2 Samuel 2

Nohimu no Hari To Juda si David

¹ No, takas to sikan, nig-inso si David duon to Magboboot to “Oghalin a buwa duon to sagboka no lunsud to Juda?” Nigtabak ka Magboboot to “Hoo, hondio ka.” Nig-inso si David to “Hondoi a ogdoog?” woy nigtabak ka Magboboot to “Hondio ka to Hibron.” ² No sikan ian no nighalin si David duon to Hibron duma to daruwa rin no asawa no si Ahinoam no matig Yisriil, woy si Abigail no bau ni Nabal no matig Karmil. ³ Songo pig-aap ni David ka tibon mgo otow no duon duma kandin, duma to kandan no mgo lunggunan, woy nigman-ugpo sikandan to Hibron woy to marani no mgo ugpaan. ⁴ No nighondio ka tibon mgo otow to Juda to Hibron, woy pig-indanan dan si David no hari to tibon koot-otawan to Juda pinabadyo to pogbus-ug to lana kandin.

To nakarinog si David kandan no ka mgo otow no matig Yabis Gilaad ian ka nakalobong to lawa ni Saul, ⁵ nigpa-aap sikandin to mgo taagnangon duon to Yabis Gilaad no nignangon to “Ogkaboligan kow porom to Magboboot tongod to karodyowan no inpakita now ki Saul no igbudyag now pinabadyo to poglobong now to lawa rin. ⁶ Ogkoid-uan kow porom to Magboboot, woy ogkatood porom ka tibon mgo pangulibot din kaniu, woy songo ogkoid-uon ku sikaniu tongod su soini ka pighimu now. 7No kuntoon, palimbubuut kow, woy dokow ogkahallok su namatoy si Saul no igbudyag now, woy pig-indanan a to mgo otow to Juda no hari dan.”