Panuaro
1
Tuud to mgo Pogpanuaro
1 Soini ka mgo pogpanuaro ni Solomon no anak ni David no hari to Israil. 2 Soini no mgo panuaro ogpakatimul to kougsoban woy ogpakasapad, woy ogpakabulig to pogsabut to mgo maraom no mgo kinagian. 3 Ogpakabulig pad soini to pog-ugpo to litos woy matul-id no daan, woy to poghimu to litos, to matuarong woy to mahusoy. 4 Ogbogoy soini to marodyow no pogdoromdom duon to otow no waro gindawanan, woy ogbogoy to katagaanan woy marodyow no pog-aam duon to mgo baubato pad. 5 Ogpamminog porom ka mgo mougsob no mgo otow odyow to pogtimul to na-anaran dan, woy ogkatuonan to litos ka otow no duon marodyow no pogdoromdom. 6 Songo ogpakabulig soini no mgo kinagian to pogsabut to mgo panuaro, mgo panungilingan, mgo ignangon woy mgo atukon to mgo mougsob no mgo otow.
7 Ka pogkahallok duon to Magboboot ian ka binunsuran to katagaanan, di ogsawadyon to mgo angol-angol ka kougsoban woy ka pogsapad.
Baghot to Poggon-gon to Kougsoban
8 Anak, pamminog ka to pog-anad to amoy nu, woy doka ogkalingawi to innangon to inoy nu. 9 Sikan no mgo kinagian ogko-unawa to marodyow no tangkuu duon to uu nu, woy to baliog no ogpohubung to liog nu.
10 Anak ku, ko og-adyaton ka to mgo otow no ogsasao, doka ogpatugu kandan. 11 Ko ognangon sikandan to “Dii kad; ogpanggopas ki to sagboka no otow odyow no ogpamali-palian ta, ogbokasan ta ka otow no waro gindawanan. 12 Og-aboongon ta sikandin, unawa to lobonganan no og-aboong to tibon lawa to otow no ogsood. 13 Ogpakapurut ki to loinloin no mgo mahalon no kaaglagan, woy ogkaponu ka mgo baoy ta to mgo in-agow ta. 14 Duma ka kanami woy ogsagbokoon ta ro ka sooranan to saapi ta.” 15 Anak ku, doka ogduma kandan. Doka og-unug to mgo ogbadyaan dan, 16 hoo su ogtallong-tallong sikandan odyow to poghimu to karootan, woy og-agpas-agpas sikandan odyow to pogpalangosa. 17 Nokoy naan ka puus to pogpanoon to mgo lit-ag tagood no ogpipitow ka mgo manuk-manuk? 18 Niggogopas do soini no mgo otow odyow ro naan to pogpatuligis to kandan do no langosa. Kandan do no lawa ka ogkatinagpaan dan! 19 Sikan ka oglopow to otow to ogpanaapi to kono’n litos no daan. Og-agow sikan to ukul to otow no ogpaka-utol to sikan no saapi.
20 Nig-umow si Kougsoban duon to pagindaanan, ogmaagbot sikandin to pogkagi duon to mgo limuranan to mgo otow, 21 nig-umow sikandin dio to koopusan to mgo pagindaanan no moon-ing otow, woy nignangon-nangon sikandin dio to mgo gomawan to lunsud. 22 Nig-inso si Kougsoban to “Monu kaugoy no ogkoiniatan now no mgo manguod ka mgo kono’n matosan no mgo katagaanan now? Monu kaugoy no igkarago to mgo taagsuy-at ka pogtambabo dan, woy ogdomot ka mgo angol-angol to katagaanan? 23 Ko nigpannalinga kow to pogsapad ku porom, ogbaaran ku sikaniu to goinawa ku, woy ipoitaga ku kaniu ka ogdoromdomon ku. 24 Di tongod su pigsawoy a now to pog-umow ku, woy su waro otow nigsagman to pogtaruwoy ku to boad ku kaniu, 25 woy su waro kow nigpannalinga to mgo tugun-tugun ku, woy waro kow nigtinawo to pogsapad ku, 26 songo ogngisian ku ro sikaniu ko ogkabaybadyaran kow; ogtambaboon ku sikaniu ko ogkalopowan kow to makahahallokoy. 27 Oglopow ka makahahallokoy kaniu unawa to poglopow to daldaa-ot, woy ogdatong sikan unawa to alimpuus woy kono kow ogpakagoon to koirapan woy to igkasasow now. 28 No og-umawon a now, di kono a ogtabak. Ogpamanghoan a now di kono kow ogpakakita kanak. 29 Pigdomotan now ka katagaanan woy waro kow nig-aam to pogkahallok duon to Magboboot, 30 waro kow nigtinawo to pogtugun-tugun ku, woy pigsamilian now ka pogsapad ku, 31 woy tongod to sikan ogkoonon now ka in-orok now, woy ogkahaantoy kow to bogas to mgo pigbabantaan now. 32 Ogkammatoy ka mgo otow no manguod to katagaanan duon to kandan no pogsuwoy-suwoy, woy ogkagugus ka mgo angol tongod to pogdakol so atoy ran, 33 di ko hontow ka ogpamminog koddi no si Kougsoban, ogpaka-ugpo sikandin to waro igkosasow woy waro koirapan no kono og-iman-iman to igkobaybadyari rin.”