Panuaro 2

Ka Igkabulig to Kougsoban

¹ Anak, tinawaa nu ka mgo kinagian ku, woy limura nu ka mgo sugu ku duon to goinawa nu. ² pamminog ka to kougsoban, woy poomot ka to pogsabut. ³ Umowa nu woy hinggata nu ka pogsabut, ⁴ woy pamanghoa nu unawa to pogpamangho nu to saapi woy to pogpamitow nu to hinoos no bulawan. ⁵ Ko sikan ka oghimuon nu, ogkasabutan nud on ka pogkahallok duon to Magboboot woy ogkakitaan nu ka katagaanan tongod kandin. ⁶ Hoo su ka Magboboot ian ka ogbogoy to kougsoban, woy ligkat to kandin no bobo ogdatong ka katagaanan woy pogsabut. ⁷ Pighimpod to Magboboot ka karaogan to mgo matuarong woy sikandin ka kaasag duon to mgo otow no waro ikasawoy. ⁸ Pigbabantadyan din ka poghipanow to mgo otow no mohusoy, woy pigkaasagan din ka daan to mgo otow no ogpannalinga kandin. ⁹ No sikan ian no ogpakasabut ka ko nokoy ka litos, ka matuarong woy ka mohusoy; ian ka tibon mgo marodyow no daan. ¹⁰ Ogsood ka kougsoban duon to goinawa nu, woy ogkarago ka ko oggoramon nu ka katagaanan. ¹¹ Ogkabantadyan ka to marodyow no pogdoromdom, woy ogkakaasagan ka to pogsabut. ¹² Ogpakalipuwas koikow ka kougsoban ligkat to mgo daan to mgo maroot no mgo otow, ian to mgo otow no kono’n matul-id to pogkagi. ¹³ Og-ongkoran to sikan no mgo otow ka matul-id no mgo daan odyow to poghipanow to kausiloman. ¹⁴ Ogkarago sikandan to poghimu to kono’n litos, woy ogkukuus sikandan tongod to bongkug no hinimuan. ¹⁵ Mgo bongkug ka mgo daan dan, woy mgo gawoy ka tibon mgo oghimuon dan. ¹⁶ Songo ogpakalipuwas koikow ka kougsoban ligkat to agkadyon no boi, ligkat to nakasuwoy no asawa no og-adyat-adyat to pogkagi. ¹⁷ Pig-ongkoran to sikan no boi ka lukos no nigduma kandin ligkat to daaga pad sikandin, woy pigbaagad din ka kasabutan no pighimu rin to tangkaan to Magboboot nokani. ¹⁸ Ka ogsood to baoy rin ogdoog to kamatadyon, woy ka oghipanow to mgo daan din ogpaka-agpot to mgo gimukud to mgo namatoy on. ¹⁹ Waro otow no oglibong ligkat kandin odyow no ogkoudyag oghutuk. ²⁰ Di sikoikow atag, oghipanow ka to mgo daan to marodyow no mgo otow, woy kono ka ogsuwoy to mgo daan to mgo matuarong no mgo otow. ²¹ Ogpaka-ugpo ka mgo matuarong no mgo otow duon to tano, woy ogpalinggaat duon ka mgo otow no waro igkosawoy, ²² di ogkatampod ka pog-ugpo to mgo maddoot duon to tano, woy ogkabagnus duon ka mgo otow no ogsuwoy-suwoy.