4
Dorodyawi ka Kougsoban
1 pamminog kow, mgo anak ku, to pog-anad to amoy now. Pannalinga kow odyow to pogtimul to pogsabut now. 2 Ogbogadyan ku sikaniu to marodyow no pog-anad, no sikan ian no kono kow og-iniug to in-anad ku. 3 To bato a pad to lunggunan to amoy ku no sagsagboka no pinaradyag no anak to inoy ku, 4 pignangonan a to amoy ku to “Gon-goni nu ka mgo kinagian ku to tibon goinawa nu. Toora nu ka mgo sugu ku woy ogkoudyag ka. 5 Purut ka to kougsoban, puruta nu ka katagaanan; doka’g kalingawi ka mgo kinagian ku, woy doka’g suwoy to daan to sikan. 6 Doka’g iniugi ka kougsoban woy ogkaasagan ka rin. Dakola nu ka goinawa nu kandin, woy ogbabantadyan ka rin. 7 Ka kougsoban ian ka dorodyawi; no sikan ian no ogpuruton nu ka kougsoban. Agad pad ko ogkawaraan ka to pogpurut, puruta nu ka pogsabut. 8 Iparakol nu ka kougsoban woy ogdakolon ka rin; kopkopi nu sikan woy og-iloon ka rin. 9 Ogkadassagan ka rin to koid-u woy to kabantug.”
10 pamminog ka anak, woy tinawaa nu ka mgo ogkagion ku, woy ogmoon-ing ka mgo tuid to ukul nu. 11 Ogtuonon ku sikoikow to daan to kougsoban, woy og-aapon ku sikoikow to mgo matul-id no daan. 12 Ko oghipanow ka, kono ka ogkabaabagan, woy ko ogpallaguy ka kono ka ogkasaligkat. 13 Gon-goni nu ka in-anad, woy doka nu oglokoi; ikannugun nu ian su sikan ka ogbogoy to koudyagan koikow. 14 Doka’g diok duon to daan to karootan, woy doka’g unug to daan to mgo maddoot no otow. 15 Samilii nu sikan no daan, liku ka woy paragas ka to poghipanow nu. 16 Hoo su kono ogpakahirogo ka mgo maddoot ko kono pad sikandan ogpakahimu to karootan. Ogkapuwow sikandan ko waro otow no ogkasaligkat dan. 17 Unawa to koonon dan ka karootan woy unawa to og-inomon dan ka pogpasakit. 18 Ka daan to matuarong no otow, unawa to kaadyag to pogsilo to allow, no og-ungud ogmaadyag taman to ka-awangan to matikang on ka allow. 19 Di ka daan to mgo maddoot no otow atag ogko-unawa to maraom no dooman; kono ogkataga sikandan ko nokoy ka ingkasaligkat dan.
20 Anak ku, pannalinga ka to ignangon ku, woy dorodyowa nu ka pogpamminog to mgo kinagian ku. 21 Pitowa nu sikan ladyun, woy ikannugun nu duon to goinawa nu, 22 su ogbogoy soini no mgo kinagian to koudyagan duon to otow no ogpakakita to soini, woy ogbogoy sikan to karodyowan to tibon panlawa to otow. 23 Labow to tibo, bantadyi nu ka goinawa nu, su sikan ka sobsob to koudyagan nu. 24 Awaa nu ka ogpakasuwoy no mgo kinagian duon to bobo nu; waro porom maroot no kinagian duon to bibig nu. 25 Pipitow ka ladyun to kohuna-an nu, woy ungud ka ogloong-loong dio to ogkatangkaan nu. 26 Hipanow ka ro duon to nignanaapu no mgo daan, woy duon ka ro ladyun ogdiok to pigdorodyowan no pagindaanan. 27 Doka’g suwoy pohondio to kawanan woy ko pohondio to gibang. Doka’g pauguti ka paa nu to pogdoog to karootan.