6
Pig-aap ni David ka Sooranan to Magboboot pohondio to Yirusalim
1 Inpalimud man do ni David ka mgo pig-aam no mgo otow to Israil, mgo katouan no libu tibo sikandan. 2 Nighipanow sikandin woy ka mgo duma rin ligkat to Baala to Judaa odyow to pog-aap ligkat dio to Sooranan to Magboboot no tuus to Ngaran to Magboboot no Igbudyag to Tibo, no nigboboot duon to taliwaro to mgo diwata no duon to ampow to sooranan. 3 In-untud dan ka Sooranan to Magboboot duon to sagboka no iam pad no unturanan, woy pig-aap dan puun to baoy ni Abinadab no duon to bubungan. Nigduma ka mgo anak ni Abinadab no si Ussa woy si Ahiu no nig-aagad to iam no unturanan. 4 Insabuk ka Sooranan to Magboboot duon to unturanan, woy nighun-a si Ahiu to poghipanow. 5 Nigkukuus si David woy ka tibon koot-otawan to Israil to tibon dadyagang dan dio to tangkaan to Magboboot, no nig-uuranda sikandan, woy nigparaging sikandan to mgo paragingonon iing to mgo arpa, mgo kuglung, mgo tamburin, mgo saliow woy mgo magkakatik.
6 Di to poglopow ran to giokanan ni Nakon, nagon-gonan ni Ussa ka Sooranan to Magboboot su nasaligkat ka baka no nigganoy to unturanan. 7 Nabou lagboy ka Magboboot ki Ussa tongod to pighimu rin no waro rin tahura ka Sooranan to Magboboot, woy sikan ian no piglogparan sikandin to Magboboot woy duon sikandin namatoy topad to Sooranan to Magboboot. 8 No nabou si David su piglogparan si Ussa to Magboboot, woy taman kuntoon pighingaranan ka sikan no longod no Piris-Ussa no to kanta pad ‘Kabou ki Ussa’. 9 Nahallok si David to Magboboot to sikan no allow, woy nigkagi sikandin to “Kono buwa ogkohimu no ogmarani kanak ka Sooranan to Magboboot?” 10 Konad ogpaugutan ni David no og-aapon ka Sooranan to Magboboot duon to kandin to Lunsud ni David ko kono pig-aap din duon to baoy ni Obid-Idom no matig Gat. 11 Nigpalinggaat ka Sooranan to Magboboot to baoy ni Obid-Idom no matig Gat to tatou no buwan. Tagood to dio sikan, pigboligan to Magboboot si Obid-Idom woy ka tibon lunggunan din.
12 No kuntoon pignangonan si Hari David no ‘Pigboligan to Magboboot ka lunggunan ni Obid-Idom woy ka tibo no kandin tongod to Sooranan to Magboboot.” No sikan ian no nighondio si David woy pig-angoy rin ka Sooranan to Magboboot puun to baoy ni Obid-Idom pohondio to lunsud ni David duma to dakol no karago. 13 To nakahipanow ka mgo nigtiang to Sooranan to Magboboot to hon-om pad no takang, nigpanubad si David to sagboka no lukosan no baka woy sagboka no nati no baka no pinaambog. 14 Nigsadyow si David to tangkaan to Magboboot to tibon dadyagang din, no ipod no linu ro ka insau-ub din, 15 tagood to pig-aap din woy to tibon koot-otawan to Israil ka Sooranan to Magboboot duma to mgo pogkukuus woy pogparaging to mgo budyung. 16 To poglopow to Sooranan to Magboboot duon to Lunsud ni David, nigpapantow si Mikal no anak ni Saul duon to bintana. To pogkakita rin ki Hari David no niglanglangkotow woy nigsasadyow to tangkaan to Magboboot, pigsawoy rin sikandin duon to goinawa rin. 17 Pig-aap dan ka Sooranan to Magboboot woy insabuk dan duon to tukbung no inpos-ok ni David to sikan, woy nigpanubad si David to mgo tutungonon no tubad, woy mgo tubad to pogkasagboka duon to tangkaan to Magboboot. 18 Takas to nigtubad sikandin to mgo tutungonon no tubad woy mgo tubad to pogkasagboka, pigboligan din ka mgo otow pinabadyo to ngaran to Magboboot no Mabogbog to Tibo. 19 No nigpambogoy si David to mgo koonon to tibon mgo otow to Israil. Pigpambogadyan din ka kara lukos woy kara boi to sagboka no malison no pan, songo gupal to saapu, woy sagboka no pinutu no pig-amutan to pigdampil no ubas. Takas to sikan, nigman-uli ka mgo otow.
20 To pog-uli ni David odyow to pogbolig to lunggunan din, niglibuwas si Mikal no anak ni Saul odyow to pogtomu kandin. Nigkagi sikandin to “Karodyow ka tarabau nu kuntoon no allow no hari ka to Israil, no nanlu-ung ka to tangkaan to mgo boi no uripon to mgo suguanon nu unawa to oghimuon to otow no waro aporu!” 21 Nigtabak si David ki Mikal to “Pighimu ku ka tibo duon to tangkaan to Magboboot. Pig-aam a to Magboboot no hari to koot-otawan din no Israil, liwan to amoy nu woy konon agad hontow to lunggunan to amoy nu ka pig-aam din. Ogkukuus a to tangkaan to Magboboot. 22 Labow pad ka oghimuon ku no makasisipod porom, woy ogkasipod a to pogdoromdom ku. Di to pogpitow to sikan no mgo uripon no boi no innangon nu, ogkasadyo a lagboy.” 23 Woy waro nig-anak si Mikal no anak ni Saul taman to pogkamatoy rin.