5
Nohimu no Hari to Tibon Israil si David.
1 To kaugadyan, niglopow ka mgo otow to tibon mgo lunggunan to Israil duon to ki David to Hibron, woy nignangon sikandan to “Kanami, mgo langosa nu ro. 2 Nokani, to nighari pad si Saul kanami, sikoikow ka nig-aap to mgo sundau to Israil to pogmangadyow. Woy nignangon ka Magboboot koikow to ‘Sikoikow ka ogkohimu no taagbantoy to koot-otawan ku no Israil, woy sikoikow ka ogboboot kandan.’” 3 To poglopow to tibon mgo igbudyag to Israil duon ki Hari David to Hibron, nangulibot sikandin kandan duon to Hibron to tangkaan to Magboboot, woy pig-indanan dan si David no hari to tibon Israil pinabadyo to pogbus-ug to lana kandin. 4 Katouan ka panuigon ni David to pogbunsud din to pogkahari, woy nighari sikandin to kohop-atan no tuid. 5 Nighari sikandin to koot-otawan to Juda dio to Hibron sood to papitu no tuid woy hon-om no buwan, woy sumpul pad to sikan, nighari sikandin to tibon koot-otawan to Israil woy to Juda dio to Yirusalim sood to katouan woy tatou no tuid.
6 Nighipanow ka hari duma to mgo otow rin pohondio to Yirusalim odyow to poglusud to mgo kapunganan ni Yibus no nig-ugpo dio. Nignangon ka mgo kapunganan ni Yibus ki David to “Kono kow ogpakasood kai. Agad ko olin koy no mgo butud woy mgo pulid ogpaka-oot koy kaniu.” Hoo su naan dan no ‘Kono ogpakasood si David kai.’ 7 Di, naroog ni David ka lunsud to Siona no pighingaranan on no Lunsud ni David. 8 Nignangon si David to sikan no allow to ‘Oglusuran ta ka mgo kapunganan ni Yibus pinabadyo to tu-auganan to woig dan. Mgo usig ku ka sikan no mgo ‘butud woy pulid’. Woy ligkat to sikan nignangon ka mgo otow to ‘Kono ogpakasood ka mgo butud woy pulid to baoyb.’ 9 Nighalin si David to pog-ugpo duon to sikan no madigon no lunsud, woy pighingaranan din no Lunsud ni David. Pigdorodyow rin ka lunsud puun to pigbangbangan no tanoc no niglibut pohondio to nakasood no lunsud. 10 Ungud nigtulin ka pogkamabogbog ni David su pigdumaan sikandin to Magboboot no Mabogbog to tibo.
11 No kuntoon, nigpa-aap si Hiram no Hari to Tir to mgo taagnangon ki David, woy songo nigpa-aap sikandin to mgo kadyu no sidru woy mgo panday woy mgo taagbasbas to batu, woy nighimu sikandan to dakol no baoy ki David. 12 Woy sikan ian no nataga si David no insabuk sikandin to Magboboot no hari no nigboot to Israil, woy no indakol to Magboboot ka pandatuan din tongod to dakol no goinawa rin to koot-otawan din no Israil.