3
Timul Pad no Igkabulig to Kougsoban
1 Anak, doka’g kalingawi ka mgo udlin ku, ikannugun nu atag ka mgo sugu ku duon to goinawa nu, 2 hoo, su ogpakamaadyat lagboy sikan to ukul nu, woy ogkaruonan ka. 3 Doka’g ongkori ka dakol no goinawa woy ka kamaugotan; ibaliog nu atag, woy isulat nu duon to goinawa nu. 4 Hoo su ko ogpalinggaat sikan to koikow, ogkarago ka Magboboot woy ka mgo otow koikow woy ogkangaranan ka.
5 Saligi nu ka Magboboot to tibon goinawa nu, woy doka’g sandig duon to koikow ro no katagaanan; 6 ilaa nu sikandin to tibon mgo poghipanow nu, woy ogtul-iron din ka mgo daan nu.
7 Doka’g doromdom no mougsobon kad on; kahalloki nu ka Magboboot atag, woy ongkori nu ka karootan 8 odyow no ogmarodyow ka panlawa nu, woy ogmadigon ka mgo bokog nu.
9 Ilaa nu ka Magboboot pinabadyo to saapi nu woy pinabadyo to an-anadyan no bogas to tibon mgo pinamua nu; 10 no sikan ian ogkaponu-ponu ka laapong nu, woy ogtigis on ka tadyaw nu to iam no binu.
11 Anak, doka’g samilii ka pogsapad to Magboboot, woy doka’g kabou ko og-ogotan ka rin, 12 su ogsaparan to Magboboot ka mgo indakoli to goinawa rin, unawa to amoy no ogsapad to anak din no igkarago din.
13 Naboligan ka otow no ogpakakita to kougsoban, woy ka otow no ogpakatimul to katagaanan din, 14 su madmarodyow ka kougsoban to saapi, woy dakol-dakol ka ogkapurut to kougsoban to bulawan. 15 Mahal pad ka kougsoban to mgo mahalon no mgo batu, woy kono ogpakatopong kandin ka agad nokoy no ogkoiniatan nu. 16 Ogbogoy ka kougsoban to maadyat no ukul, woy songo ogkabogadyan ka to saapi woy to kabantug. 17 Maddodyow ka mgo daan to kougsoban, woy ogdoog sikan to ka-awangan. 18 Unawa't kadyu to koudyagan ogbogoy ka kougsoban to marodyow no pog-ugpo duon to otow no oggon-gon kandin, woy ogkaboligan ka otow no ogkop-kop to kougsoban.
19 Pigpos-ok to Magboboot ka kalibutan pinabadyo to kougsoban, woy pinabadyo to pogsabut pigtapid din ka langit, 20 pinabadyo to katagaanan pigbaad to Magboboot ka mgo woig, woy inpo-uran din ka mgo saagapun.
21 Anak, ikannugun nu ka marodyow no poghusoy woy marodyow no pogdoromdom, doka’g lokoi sikan; 22 hoo su ogbogoy sikan to koudyagan nu woy ogkounawa sikan to baliog duon to liog nu. 23 Ogpakahipanow ka no waro igkobaybadyari nu, woy kono ka ogkatiklobu; 24 ko oghibat ka, kono ka ogkahallok; ko oghirogo ka, marodyow ka poghirogo nu. 25 Doka’g kahallok no ogkatokowan ka to igkobaybadyari woy doka'g koipong no ogkawaraan ka unawa to oglopow duon to mgo maddoot no otow, 26 su ka Magboboot ian ka ogsaligan nu, woy ogbantoy sikandin no kono ka ogkalit-ag.
27 Doka i-oog ka karodyowan to otow no litos no ogkabogadyan ko duon litos no igbogoy nu. 28 Doka’g nangon duon to songo otow nu to “Libong ka pad; asoom kud ibogoy” ko duon on to koikow kuntoon ka igbogoy nu porom. 29 Doka’g babantak duon to songo baoy nu, su nig-ugpo sikandin no marani nu no nigsalig koikow. 30 Doka’g badyungi to karootan no waro pugtian ka otow no waro nighimu to maroot koikow. 31 Doka’g koima to mabuut no otow woy doka’g untul to mgo daan din 32 su ogdomotan to Magboboot ka otow no ogsuwoy-suwoy di ogdanion din ka otow no matul-id. 33 Pigtungadyawan to Magboboot ka baoy to otow no maroot, di pigboligan din ka lunggunan to matuarong no otow. 34 Ogsuy-aton to Magboboot ka mgo otow no masuy-at, di ogkoid-uan din ka mgo otow no ogpasaad-saad. 35 Ogpakatinawo ka mgo mougsob to kabantug, di ogpasiporan to Magboboot ka mgo angol-angol.