon dan, waro sikandan nokogluat.
Matmatallong pad sikandan to mgo banug, woy mab-mabuut sikandan to mgo lion.
24 Daugmatoy kow no mgo daaga to Israil tongod ki Saul no ian ka puunan to mgo maddodyow no mgo kinabo now no malaab, woy ian ka nigbogoy to bulawan no mgo igpohubung to mgo kinabo now.
25 Manio to nanapood ka mgo mabantug? Nakahoy-ang no namatoy si Yunatan duon to bubungan now.
26 Nigmasakit lagboy ka goinawa ku koikow, Yunatan, no suod ku. Dakol ka goinawa ku koikow.
Ogko-in-inuan ka dakol no goinawa nu kanak, no madmarodyow pad to goinawa to mgo boi.
27 Manio to nanapood ka mgo mabantug? Naagak on ka mgo panganiban to pogmangadyow!”